“ሰውን ለመርዳት ሰው መሆን ብቻ በቂ ነው” የደጎች አውራ የመቄዶኒያው ቢንያም በለጠ

ድሮ ገና ከዓመታት በፊት በ12 ዓመቱ ነበር ሰውን የመርዳት ፅንስ በትንሽ ልቡ ውስጥ የተጸነሰው። ሳድግ የራሴ የበጎ አድራጎት ድርጅት ኖሮኝ ሰዎችን እረዳለሁ እያለ ያወራ ነበር። የእድሜ አቻዎቹ ዶክተር፣ ኢንጅነር፣ ፓይለትና ሌሎችም እሆናለሁ በሚሉበት ለጋ እድሜ የሱ ትንሽ ልብ መሻት አድጎ ሰውን መርዳት መቻል ነበር። ዛሬም በሕይወት ጉዞው ላይ በብዙ ካደገም በኋላ የየቀን ንግግሩ የዘወትር ውዳሴው “ሰውን ለመርዳት ሰው መሆን ብቻ በቂ ነው” የሚል ቃል ነው። ሰው ስለሆነ ብቻ ሰው ይረዳልና።

የራስን ሕይወት ትቶ ስለሰው በሚኖረው ባሕሪው ከሰዎች መካከል ይለያል። የሥጋ ሕመሙ የነፍሱን ቁስል በሻረለት መልካም ሥራው ይታወቃል። ድንቅ የመልካምነት ምሳሌ፣ የመቻል አብነት፤ የደግ ልብ ጌታ ነው። የጥሩዎች ዕንቁ የደጎች አውራ ነው። ብዙዎች በተለያዩ ጊዜያት ደጋችን ነህ ሲሉ በይፋ አመስግነውታል። ዓመታዊው የቅን ልብ ባለቤቶችን እውቅና ሰጪው የበጎ ሰው ሽልማትም አንተ የመሰናዷችን ባለ በጎ ልብ ነህ ሲል ሽልማት ሰጥቶታል። የክብር ዶክትሬት ባለቤቱ የመቄዶኒያ ወላጅ ወጣት ቢንያም በለጠን።

ዘመኑ እናት ለልጇ አባት ወንድሙን እህት አክስቷን የተቸገሩበት፣ ሰው በሰው ላይ የጭካኔ በትሩን በገዛ ወገኑ ላይ የሚያሳርፍበት ቢሆንም ከዚህ በተቃራኒ ለሰው ልጅ በጎ የሚሠሩ ጥቂት ቅን ልቦች አሉ። በተለይ ሰው በሕመም ሲጎዳ እንኳን ባዳ ዘመድ ሩቁ ይሆናል። የታመመ ሰው ደግሞ በሕመም ጉዳት ምክንያት ብዙ አስቸጋሪ ነገሮች አያጣውም። በሚከብድ የሕመም ጣር ውስጥ ያለን ሰው አክሞ ወደ ቀድሞ ጤንነቱ መልሶ ተንከባክቦ ማኖር ግን በብዛት በቅርብ ሰዎች የሚከወን ተጨማሪ አቅምንም የሚጠይቅ ነበር።

ደፋሩ ቢንያም በለጠ ግን ይህን ከወነ፤ በኢትዮጵያ የጊዜ ቀመር 2004 የበጎነት ሥራውን አርባ ያህል ሰዎችን ከሜዳ በማንሳት አሐዱ አለ። አንዳንድ ሰው አይደለም በመኖር በሕመም ይማራል፤ በቀና ቀኖቹ ብቻ ሳይሆን የሕይወቱ ክፉ ቀናትም እሱን ለማስተማር ዝግጁ ሆነው ይቀርባሉ፤ ያኔ ከዓመታት በፊት ሰውና ቀን የጣላቸውን በማንሳት የተጀመረው የቀናነት ጉዞ ዛሬ ላይ ቁጥሩን አሳድጎ ከሰባት ሺህ አምስት መቶ ለሚልቁ ነፍሶች መጠጊያ ታዛ ሆኗል።

የክርስቲያኖች የሕይወት መሠረት በሚባለው ቅዱስ መጽሐፍ ላይ ተከትቦ የሚገኝ አንድ ቃል ዛሬ የብዙኃን መጠለያ ለሆነው መቄዶኒያ ስያሜ መነሻ መሆኑን ራሱ ቢንያም ይናገራል። እንዲህም አለ፤ የመቄዶኒያ ሰዎች በብዙ ተፈትነው ሳለ የድህነታቸው ጥልቀት የልግስናቸውን መጠን አብዝቶታል ይላል የተከተበው ቃል፤ ድሀ ቢሆኑም ለገሱ የሚል ትርጓሜንም ይይዛል።

የኢትዮጵያ ፕሬስ ድርጅት ሠራተኛና አመራሮችም ዓመታዊ የሠራተኞች ቀናቸውን በመቄዶኒያ የአረጋውያንና አዕምሮ ሕሙማን መርጃ ማዕከል በመገኘት ተረጂዎችን ምሳ በማብላትና የተለያዩ የበጎ አድራጎት ተግባራትን በማከናወን አሳልፈዋል።

እሁድ ረፋድ ላይ በመርጃ ማዕከሉ የደረሱት ሠራተኞች ፀሐይቷ ባለመራራት ያወረደችባቸው የንዳድ ውርጅብኝ ሳይሰማቸው በስፍራው ጉብኝት ጀምረዋል። በመርጃ ማዕከሉ የተሠሩትን ተግባራት የሚያስቃኝ ጥናታዊ ፊልም ሲቀርብ ገና አዳራሹ ኃዘን ባስነባቸው ሠራተኞች ተሞላ።

ማዕከሉ ውስጥ ለዘመናት አልጋን ተቆራኝተው የኖሩ፣ ሰዎችና ጊዜ የገፋቸው ምስኪኖች፣ የአዕምሮ ሕሙማን፣ እርጅና በሰፊ መዳፉ የደቆሳቸው፣ ብቻ ጤና ሰጥቶት ማዕከሉን ለመጎብኘት እድል ለተሰጠው ሰው ብዙ ማመስገኛ ምክንያት የሚሰጡ ሰዎች አሉበት። ከታማሚዎች፣ ከአረጋውያንና በቋሚነት ከቀጠራቸው ሠራተኞቹ ቁጥር ባልተናነሰም እዛው ታክመው ተረድተው የዳኑ በጎ ፍቃደኛ አገልጋዮችም ይገኛሉ። በሰው ተረድቶ ሰው መሆንን ተምረዋልና እነሱም ለተረኛ ተረጂዎች ሰው ሆኖ ለመገኘት እድላቸውን አያባክኑም።

የመርጃ ማዕከሉ መሥራች እንዲሁም ዋና ሥራ አስፈፃሚ አቶ ቢንያም በለጠ የኢትዮጵያ ፕሬስ ድርጅት ሠራተኞችን አክብሮ በታማሚ ጎኑ በጉብኝታቸው መሐል በመገኘት መልዕክቱን አስተላልፏል። ስፍራው በቀን ከአንድ ሚሊዮን ብር በላይ ወጪ አለበት። ይህን ወጪውንም ደግ አሳቢዎች ነግ በኔ ማለትን የለመዱ ቅኖች በሚያሰባስቡት ገቢ ነው የሚሸፍነው፤ አሁንም ግን ድጋፍ ይሻል ብሏል።

በኢትዮጵያ ፕሬስ ድርጅት ባልደረቦች የተሠራው መልካም ሥራ ከፈጣሪ ዋጋ የሚያሰጥ ነው፤ በማዕከሉ የሚገኙ ተረጂዎችን ቁጥርም ሃያ ሺህ ለማድረስ ሥራዎች እየተሠሩ መሆናቸውንም አቶ ቢኒንያም ተናግሯል።

የኢትዮጵያ ፕሬስ ድርጅት ዋና ሥራ አስፈፃሚ አቶ ጌትነት ታደሰም ከጎብኚዎች መሐል ነበሩና መልዕክትና አደራቸውን አስተላልፈዋል። በነገ ቤታችንን በመቄዶኒያ መገኘት ለእኛ መልካም ነው፤ እዚህ በመገኘትና ማዕከሉን በመጎብኘት በብዙ አትርፌያለሁ ብለዋል።

አቶ ጌትነት ድርጅታቸው ለተቋሙ የሚያደርገውን ድጋፍ አጠናክሮ እንደሚቀጥል በመግለፅ እኔም የግሌን ለማበርከት አቅሜ በፈቀደ ሁሉ ከመርጃ ማዕከሉ ጎን እቆማለሁ፤ ለድርጅቱም ኪስና ጉልበቴን እፈትሻለሁ ሲሉ ቃላቸውን ሰጥተዋል።

አቶ ጌትነት በስፍራው መገኘታቸው ልባቸውን ያቀና ውስጣቸውን ያከመ መሆኑን ገልጸዋል። የድርጅታቸውን ሠራተኞችም ማዕከሉን በቋሚነት መልካም ፍቃደኞት ሆናችሁ አገልግሉ፤ ስፍራውን በመደገፍም የሥጋም የነፍስም ጥቅም ተጠቀሙ ብለዋቸዋል። (አዲስ ዘመን)

ጎልጉል የድረገጽ ጋዜጣ