በሐዘንና ግልፅ ደብዳቤ ስም የተሸፈነ የድህረ ምርጫ ሀገር የማተራመስ ስትራቴጂ

ትብብር ለአንድነት ኢትዮጵያን በመወከል በየካ ክፍለ ከተማ ምርጫ የተወዳደሩት አቶ ጌትነት ወርቁ በአርሲ የተከሰተውን አስመልክቶ ለጠቅላይ ሚኒስትር ዐቢይ ግልፅ ደብዳቤ በፌስቡክ ገጻቸው ከሦስት ቀን በፊት አጋርተው ነበር።

አቶ ጌትነት ወርቁ እና መሰል የትብብር ፓርቲ አባላት ለምርጫ ለመወዳደር የገቡት በዓላማ እንደሆነ በተደጋጋሚ ሲነገር የቆየ ሲሆን ምርጫው ከተጠናቀቀ በኋላ የተለያዩ ምሥጢሮቻቸው ይፋ እየሆኑ መጥተዋል። በተለይ በምርጫው ክርክር ወቅት ከራሱ የትብብር ሰዎች፤ አቶ ጌትነትንም ጨምሮ፤ በምርጫው የሚወዳደሩት መንግሥት ለመመሥረት እንዳልሆነ ሲናገሩ መሰንበታቸው የሚረሳ አይደለም። እንዲያውም የፈለገውን ያህል ወንበር ብናገኝ መንግሥት ለመመሥረት አንችልም ብለው በሚዲያ መናገራቸው ትብብር ለምን ይሆን ወደ ምርጫ የገባው የሚል ጥያቄ ሲያስነሳ የቆየ ጉዳይ ነው።

በዳያስፖራ የሚገኘው ኃይል በትብብር ውስጥ ያሉትን ፓርቲዎች በትብብር ስም በመቆጣጠር ፓርቲዎቹን ምርጫ እንዲሳተፉ አስደርጎ ከዚያ ምርጫው ሲቃረብ “በምርጫው ለመወዳደር አስቻይ ሁኔታ የለም” በማለት ከምርጫው ሊገለሉና ምርጫውን ሕገወጥ ማስባል ወይም በሻዕቢና በነሱ ቋንቋ “ዲሌጂቲማዝ” ማስደረግ ነበር የታቀደላቸው። ይህንንም ማስፈጸም ይረዳ ዘንድ ከዳያስፖራው ዳጎስ ያለ ብር ተለግሶላቸዋል።

የታሰበው ሳይሆን ቀርቶ እነ አቶ ጌትነት፣ አቶ አብርሃም፣ እነ ሚሥጥረሥላሴ፣ ወዘተ በምርጫው ከተወዳደሩ በኋላ የዳያስፖራው ኃይል እጅግ ተቆጥቶባቸው ከፍተኛ የስድብ ናዳ እያወረደባቸው ይገኛል። ጎልጉል በዚህ ዙሪያ ያጠናቀረውን ዘገባ እዚህ ላይ ማግኘት ይቻላል።

የትብብሩ “ብናሸንፍም ፓርላማ አንገባም” መግለጫ “ወንበር ስታጡ ነው” የሚል ከፍተኛ ተቃውሞ አስነሳ

በተለይ የኢህአፓ አመራሮች አንከር በተባለው ዩትዩብ ላይ በመሳይ መኮንን እጅግ የከፋ ውርጅብኝና ስድብ ሲደርስባቸው አቶ አብርሃም ሃይማኖት “ከምርጫው በኋላ የተጠራ አቋም ይዘን ሕዝባዊ እምቢተኝነቱን እናቀጣጥላለን” ብለው ነበር። የዚህ ማቀጣጠያ አንዱ መንገድ በሀገሪቱ ውስጥ ዕልቂትና ፍጅት እንዲኖርና ዜጎች መንግሥት አልባ ሀገር ውስጥ ያሉ እንዲመስላቸው በፕሮፓጋንዳ ማጣደፍ ነው። በአርሲ የተከሰተው ከዚህ አኳላ ሊጠቀስ የሚገባው ወሳኝ ክስተት ነው።

በአርሲ የተከሰተውን እንደድህረ ምርጫ ሀገር የማተራመስ ስልት በመጠቀምና ዳያስፖራውን በተወሰነ ጸጥ ለማድረግ አቶ ጌትነት ወርቁ “ግልጽ ደብዳቤ

ይድረስ ለክቡር ጠቅላይ ሚኒስትር ዶ/ር ዐቢይ አሕመድ።

ጉዳዩ:- የአርሲውን ጭፍጨፋ በተመለከተ” የሚል በማኅበራዊ ገጻቸው አጋርተዋል።

አቶ ጌትነት የጻፉት ግልፅ ደብዳቤ በሀገሪቱ ያለውን የፖለቲካ እና የብሔር/ሃይማኖት ሁኔታ መነሻ በማድረግ፣ የፖለቲካ ፍላጎትና ስውር አጀንዳ ለማስፈጸም የቀረበ እንደሆነ በጽሑፉ የቀረቡትን ሐሳቦች ከዚህ በታች በሰፈሩት አምስት ነጥቦች እናብራራቸዋለን።

1. የፖለቲካ ሽንፈትን በብሔርና ሃይማኖት ካባ የመሸፈን ስልት

የአቶ ጌትነት ደብዳቤ በምስራቅ አርሲ የተከሰተውን አሳዛኝ የንጹሃን እልቂት ፍጹም ፖለቲካዊ በሆነ መነፅር ብቻ ለመተርጎም ይሞክራል። ጸሐፊው አቶ ጌትነት ወርቁ፣ “በምርጫ አላሸንፍም” ብሎ የተወዳደረ የፖለቲካ ፓርቲዎች ስብስብ (የእናት ፓርቲ አባልና የትብብሩ የሕዝብ ግንኙነት ኃላፊ ናቸው) መሆናቸው ሲታይ፣ ጽሑፉ የንጹሃንን ሕመም ተገን በማድረግ የፖለቲካ የበቀል እርምጃ የመውሰድና የከሰረውን የፖለቲካ ካፒታል መልሶ የማንሰራራት ሙከራ እንደሆነ በግልጽ ያሳያል። የፖለቲካ ውድድርን በምርጫ ኮሮጆ ማሸነፍ ያልቻለ ኃይል፣ የሕዝብን ስሜት የሚኮረኩሩ አጀንዳዎችን በመቅረጽ የትርምስ መንገድን እንደ አማራጭ መውሰዱን ያጋልጣል።

2. ማኅበረሰባዊ እልቂትን የመጋበዝ አደገኛ “የዘር ማጥፋት ደረጃዎች” ትንተና

ጸሐፊው በደብዳቤያቸው ላይ የዘር ማጥፋት (Genocide) ደረጃዎችን በመጥቀስ “አሁን ያለንበት ደረጃ 7 ላይ ነው፣ ወደ ደረጃ 8 (ሙሉ እልቂት) እየተንደረደርን ነው” ማለታቸው፣ ሕዝብን ለማረጋጋትና መፍትሔ ለመፈለግ ሳይሆን፣ በሕዝቡ ውስጥ ፍጹም ተስፋ መቁረጥንና የጋራ መተላለቅን ለመጋበዝ የተወረወረ አደገኛ የፕሮፓጋንዳ ስልት ነው።

• የፍርሃት ስነ-ልቦና መፍጠር፦ ሕዝቡ “ሊጠፋ ነው” የሚል የህልውና ስጋት እንዲያድርበት በማድረግ፣ ለግጭትና ለጦርነት እንዲነሳሳ ይቀሰቅሳል።
• የሰላም አማራጮችን መዝጋት፦ ሁኔታውን ሆን ብሎ ከቁጥጥር ውጪ እንደሆነ አድርጎ ማቅረብ ዜጎች እርስ በርስ በጥርጣሬ እንዲተያዩ ያደርጋል።

3. የመንግሥትን መዋቅር ሙሉ በሙሉ የመፈረጅ ስውር አጀንዳ

በደብዳቤው ላይ ለተፈጠረው ችግር ሦስተኛውና አደገኛ አጥፊ ተደርጎ የተሳለው “የመንግሥት መዋቅር” ነው። ጸሐፊው “ሰንሰለቱ ከጎጥ እስከ ክልል የተዘረጋ ነው” በማለት ሙሉ የመንግሥትን መዋቅር ከተኳሾችና ከአሸባሪዎች ጋር አንድ አድርገው ፈርጀዋል። ይህ አካሄድ ዓላማው ግልጽ ነው፦

• ሕዝቡ በምንም ዓይነት ሁኔታ በመንግሥትና በጸጥታ አካላት ላይ እምነት እንዳይኖረው ማድረግ።
• ሕጋዊውን መዋቅር በማፍረስ፣ ሀገሪቱን ወደለየለት የእርስ በርስ ጦርነትና የመንግሥት አልባነት (Anarchy) ስርዓት ውስጥ መክተት

4. “የጥቃት ተጋላጮችን ማስታጠቅ” የሚለው የመፍትሔ ሃሳብ አደገኝነት

ጸሐፊው ከመፍትሔዎች አንዱ አድርገው ያቀረቡት “የጥቃት ተጋላጮችን በሕጋዊ መልኩ ማስታጠቅ” የሚለውን ነው። ይህ ሃሳብ ሰላምን ለማውረድ ሳይሆን የሃይማኖትና የብሔር ጦርነቱን ይፋዊ ለማድረግ የሚቀርብ አደገኛ ጥሪ ነው።

• መንግሥታዊ ካልሆነ መዋቅር ውጪ ሕዝብን በብሔርና በሃይማኖት እየለዩ ማስታጠቅ፣ ሀገሪቱን ወደማይጠፋ የርስ በርስ እሳት ውስጥ መክተት ማለት ነው።
• ይህ ዓይነቱ ጥሪ የሲቪል ማህበረሰቡን ራሱ የጦርነቱ ቀጥተኛ ተሳታፊ በማድረግ የሰላም ስምምነቶችን ሙሉ በሙሉ ያከሽፋል።

5. በሐዘን ስም የተሸፈነ የትርምስ ስትራቴጂ (Post-Election Plan)

የደብዳቤው ማሳረጊያ ላይ የተጠቀሱት ማስፈራሪያዎች ፍንጭ የሚሰጡት ጽሑፉ የሰላም ጥሪ ሳይሆን የትርምስ ማስጠንቀቂያ መሆኑን ነው። ከምርጫ ማግስት የሚጠበቁ የሰላማዊ ተቃውሞ መንገዶች ተዘግተው፣ ጉዳዩን ወደ ሃይማኖት ፀብ በመቀየር ሀገርን የማፍረስ ድብቅ ዕቅድ (Post-election destabilization plan) መኖሩን በግልጽ ያሳያል።

ማጠቃለያ

ይህ ግልጽ ደብዳቤ በንጹሃን ደምና ሃዘን ላይ ተመስርቶ የተጻፈ፣ ነገር ግን ዋና ግቡ የፖለቲካ ሽንፈትን ለመበቀል ሕዝብን ከሕዝብ፣ ሕዝብን ከመንግሥት ጋር በማጋጨት ሀገራዊ መረጋጋትን ማደፍረስ የሆነ ስልታዊ ማኒፌስቶ ነው። ደብዳቤው የመፍትሔ አካል ሳይሆን፣ ራሱ ችግሩን ይበልጥ አጋግሎ የሃይማኖት ጦርነት ለመጫር የተነደፈ አደገኛ መሣሪያ ነው።

ጎልጉል የድረገጽ ጋዜጣ