በትግራይ ሰብዓዊ ድጋፍ በተቀላጠፈ ሁኔታ እየተካሄደ ነው – የተመድ የሰብአዊ ጉዳዮች ማስተባበሪያ ፅህፈት ቤት

የተባበሩት መንግሥታት ድርጅት የሰብዓዊ ጉዳዮች ማስተባበሪያ ፅህፈት ቤት በትግራይ ክልል የሚደረገው ሰብአዊ ድጋፍ አቅርቦት በተቀላጠፈ ሁኔታ እየተካሄደ መሆኑን አስታወቀ።

ፅህፈት ቤቱ በክልሉ እየተደረገ ያለውን ሰብአዊ ድጋፍ አቅርቦት በተመለከተ ባወጣው መግለጫ፥ በክልሉ ዓለም አቀፍ ተቋማት ሰብአዊ ድጋፍ እያደረጉ መሆኑን አስታውቋል።

ከዚህ ጋር ተያይዞም እስካሁን በተመድ ስር በሚተዳደሩ ተቋማት የሚሰሩ 240 አባላት በክልሉ እየተንቀሳቀሱ መሆኑን ጠቅሷል።

ከዚህ ባለፈም ከሌሎች ተቋማትና ድርጅቶች የተውጣጡ ከ1 ሺህ በላይ የድጋፍ ሰጪ አባላት በክልሉ ድጋፍ እያደረጉ ስለመሆኑም ገልጿል።

እስካሁንም 900 ሺህ ለሚሆኑ ሰዎች ምግብ እና ምግብ ነክ ያልሆነ ሰብአዊ ድጋፍ ተደርጓልም ነው ያለው።

ከተደረገው ድጋፍ ባሻገር ግን በክልሉ ሙሉ ምላሽ ለመስጠት ተጨማሪ 400 ሚሊየን ዶላር ያስፈልጋልም ብሏል።

ከዚሁ ጋር በተያያዘ የዓለም ምግብ ፕሮግራም በትግራይ ክልል ከዚህ ቀደም በክልሉ ያደርግ የነበረውን የምግብ ድጋፍ በማሳደግ ለ770 ሺህ ሰዎች ምግብ ነክ ድጋፍ ለማድረግ የያዘውን እቅድም በትናንትናው እለት በይፋ ጀምሯል።

በዚህም በትናንትናው እለት ለ18 ሺህ የእደጋ ሃሙስ ነዋሪዎች የምግብ ድጋፍ ማድረጉን አስታውቋል።

ድጋፉ ሩዝ፣ በቆሎ እና የአትክልት ዘይትን ያካተተ መሆኑንም ገልጿል።

የዓለም ምግብ ፕሮግራም በትግራይ ክልል ከተካሄደው የህግ ማስከበርና የህልውና ዘመቻ ጋር በተያያዘ ለችግር ለተጋለጡ ዜጎች ድጋፍ ሲያደርግ መቆየቱ ይታወሳል።

ተቋሙም የድጋፉን ተደራሽነት ለማጠናከርና ለማሳደግ እንደሚሰራ መግለጹም ይታወሳል። (ፋና)

ጎልጉል የድረገጽ ጋዜጣ