የጥቁር አንበሳ ዕጩ መኮንኖች (ካዴቶች) ተመረቁ

የኢትዮጵያ ወታደራዊ አካዳሚ ለ69ኛ ዙር ያሰለጠናቸውን “የጥቁር አንበሳ” ዕጩ መኮንኖችን አስመረቀ። ተመራቂዎቹ “የጥቁር አንበሳ” መባላቸው በምዕራባዊያንና በውስጡ ነበሩ በተባሉ “ካሃዲዎች” የተበተነውን ታላቁን የኢትዮጵያ መከላከያ ያስታወሰ መሆኑ ልዩ ስሜት የሚሰጥ እንደሆነ ምርቃቱን ተከትሎ አስተያየት ተሰጥቷል።

“ኢትዮጵያን መንካት አይቻልም በሚል ቁጭት ነው ኢትዮጵያን የሚመጥን የመከላከያ ኃይል ለመገንባት እየሠራን ያለነው” በማለት የጦር ኃይሎች ም/ጠ/ኢታማዦር ሹም ጄኔራል አበባው ታደሰ በተናገሩ ማግስት፣ አዳዲስ መኮኖች መመረቃቸው፣ ጀነራሉ በንግግራቸው የሚገነባው ኢትዮጵያን የሚመስልና የሚመጥን ሰራዊት ዘመናዊና ቴክኖሎጂን የተላበሰ፣ በምሁራን የተገነባ እንደሚሆን ካመላከቱት ጋር ተያያዥ ሆኗል። ተመራቂዎቹ የመጀመሪያና ሁለተኛ ዲግሪ ያላቸው፣ በራሳቸው ተነሳሽነት ከሲቪል የስራ መስካቸው ወደ ውትድርና ያመሩ ተተኪ መኮንኖች መሆናቸው ታውቋል።

የሀገር መከላከያ ሰራዊት መኮንኖች ኢትዮጵያዊ ጀግንነት፣ ከሀገር ፍቅርና ከሕገመንግሥቱ የሚቀዳ ዓላማና ሁለገብ ዕውቀት ሊኖራቸው እንደሚገባ የጠቀሱት ደግሞ የጦር ኃይሎች ጠቅላይ አዛዥ ዐቢይ አሕመድ ናቸው። ይህንንም ያሉት በምረቃው ሥነሥርዓት ላይ ነው።

በተከታታይ በወታደራዊ ሳይንስና ትምህርት የሰለጠኑ፣ በሜካናይዝድና ኢንተለጀንስ የተሠሩ አዳዲስና ወጣት ሙያተኞችን እያካተተ ያለው የመከላከያ ሠራዊት ውጊያን በትንሽ ኪሣራ፣ በአጭር ጊዜ ማጠናቀቅ እንዲችል ተደርጎ እየተሠራ መሆኑ በተደጋጋሚ ሲገልጽ እንደነበር ይታወሳል።

በ1983 የኢትዮጵያ መከላከያ “የደርግ ሠራዊት” ተብሎ እንደተበተነው ሁሉ በቅርቡ ትህነግ አማራና አፋር ክልልን ወሮ በነበረበት ወቅት “እጃችሁን ለትግራይ ኃይልን ስጡ” በሚል ጥሪ ሲቀርብለት የነበረና ወረራውን በአጭር ጊዜ ራሱን አደራጅቶ የቀለበሰና ልምድ ያካበተ እንደሆነ ከፍተኛ መኮንኖች ሲያስታውቁ ቆይተዋል። በወቅቱ የትህነግ አመራሮች ይህ በአዲስ እየተደራጀ ያለውን የኢትዮጵያ መከላከያ ሠራዊት “የዐቢይ ሠራዊት” በማለት ዳግም እንደሚያፈርሱት ሲዝቱ እንደነበር ይታወሳል።

የምረቃውን ሥነ ሥርዓት አስመልክቶ በታተሙ ምስሎች ለመረዳት እንደተቻለው የቀድሞ የኢትዮጵያ መከላከያ ሰራዊት አዛዥ የነበሩትና የኅብረተሰባዊት ኢትዮጵያ የጀግኖች ጀግና አንደኛ ደረጃ ኒሻን የተሸለሙት ብርጋዴር ጄኔራል ተስፋዬ ኃብተማርያምና ሌሎች ዕውቅ የቀድሞ ባለኮከብ መኮንኖች በሥነሥርዓቱ ላይ ተገኝተዋል።

ዛሬ የመንግሥት መገናኛዎች እንዳሉት የኢትዮጵያ ወታደራዊ አካዳሚ 69ኛ ዙር የጥቁር አንበሳ ኮርስ የሲቪል ወታደራዊ መኮንኖችን በምክትል መቶ አለቃ ማዕረግ ዛሬ አስመርቋል። በመርሀ ግብሩ ላይ ጠቅላይ ሚኒስትርና የጦር ኃይሎች ጠቅላይ አዛዥ ዐቢይ አሕመድ፣ የጦር ሃይሎች ጠቅላይ ኢታማዦር ሹም ፊልድ ማርሻል ብርሀኑ ጁላ እና የክልል ርዕሳነ መስተዳድሮች ተገኝተዋል።

ጠቅላይ ሚኒስትሩ ለተመራቂዎች ባስተላለፉት መልእክት የሀገር መከላከያ ሠራዊት መኮንኖች ኢትዮጵያዊ ጀግንነት፣ ከሀገር ፍቅርና ከሕገመንግሥቱ የሚቀዳ ዓላማና ሁለገብ ዕውቀት ሊኖራችሁ ይገባል ብለዋል።

የነገ የሀገር ኩራት ጄኔራሎችና ሀገር መሪዎች መሆናችሁን በቅጡ በመረዳት ለዓላማችሁ የምትታትሩ፣የምትተጉና ከቀድሞ የጦር መሪዎች ተምራችሁ የምትሠሩና የምታሠሩ መሆን ይጠበቅባችኋል ሲሉ አሳስበዋል።

የጦር ኃይሎች ጠቅላይ ኢታማዦር ሹም ብርሀኑ ጁላ፤ የዛሬ ተመራቂዎች የተሰጣቸውን ሥልጠና በብቃት በመወጣት የመከላከያ ሠራዊት አባል መሆን የቻሉ መኮንኖች መሆናቸውን ገልጸዋል።

ኢትዮጵያ ችግር ውስጥ በገባችበት ወቅት ሀገራቸውን አስቀድመው በአስቸጋሪና ውስብስብ ስልጠና ተፈትነው ያለፉና ለምረቃ የበቁ መኮንኖች መሆናቸውንም ጠቅሰዋል።

የ69ኛ ተመራቂ መኮንኖች አብዛኞቹ የመጀመሪያና ሁለተኛ ዲግሪ ትምህርታቸውን በተለያዩ ዘርፎች የተሰማሩበት ሥራቸውን አቁመው በራሳቸው ተነሳሽነት እናት ሀገር ጥሪን ተቀብለው ሠራዊቱን የተቀላቀሉ ናቸው። (ኢትዮ 12)

ጎልጉል የድረገጽ ጋዜጣ