“ስብሃትን “አቦይ” አልላቸውም … እንዲህ ዓይነት አባት አልመኝም” ጄኔራል ባጫ
የጁንታው ፈጣሪና መሪ ስብሃት ነጋ በመከላከያ ሰራዊትና በፌዴራል ፖሊስ በቁጥጥር ስር ከዋሉ በኋላ በተለቀቀው ተንቀሳቃሽ ምስልና ፎቶ ሲስቁ ታይተዋል። በርካቶችም ስብሃት ምን አሉ በሚል ሲነጋገሩ ነበር።
ሌፍተናንት ጄኔራል ባጫ ደበሌ እንደገለጹት ስብሃት ከተያዙ በኋላ አስተያየት ሰጥተዋል። ስብሃት በተያዙበት ሰዓት ለከፍተኛ የመከላከያ መኮንኖች፣ “እኛ እኮ ከሞትን ቆይተናል“ የሚል አስተያየት እንደሰጡ ሌ/ጄኔራል ባጫ ደበሌ ለጋዜጠኞች ተናግረዋል።
ስብሃት ከመያዛቸው አስቀድሞ “ቢያዙ ምን ይሉ ይሆን“ ብለው ጄነራሎቹ ይወያዩ እንደነበር የገለጹት ሌፍተናንት ጄነራል ባጫ “ግለሰቡ ቢያዙ ሕገ መንግሥቱ ጥሩ ነው ፤ ሕገ መንግሥቱ እንደዚህ ነው… ብለው ነው የሚያወሩት” የሚል ግምት በጄኔራሎቹ ሀሳብ እንደነበር ተናግረዋል።
ስብሃት ከተያዙ በኋላም እንደተገመተው፣ አንደኛው ጄኔራል ሲያናግሯቸው “ሕገ መንግሥቱ ጥሩ ነው፤ ተወያዩበት“ እያሉ ሲያወሩ እንደነበር የምዕራብ ዕዝ አዛዥ እንደገለጹላቸው ሌፍተናንት ጄነራል ባጫ ገልጸዋል።
ሌ/ጄኔራል ባጫ ተጫዋች ያሉት የምዕራብ ዕዝ አዛዥ መሰለ ስብሃትን “ስለ ሕገ መንግሥቱ ተወውና አንተ እስኪ ምን ይሰማሃል “ብሎ እንደጠየቋቸው ተናግረዋል። ስብሃት ሲመልሱ “እኔ የሚሰማኝ እኛ ከሞትን እኮ ቆይተናል” የሚል ነው።
“መቼ ነው የሞታችሁት?” የሚል ጥያቄ እንደተነሳላቸው ያስታወቁት ሌ/ጄነራል ባጫ “እኛ የሞትነውማ ኢህአዴግ የሚባለው የጠፋ ጊዜ ነው፤ አሁን የምታደርጉት ምን እንደሆነ ልንገርህ? አሁን እያደረጋችሁ ያላችሁት የቀብር ሥነ ሥነስርዓታችን እየፈጸማችሁ ነው“ ሲሉ ስብሃት ነጋ መመለሳቸውን አንስተዋል።
የጄኔራል ባጫ ንግግር ከዚህ በታች ይገኛል።
ጎልጉል የድረገጽ ጋዜጣ
መቸውንም ቢሆን ወያኔ ማለት የተንኮል ማሰሮ ማለት ነው። የሚገርመው ግን የሰሜን እዝ ነው። ተደመሰሱ፤ ተያዙ፤ ሞቱ፤ ገደል ገቡ ይሉናል። እሺ ይሁን ገደል ይግቡ ብለን ስንጠብቅ ለሞት አንድ ቀን የቀረውን የወያኔ ቁንጮና የክፋት ውቅያኖስ ስብሃት ነጋን በቃሬዛ ወደ አዲስ አበባ ማምጣት ምን የሚሉት ነገር ነው? የቀድሞው የትግራይ ክልል ፕሬዚዳንት አያሌ ግፎችን የፈጸመ የወያኔን ትዕዛዝ ፈጻሚ ግፍን በግፍ ላይ የተላበሰ የቁም በድን ነው። አሁን ወያኔ ድል አድርጎ ወታደራዊ መሪዎችን ማርኮና ይዞ ቢሆን ኑሮ በድናቸው በመቀሌ አስፓልት እንደሚጎተት ጭራሽ አያጠራጥርም። ጉድ ያደረጋቸው ከግብጽና ከሱዳን ጋር የገቡት የጦርነት ቀን መማታቱ ነው። ለዛ ነው ሱዳን በመሬት አሳባ ወያኔ የሰሜንን እዝ ባጠቃ በሳምንቱ መሬት ቀምቼ ያዝኩ በማለት የደነፋቸው። በግብጽ፤ በአስመራ፤ በደቡብ ሱዳን የመከረው ጄ/አብዱልፋታህ አልቡርሃን ልቡ የደነደነ፤ እጅ በደም የታጠበ የውጭ ሃሎች መጠቀሚያ ሰው ነው። አሁን ማን ይሙት ሱዳን በጎረቤት ሃገር ላይ ጦርነት የምትከፍትበት ጊዜ ነው? ሱዳን የሚበላ የጠፋበት፤ ኑሮና የዲሞክራሲ ጥማት ያስመረረው ወጣት በሰልፍና በተቃውሞ ምድሪቱን የሚያናውጥበት ያልተረጋጋ መንግስት የቆመላት በግብጽ እንደ ጀልባ የምትገፋ ሃገር ናት። ግን የወያኔም ሆነ የሱዳን ጦርነት መክፈት ለግብጽ የህዳሴ ግድቡን ለማጥቃት እንዲያመቻት የተሰላ ሂሳብ ነው። አቅጣጫ ማስቀየሪያ ስልት። ከዚያ ቀደም ብሎ የተደረገው የጦር ልምምድም ከዚሁ ጋር የተያያዘ ነው። በቤኒሻንጉልና ጉምዝ፤ በመተከልና በወለጋ አማራን ብቻ ለይቶ የማጥቃቱም ብልሃት የተነደፈው ከእነዚህ ሃይሎች ነው።
አሁን በቅርቡ ከገዳሪፍ የደረሰኝ ጥቆማ እንደሚያስረዳው ከየስፍራው አምልጠው ወደ ሱዳን የገቡት የወያኔ ስመ ጄኔራሎችና ባለሌላ ማእረጎች አብረው ከሱዳን ጦር ጎን እንደተሰለፉ የአይን እማኝ ነግሮኛል። በአማካሪነት ደግሞ የግብጽ ሰዎች በቅርብና በሩቅ እንዳሉበት ተደርሶበታል። በዚህም የተነሳ ለኢትዮጵያ እየሰለላችሁ ነው በማለት ብዙ ሃበሾችን ሰብስበው አስረዋል። በትግራይ ተቆርጦ ቀረ የተባለው ጦር ከየስርቻው እየተጠራራ በመሰባሰብ ውጊያ ከፍቶ ችግር እንደፈጠረ ሰምተናል። ወደ 200 ሺህ ሰራዊት አለን ይሉን የነበሩት የክልሉ መሪ ደብረጽዪንና የክፋቱ ኮሮጆዎች ሁለቱ ጌታቸው ደርሰንባቸዋል፤ ተከበዋል፤ ሽማግሌ ልከናል ወዘተ የሚለው ዋጋ የለሽ ወሬ ያሰለቻል። ባለ በሌለ ሃይል ሳይውል ሳያድር ካልተደመሰሱ በስተቀር በራሱ ጥላ ለሚደነብረው ታፍኖ የኖረ ህዝብ እፎይታ አይሰጥም። ይባል አልነበረ ስብሃት ነጋ አፋፍ ላይ ደርሷል? እሱ እንኳን አፋፍ ሊወጣ ተደግፎም መራመድ እንደተሳነው የታመነው ተይዞ ከታየ በህዋላ ነው።
የአለም የፓለቲካ ንፋስ ቅጡ ጠፍቶታል። ትላንት አለምን ስለ ዲሞክራሲ እናስተምራለን ይሉን የነበሩት አሜሪካኖች በታሪካቸው ታይቶ በማይታወቅ ሃገር በቀል ሽብር ታምሰዋል፤ ገናም ይታመሳሉ። እብዶች ስልጣን ሲጨብጡ የሚሉን ለሃገር ለወገን ነው ይሉና እርስ በእርስ ያጫርሳሉ። የአሜሪካም እድል ፈንታ ገና አለየለትም። ተምረናል፤ አውቀናል፤ ለሃገራችን ቁመናል የሚሉ የህዝብ ተወካዪች በፓርቲ ከለላ ከውሸት ጋር ሲቆሙ ማየት አሜሪካ ሂትለርን ልትመርጥ የቀራት አንድ እርምጃ ብቻ ነው። ሌላው ሁሉ ተንጋሎ መትፋት ነው። ጉረኛውና በውሸት ብቻ ያለምንም መረጃ አራት አመት ሙሉ አለምንና አሜሪካን እያመሰ ያለው ዶናልድ ትራምፕ በዪክሬን ሰበብ መጀመሪያ ላይ ከስልጣን ወርዶ ቢሆን ኑሮ ዛሬ ይህ ሁሉ ችግር ባልተፈጠረ ነበር። ግን የፓለቲካና የቡድን ጽዋ የጨለጡት እውነትን በውሸት ለውጠው ስለታደጉት ዛሬ ለተፈጠረው የከፋ ችግር መንገድ ጠራጊ ሆኗል። ያለምንም መረጃ ስፓንሽ ሳህራ (ሳህራዊ) ለሞሮኮ፤ በሱዳን፤ በባህረ ሰላጤው ሃገራት ሰላምን አመጣሁ እስራኤልና የአረብ ሃገሮች ሰላም ፈጠሩ የሚባለው ሁሉ ለጊዜ ፍጆታ እንጂ በአንድ ጀምበር የሚፈርስ የእንቧይ ካብ ነው። ለፓለቲካ ፍጆታ የተነፋ ጥሩንባ! ቱርክ ሃይሏን አንሰራርታ ከአውሮፓ እስከ አፍሪቃ እኔን ስሙኝ ስትል፤ ቻይና በኢኮኖሚ ጥቅማ ጥቅም አሳባ አፍሪቃን በእጇ አስገብታለች። ወደ 55 ሃገሮች ያሉበት የአፍሪቃ አህጉር እንደ ቀድሞው አሁንም የቀጥታና የእጅ አዙር ሃይሎች የሚቀራመቱት ምድር ሆኗል።
አቶ ስብሃት እንዳለው “ከሞትን ቆይተናል” ነውና ዛሬ በሃጉሩ ውስጥ ለመኖር ባለመቻላቸው በየመንገድ፤ በየባህሩ ጉዞ ከሞት ተርፈው፤ በየሰው ቤት በግድና በውድ የባርነት ኑሮ የሚኖሩ እህትና ወንድሞቻችን እልፍ ናቸው። እኛም ለዘመናት ስንጠላለፍ ካለንበር ኑሮ እልፍ ሳንል በየክልላችን ባንዲራ እናውለበልባለን። ሲያሳዝን። ሰው በሰው የጭቃ ቤት ቀንቶ እሳት የሚለኩስበት፤ ከክልሌ ውጣ ብሎ አንገት ከሚቆርጥበት ምድር ላይ ቆመን ሽምግልና፤ ልመና፤ ፍትህ ወዘተ ስንል እገረማለሁ። ባጭሩ ሥራ በልብ ነበር። አሁን ግን ሁሉ ነገር በቴሌቪዝን መስኮት ላይ ሆኖ መለፍለፍ ነው። ምን አለበት ሁሉም ነገር ሲጠናቀቅ ቢወራ? ደግሞስ ተደመሰሱ ስትሉን ከእናንተ ጎን የሞተ የለም ማለት ነውን? የማይታመን ነገር? በጦርነት መካከል ቀዳሚ ሟች እውነት ስለሆነች ሁሉንም ነገር ፈትሾና አመሳክሮ ካልሆነ በስተቀር የተሰማውንና የታየውን ሁሉ ሳያልሙ መሰልቀጥ ማወራረጃ ፍለጋ ይሰዳል። አሁን ስዪም መስፍን ሞቷል ተብሏል፡ ቆሞ ሲሄድ ቢታይ የሚቀጥለውን ወሬ የሚታመን ያደርገዋል። ያው እሱ በህይወት እያለ “ባድመ ለእኛ ተፈረደ” እንዳለው አይነት አማች ዜና። እኔ እማዝነው ለተሰላፊዎች፤ ከበሮ እየመቱ ለሚዘፍኑ፤ ትላንትም ዛሬም በሰው ሞት እልል ለሚሉ። ማብቂያው መቼ ነው? ለምንስ እንገዳደላለን? አሁን እውነት ሱዳን በኢትዮጵያ ላይ ጦርነቱ እንዲቀናት የሚጽፉና የሚናገሩ ሰዎች ጤነኞች ናቸው? ለዛ ነው የጥቁር ህዝብ መከራ ይበልጡ የሚመነጨው ከራሳችን ነው የምለው። አይ ሃገር እንዲህ ነው ሲገሉ፤ ሲገዳደሉ፤ በሰው እንባ ክራር እየመቱ ሲጨፍሩ መኖር። ዘርፎና አዘርፎ መኖር። ያለፈው ክፉ ነው እያሉ የዛሬውን የባሰ ሲኦል ማድረግ። እንዲህ ናት ለውጥ… ድንቄም። በቃኝ!