የትህነግ የጦር መሳሪያ ዝውውር ኮሪደሮቹ

ራሱን የትግራይ ሕዝብ ነጻ አውጪ ግምባር (ህወሓት/ትህነግ) በማለት የሚጠራውና በኢትዮጵያ እጅግ አስከፊ የሚባልና ትውልድን ያወደመ ርዕዮት በመከተል አገር ያፈረሰው የወንበዴዎች ጥርቅም፤ እስካሁንም በዓለምአቀፍ የአሸባሪዎች የመረጃ ቋት በአሸባሪነት ተመዝግቦ የሚገኝ ድርጅት መሆኑ ይታወቃል። አባላቱና ደጋፊዎችም በዚሁ ሁኔታ የሚታዩ መሆናቸውን ብዙዎች የሚስማሙበት ነው።

በአገራችን ባለፉት ሁለት ዓመታት ያህል በእጅጉ ተንሰራፍቶ ከሚገኙት ሦስት ሕገወጥ ሥራዎች መካከል አንዱ ሕገወጥ የጦር መሣሪያ ዝውውር ነው። ሌሎቹ ሁለቱ ደግሞ ሕገወጥ የገንዘብ ዝውውርና ሐሰተኛ የዜና ዘገባዎች ናቸው። በሦስቱም ውስጥ አሸባሪው ህወሓት እጁ እንዳለበት በርካታ ጠቋሚ መረጃዎች አሉ።

ከቅርብ ጊዜ ወዲህ ድብቅ ምሥጢራትን በማውጣት የሚታወቀው ethio wiki leaks “ህወሓት እና የጦር መሳሪያ ዝውውር ኮሪደሮቹ” በሚል ርዕስ ባወጣው አጭር የመረጃ ዘገባ ላይ ህወሓት ህገወጥ የጦር መሣሪያ የሚያዘዋውርበት መስመሮችን አቅርቧል፤ ለዚህም ድርጊቱ ለኢትዮጵ ብቻ ሳይሆን ለአፍሪካ ቀንድም ስጋት በመሆኑ በኢጋድ እንዲሁም በዓለምአቀፉ ፍርድቤት በኃላፊነት እንዲጠየቅ ይገባል ብሏል።

የፌዴራሉ መንግሥት በዚህ ጉዳይ ላይ ከባለሞያዎች ጋር በመነጋገር ተግባራዊ ቢያደርግ ብዙዎች የሚደግፉት ሃሳብ እንደሆነ ይገመታል።  

“ህወሓት እና የጦር መሳሪያ ዝውውር ኮሪደሮቹ”

ባለፉት ሃያ ወራት በፖለቲካና የሽብር ተግባሮቹ ተግቶ ሲንቀሳቀስ የነበረው ህወሓት የጦር መሳሪያ ክምችትን ጨምሮ በዝውውር ላይ ተሳትፎ እያደረገ ይገኛል።

የጦር መሳሪያዎቹ የነፍስ ወከፍና የቡድን ተብለው በሁለት ሊከፈሉ ይችላል። ጦር መሳሪያዎቹ በሱዳን በኩል ባለው መስመር እንዲገቡ የሚያደርግ ሲሆን÷ የጦር መሳሪያዎቹ መነሻ ከቱርክና ከሰሜን አፍሪቃ ሀገራት እንደሆነ መረጃዎች ያመለክታሉ ።

የጦር መሳሪያ መተላለፊያ ኮሪደሮቹ፤

ከሱዳን ሱፍ ውሃና ወዲ ኢሎ አድርጎ ሉግዲ ሁመራ የሚያስገባው መስመር የጦር መሳሪያ ዝውውር የሚካሄድበት ዋና ኮሪደር ነው።

የወልቃይት ምድር የሆነችው ሉግዲ በምዕራባዊ የትግራይ ዞን ስር የምትገኝ የድንበር ከተማ ናት።

ከሱዳን የድንበር አካባቢዎች (በዋናነት ወዲ ኢሎ እና ሱፍ ውሃ) በኩል ተሻግሮ የሚገባ በርካታ የጦር መሳሪያ የሚከማችባትና የሚሰራጭባት ማዕከል ነች።

ሉግዲ ይህ ነው የሚባል የፌዴራሉ የፀጥታና ደህንነት (መከላከያ፣ ፌዴራል ፖሊስ) መዋቅር የሌለባት ነፃ ቀጣና ስትሆን፤ በሉግዲ በኩል የሚገባው የጦር መሳሪያ በሁመራ በኩል በሁለት አቅጣጫ ይሰራጫል።

በሽሬ በኩል ወደ መሀል ትግራይ የሚገባው አንደኛው መስመር ሲሆን፤ ከሁመራ ወደ ጎንደርና መሀል አገር የሚሰራጭበት ደግሞ ሁለተኛው መስመር ነው። ወደትግራይ የሚሄደው የክምችቱ አካል ሲሆን÷ በጎንደር በተለያዬ አቅጣጫ ወደመሀል አገር የሚላከው ደግሞ የሽብርና የንግዱ አካል ነው ።

ሉግዲ ላይ ያለው የጦር መሳሪያ ዝውውር የሶሪያዋን ምዕራብ ‘አሊፖ’፣ የሊቢያዋን ‘ቤንጋዚ’፣ የየመኗን ‘ታአዝ’ እና ‘አርሃብ’ ከተማ የሚመስል ነው። ልዮነቱ እነዚህ ከተሞች የእርስ በርስ ጦርነት የሚካሄድባቸው የጦር ቀጣና መሆናቸው ሲሆን፤ ሉግዲ ደግሞ ጎረቤቶቹን በሽብር እያመሰ ራሱን ለነፃ ሀገር ምስረታ እያዘጋጀ ባለው ድርጅት [ህወሓት] ስር ያለች  የጦር መሳሪያ ማስገቢያ ኮሪደር  ማዕከል መሆኗ ብቻ ነው።

በትንሿ የድንበር ከተማ ሉግዲ በኩል ህወሓት ምን እየሰራ እንዳለ ማዕከላዊው መንግሥት ያውቃል ። ዝምታው ይሄን ያህል ተራዛሚ የሆነበት ምክንያት ለማናችንም ግልፅ አይደለም‼

የአገሪቱ ዳር ድንበር በመከላከያ ሰራዊት እንደሚጠበቅ በአዋጅ የተደነገገ ጉዳይ ሆኖ እያለ ÷ ቀጣናው ላይ ጥበቃው የላላ መሆኑ÷ በአካባቢው የህወሓት ጦር በእጥፍ እየተንቀሳቀሰ እንደሚገኝ በቂ መረጃዎች አሉ ።

የማዕከላዊው መንግሥት የትኩረት አቅጣጫ በኤርትራ ‘ሱከቱር’ እና በሱዳን ‘ሐምዳይት’ በኩል ብቻ መሆኑ÷ ህወሓት በሉግዲ በኩል የራሱን የጦር መሳሪያ ዝውውር ኮሪደር ከፍቷል።

የጦር መሳሪያ ዝውውር ውስጥ እጁን የዘፈቀው ይሄ አውሬ ድርጅት ኢትዮጵያን የደም ኩሬ ለማድረግ ተግቶ እየሰራ ነው።

በማዕከላዊው መንግሥት ስር ያሉት÷ የፀጥታና ደህንነት ተቋማት ባለፈው አንድ ዓመት ብቻ በጦር መሳሪያ ዝውውርና ሕገወጥ ትጥቅ በሚል 40,000 የጦር መሳሪያ መወረሱን ትላንት አንድ official ሪፖርት ላይ ያገኘሁት መረጃ ያመለክታል።

ለሽብር ቡድኖች እገዛ በማድረጉ÷ ሽብርንም በማበረታታቱ ከማዕከላዊው መንግሥት በኀይል የተወገደው ታሊባን ቶራቦራን የሙጥኝ ብሎ አያሌ የሽብር ጥፋቶችን እንዳደረሰ ይታወቃል። ዛሬም ወደ መንግሥትነት ለመመለስ ባለፈበት የ18 ዓመት የሽብር ተልዕኮው ላይ ይገኛል።

ታሊባን ለሽብር ተግባራቱ የፋይናንስ እና የሎጀስቲክስ ፍላጎቶቹን እያሟላ ያለው ድራግን ጨምሮ የጦር መሳሪያ ንግድና ሌሎች የኮንትሮባንድ ስራዎችን በመስራት ነው።

አሁን ህወሓት ከታሊባን የተለየ ተግባር እያከናወነ አይደለም። የጦር መሳሪያ ዝውውሩ አንድም የፋይናንስ አቅሙን ይጨምርለታል ። ሁለትም በጎረቤትና በመሀል አገር ኢንሰርጀንሲን ጨምሮ ሌሎች የሽብር ተግባራት እንዲበራከቱ ለማድረግ እየተጠቀመበት ይገኛል።

ህወሓት የአፍሪቃ ቀንድ የሠላምና ደኀንነት ስጋት ነው

ማዕከላዊው መንግሥት ከኢጋድ እና የአፍርቃ ሕብረት ጋር በመመካከር በሕግ እንዲታገድ ብሎም መሪዎቹ በICC እንዲጠይቁ በጋራ ተቀናጅተው ሊሰሩ ይገባል

ጊዜው በረዘመ ቁጥር ቀጣናው ወደ አስከፊ ትርምስ ውስጥ መግባቱ አይቀሬ ነው

ከአዘጋጆቹ፤ ይህ ዘገባ (December 8, 2019) ታትሞ የነበረ ሲሆን አሁን አስፈላጊነቶ ታይቶ በድጋሚ የታተመ ነው

ጎልጉል፤ የድረገጽ ጋዜጣ