ህወሓት ወደ አገር በሚገቡ መንገደኞች ገንዘብ ለማስገባት እየጣረ ነው

በኢትዮጵያ ተግባራዊ የተደረገውን የገንዘብ ኖት ለውጥ ተከትሎ መደናገጥ ውስጥ የሚገኘው ህወሓት ከውጭ አገራት ወደ ኢትዮጵያ የብር ኖቶችን እያስገባ እንደሆነ ተጠቆመ። ወደ ኢትዮጵያ የሚጓዙ ጥንቃቄ እንዲያደርጉ፤ ቦሌ ዓለምአቀፍ አውሮጵላን ማረፊያ ደግሞ ጥብቅ ቁጥጥር እንዲደረግ ተጠየቀ።

ጭንቅላቱ የደረቀውና ኪሱ ወደ በመድረቅ ጉዞ ላይ ያለው ህወሓት የገንዘብ ለውጡን ተከትሎ ከፍተኛ መደናገጥ ውስጥ እንደገባ ጎልጉል ያጠናቀረውን መረጃ ለንባብ አብቅቶ ነበር።

ከሁለት ዓመት ተኩል በፊት ከምኒልክ ቤተመንግሥት የተባረረው ህወሓት መቀሌ በየሆቴሉ መሽጎ በኢትዮጵያ የሽብር ተግባራትን ሲፈጽም ቆይቷል። ይህንንም ተግባሩን ለማስፈጸም እንዲረዳው በሕገወጥ የገንዘብ ዝውውር፤ ሐሰተኛ የብር ኖቶች በማተም ተግባር፤ በኮንትሮባንድ ንግድ፤ ገንዘብ ከአገር በማሸሽ፤ ወዘተ ሕገወጥ ተግባራት ተሰማርቶ አገር የማፍረስ ሥራውን በትጋት ሲሠራ ቆይቷል።

ከዚሁ ጋር በተያያዘ ጎልጉል የደረሰው መረጃ እንደሚያመለክተው ህወሓት እጅግ በርካታ የብር ኖቶችን ከአገር በማውጣት በአሜሪካና በአውሮጳ በሚገኙ አባልና ተላላኪዎቹ እጅ አስቀምጧል። ይህንን መጠኑ እጅግ በርካታ የሆነ ብር ከገንዘብ ምንዛሪ ጀምሮ ለተለያዩ አገር የማፍረስ ተግባራት ወደ አገር በመላክ ሲጠቀምበት እንደነበር መረጃው ይጠቁማል።

የብር ኖቶች መለወጣቸውን ተከትሎ በተሰጠው መግለጫ ጠቅላይ ሚኒስትር ዐቢይና የብሔራዊ ባንክ ገዢ ዶ/ር ይናገር ደሴ እንደተናገሩት እጅግ በርካታ ገንዘብ በውጭ አገራት በተለይም በጎረቤት አገራት እንደሚገኝ ጠቁመዋል።

ጎልጉል ያገኘው መረጃ እንደሚያሳየው በህወሓት እጅ በአውሮጳና አሜሪካ የሚገኘው ብር በየጊዜው ለተለያዩ የኮንትሮባንድና የሽብር ሥራ በጎረቤት አገራት በኩል ሲገባ እንደነበር ነው። ሆኖም የገንዘብ ኖት በመቀየሩ ይህ በምዕራቡ ዓለም የተከማቸውን ብር ለመቀየር የህወሓት ሰዎች ወደ ኢትዮጵያ የሚጓዙ መንገደኞችን እያግባቡ እንደሆነ ጥያቄው የቀረበላቸው ለጎልጉል ተናግረዋል።

ከአሜሪካ ደለስ ኤርፖርት ወደ ኢትዮጵያ ጉዞ የሚያደርጉ ሰዎችን በመምረጥና ቀረብ ብሎ በማናገር ይህንን ያህል መቶ ሺህ ብር ይዛችሁልን ሂዱ ይህንን ያህል ዶላር እከፍላለን በማለት የማግባባት ጥያቄ እንደቀረበላቸው መረጃ አቀባያችን ተናግረዋል።

ተመሳሳይ ተግባር ከአውሮጳ ለሚነሱ መንገደኞች እየቀረበላቸው እንደሆነ ከዚሁ ጋር ተያይዞ የተገኙት መረጃዎች ይጠቁማሉ።

ጉዳዩ ያሳሰባቸው ወገኖች መንግሥት በድንበር በኩል ብቻ ይገባል ብሎ የሚጠብቀው ብር ባልተጠበቀ ሁኔታ በቦሌ በኩል በሻንጣ እየተሞላ እየገባ የመሆኑን ጉዳይ ትኩረት ሊሰጠው ይገባል ብለዋል።

ይህንን በርካታ የገንዘብ መጠን ይዘው የሚገቡት ሰዎች በጥንቃቄ የተመረጡ የማይጠረጠሩ መንገደኞች፤ የዕድሜ ባለጸጋዎች፤ በተለይም ሴቶች እንደሆኑና በሁሉም መስክ ቦሌ ዓለምአቀፍ አውሮጵላን ማረፊያ ጥብቅ ቁጥጥር እንዲደረግ አስተያየታቸውን ይሰጣሉ።

ያለፈው ሳምንት ከዋሽንግተን ደለስ ኤርፖርት ወደ አዲስ አበባ ሊጓዝ ከነበረ መንገደኛ የአሜሪካ ጉምሩክና ድንበር ተቆጣጣሪዎች የተያዘው ገንዘብ 98,762 ዶላር መያዛቸው ይታወሳል።

ጎልጉል የድረገጽ ጋዜጣ