ቪኦኤ በወለጋ ሆሮ ጉድሩ ለተጨፈጨፉ ኦነግ ሸኔን ከደሙ ንጹህ አደረገ

ቪኦኤ የአማርኛው ዝግጅት ክፍል ጃል መሮ በሚል ስም የሚታወቀውን ሽፍታ ሽፋን ሲሰጠው ስለምንነቱና በትክክልም እሱ ስለመሆኑ መረጃ ሰጥቶ አያውቅም። በቢቢሲ አማርኛና በቪኦኤ እንዳሻው ጊዜ መርጦ ወንጀሉን የሚያስተባብለው ጃል መሮ፤ ሲያሻው የሰጠውን ቃለ ምልልስ ስልክ ደውሎ እንዳይተላለፍ የሚያዝ ለመሆኑ ናኮር መልካ “ጃል መሮ ቃለ ምልልሱ እንዳይተላለፍ በጠየቁት መሠረት ትቼዋለሁ” ሲል ያረጋገጠው ሃቅ ነው።

ቀደም ሲል በሃጫሉ ግድያ ኦነግ ሸኔ እጁ እንዳለበት በመታወቁ እጅግ የተቆጣውን ህዝብ ለማብረድ በናኮር መልካ አመቻችነት የቪኦኤ ዘጋቢ የሆነችው ጽዮን ግርማ ጃል መሮ በሬዲዮ ጣቢያው ቀርቦ ሳይፈተን እንዲፈነጭና ሃጢያቱን እንዲያራግፍ ፈቅዳለት እንደነበር ይታወሳል። ቢያንስ ማንነቱን መጠየቅ ሲገባ፣ ንጹሃንን በየቦታው እያደፈጠ ለሚጨፈጭፍ ሽፍታ፣ ሚዲያውንም ሌላ ጫካ በማድረግ የጨፍጫፊዎችን መሪ ቀረርቶ ስታሰማ “አይ ቪኦኤ ኤዲተርም፣ አለቃም፣ የሌለው ቤት ሆኗል” በሚል በርካቶች ሐዘናቸውን መግለጻቸው አይዘነጋም።

አሁን ደግሞ ከአርባ በላይ ሰዎች በግፍ የታረዱበትና የተጨፈጨፉበት ማስረጃና እማኞች እያሉ በተመሳሳይ ጽዮን በሪፖርቷ ጃል መሮን እንደተለመደው በናኮር በኩል አስገብታ ማስተባበያ ሰርታለታለች። “አወቅሽ አወቅሽ” እንዲሉ በዜና ማመጣጠን ስም ይህን ዘግናኝና ህዝብን ያስቆጣ ጭፍጨፋ ኦነግ ሸኔ በነፍሰ ገዳይነቱ የታወቀበትን ስሙን ቀይሮ “የኦሮሞ ነጻነት ሠራዊት” በሚል እንዲያስተባብል አድርጋለች።

የሆሮ ጉድሩ ሰለባዎች እና የጭፍጨፋው ምስክር የሆኑት ድንጋጤ ባዛለው ድምጽ፣ ሳግ እየተናነቃቸው “ኦነግ ሸኔ አረደን” እያሉ ነበር ለጽዮን የነገሯት። ሆኖም ጽዮን ግርማ “የኦሮሞ ነጻነት ሠራዊት” ዘርና ሃይማኖት ለይቶ እንደማያጠቃ ጃል መሮ ሲነገራት “ኦነግ ሸኔ” ብሎ ስሙን እንዲያስተካክል አላደረገችም። በቃለ ምልልሱ ወቅት በስህተት ቢዘነጋ እንኳ በጽሁፍ መንደርደሪያ ሲሰራለት አልተስተካከለም። ይህም ከደም ጋር ተያይዞ የቆሸሸውን ወንጀለኛውን ኦነግ ሸኔ ስሙን በመቀየር ቪኦኤ ተባባሪ እንዲሆን ያስቻለ በራሱ ወንጀል የሆነ ተግባር ነው።

በሌላ አነጋገር ዱሮ ሲገድል የነበረው ኦነግ ሸኔ ነው፤ እሱ ያለፈ ታሪክ ነው፤ አሁን ያለው የኦሮሞ ነጻነት ሠራዊት ነው፤ ይህ ሠራዊት ደግሞ በዘርና በሃይማኖት ለይቶ አያጠቃም እንዲባል ያስደረገ ነው። ስለ ሁለቱም ቡድኖች ተወካይ ሆኖ የሚናገረው ደግሞ ጃል መሮ የተባለው በደም የተነከረ ወንጀለኛ ነው። በኦነግ ሸኔ የተበላሸውን ወንጀለኛ ስሙን አስረስቶ በኦሮሞ ነጻነት ሠራዊት ስም ሲያድስ ቪኦኤ ዋነኛ ተባባሪው ሆኗል።

ቅንጣቢ እንዳየ ጩሉሌ የገበያ ወሬ የሚጠባበቁት የዩቲዩብ ነጋዴዎች ምኑንም ሳይመረመሩ እንዲህ ያለውን “ክፉ ዓላማ” ያነገበ ዜና ከአድናቆት ጋር ፎቶ በማከል ያሰራጫሉ፤ ከግፍ ሳንቲም ይለቅማሉ። ጃል መሮ የሚባለው በከፍተኛ ወንጀል የሚፈለግ፣ ኢትዮጵያን ለማፍረስ በኦሮሞ ደም ለትህነግ የሚሰራ ሽፍታ “ግድያውን የፈጸሙት የአማራና የኦሮሞ ልዩ ኃይል ናቸው” ብሎ መርዝ እንዲረጭና ክፋቱን እንዲያራባ መፍቀድ በታሪክ የሚመዘገብ አገር የተፈጸመ ሸፍጥ ከመሆን አያልፍም። መልኩን የቀየረ ክህደትም ሊሆን ይችላል። ቢያንስ የኦሮሞ ልዩ ኃይል ገደለ የሚለውን እንቀበል ቢባል፤ አንድ ደም አፍሳሽ ሽፍታ የአማራ ልዩ ኃይል ወለጋ ገብቶ ገደለ ብሎ ሲናገር እንዴት “ለምንድነው የአማራ ኃይል ይህንን በገዛ ወገኖቹ ላይ የሚያደርገው ተብሎ አይጠየቅም”?

በተደጋጋሚ እንደሚነገረው በአገራችን ቋንቋዎች ለሚተላለፉ የውጭ አገር ሚዲያዎች የሚሠሩ ሪፖርተሮች ከመጣው ጋር ሲከንፉ፣ አገራቸውን ጉዳይ በተመለከተ ተሰፍሮ በሚሰጣቸው ልክ የድርጎ ሠፋሪ ጌቶቻቸውንና ቀጣሪዎቻቸውን አቋም ለማሟላት ከመኖር ውጭ ነጻነትን፣ “እኔ አገሬ ላይ ክህደትና ሤራን አላውጅም” በሚል የኢትዮጵያዊነት ጀዝም (ወኔ) ራሱን ያገለለ አንድም ባለሙያ እንደሌላቸው ሕዝብ ልብ ይበል። በዘመነ ደርግ ለወያኔ ሲሰሩ የነበሩ አሁንም አሉ።

በዘመን ህወሃት/ኢህአዴግ ሕዝብ ሲቀጠቀጥና ሲጨፈጨፍ ለወያኔ ሲዘፍኑ የነበሩ ዘጋቢዎች አሁንም አሉ። እነዚህ በሰብዕና ጥራት፣ በሐቅ፣ በኢትዮጵያዊነት መሥፈርት ቢለኩ ማለፍ የማይችሉ ሰሞኑን በአገራችን ላይ በተቃጣው የሚዲያ ዘመቻ ማንነታቸው ጥርት ብሎ ታይቷል።

የለውጡ ሰሞን ቀላቢዎቻቸው ፊታቸውን በትህነግ ላይ ሲያዞሩ አብረው የዞሩ፣ ዛሬ ደግሞ ትህነግ አፈር ሲገባ አፈሩን ልሶ እንዲነሳ አልቅሰው የሚያለቅሱ፣ መረጃ የሚያጣምሙና ሤራ የሚጎነጉኑ እንደ ጃል መሮ ዓይነት በደም የተጨማለቀ ሽፍታ እንዲታመን አዲስ ስም ሰይመው የሚተጉ እንዳሉ ሕዝብ ልብ ብሎ መከታተል ይገባዋል።

አገራችንን እንደ መዥገር እየመጠመጠ፤ እንደ ነቀርሳ እየገደላት የነበረውን ትህነግ በጦር አውድማ በቀላሉ ማምከን ብንችልም በሚዲያ የተነዛብን ፕሮፓጋንዳ ብዙ ጉዳት አድርሶብናል። ለዚህም ደግሞ በአገራችን ቋንቋ እና በሌሎችም በመረጃ ስም ወዳገራችን መርዛቸውን የሚተፉት የምዕራብ ዜና ወኪሎች በዋንኛነት ተጠያቂዎች ናቸው። እንደ ሕዝብ የምንሰማውንና የምናየውን በጭፍን የምንጋት ሳንሆን ከአገር ኅልውና ጋር በማገናዘብ፤ ግራ ቀኙን በማየት በብልሃትና በጥበብ የምንመላለስ ልንሆን ይገባናል።

ጎልጉል፤ የድረገጽ ጋዜጣ

---

ይህ ርዕሰ አንቀጽ የ“ጎልጉል: የድረገጽ ጋዜጣ™” አቋም ነው።