ዕጹብ ሠዓልያን

እጅግ የረቀቀው ፤ የሰው ልጅ ሠልጥኖ

እጅግ መራቀቅን ፤ ሀ ያለው ጀግኖ

ለመቸውም ቢሆን ፤ ሆኖ የታደለ

ለሥልጣኔው ግንብ ፤ መሠረት የጣለ

ረቂቅ ሥዕላትን ፤ ነው ያኔ እንደሣለ

ያለእነዚያ ሥዕሉ ፤ በአገልግሎታቸው

አይገቡበት ነገር ፤ ምንም ስለሌለው

እንኳን እዚህ ሊደርስ ፤ እረቆ ሊማማር

ምንም ምን ለማድረግ ፤ ከቶም አይችል ነበር

በዓይን የማይታዩን ፤ በመሣሪያም ቢሆን

የማይዳሰሱም ፤ ብቻ የሚሰሙን

የሣለ ዕለት ነው ፤ ድንቅ አድርጎ እነሱን

በጆሮዎቹ ብቻ ፤ የሚያዳምጣቸውን

ለተለያዩ ድምፆች ፤ መልክ ቅርጻቸውን

እነ አበገደን ፤ እነ አሌፍ ቤትን

የሣለ ጊዜ ነው ፤ ጥንት በድሮ ዘመን

    የኛ አያቶች ደግሞ ፤ በዚህ ጥበባቸው

    እጅግ በረቀቀው ፤ የሥዕል ሞያቸው

    የሚያህላቸው የለም ፤ የሚስተካከላቸው

    ይሄን በክሂላቸው ፤ አሳይተዋልና

    ከማን ቋንቋ ይልቅ ፤ በዓለም ካለው ዝና

    በቋንቋ ያሉትን ፤ ድምፀ አካል ቁመና

    እያንዳንዳቸውን ፤ ነጥለው በማየት

    ብዙ የድምፅ ሥዕላትን ፤ ሥለው በማሳየት

    ፎነቲክ ይለዋል ፤ ሥነ ልሳን ትምህርት

ከዚህም በይበልጥ ፤ እጅግ የሚደንቀው

የእነዚህ ሥዕላት ፤ የዓሣሣል ዘያቸው

ሥውር ወይ አብስትራክት ፤ ተብሎ እንደሚጠራው

ኅብረ መልክ የያዙ ፤ ምሥጢራዊ ናቸው ፡፡

ሀ ናት ብለን ስንል ፤ አም አብሮ ይሰማል

ለ ናት ብለን ስንል ፤ ·ም አብሮ ተሥሏል

አናባቢውና ፤ ተነባቢው አብረው

በአንድ የሚታዩበት ፤ እንደ አንድ ተዋሕደው

ሲለበሪ ተብለዋል ፤ በዚህ ባሕሪያቸው ፡፡

በዚህ ልዩ ባሕሪው ፤ በመጢቅ ብቃቱ

ከሰው ልጅ ላሳናት ፤ በዓለም ካሉቱ

ብቸኛው መሆኑን ፤ የኛ የሆነው ሀብቱ

ተመስክሮለታል ፤ ገና ከበፊቱ

በዲልማን በቤንደር ፤ በየሊቃውንቱ

    መች በዚህ ይበቃና ፤ የአያቶቻችን ፤ የድምፅ ሥዕላት ምሥጢር

    የእኛ የድምፅ ሥዕላት ፤ ሰብአዊ አካል ናቸው ፤ ባለ ብዙ ዓይነት ግብር

    ሌላም ሌላም ብዙ ፤ ባሕል ወግ ሃይማኖት ፤ ሰብአዊ መስተጋብር

    የሚያሳዩ ናቸው ፤ትንቢት የሚነግሩ ፤ የሚያስተምሩ ምሥጢር

ተጽፈው ሲታዩም ፤ ስንኝና ሐረግ ፤ ቃላትን መሥርተው

የአካለ ሰለጥ ፤ ማለት የጅምናስቲክ ፤ ትርዒት ዓሳይተው ነው

አንደኛው አንድ እግሩን ፤ ቄንጥ ባለው ሁሌታ ፤ ከፍ አድርጎ አንሥቶ

አንዱም ወገብ ይዞ ፤ ሌላው እጅ ዘርግቶ

አንዱ አጎንብሶ ፤ ሌላውም ተጣጥፎ

አንዱ ተንበርክኮ ፤ ሌላው ተደግፎ

አንዱ በጭንቅላት ፤ ሌላው በጉልበቱ

አንዱ በትከሻው ፤ ሌላው በደረቱ

ጢባጢቧቸውን ፤ ሲያንኳሉ ሲመቱ ፡፡

የእናት አባቶቻችን ፤ ዕጹብ ሠዓልያን ፤ የሥዕል ችሎታ

ብዙ ነው ምሥጢሩ ፤ ብዙ ያመራምራል ፤ ብዙ አለው አንድምታ

ብዙ ሀገራትም ፤ በዚህ በመመሰጥ ፤ ተማርከው በሥዕሉ

ፊደሎቻቸውን ፤ ከእኛ እየቀዱ ፤ የወሰዱ አሉ

እንደ አርመን ያሉ ፤ ከእኛ እንደወሰዱ ፤ ይመሰክራሉ

ሌሎቹም ብዙዎች ፤ ከእኛ እንደወሰዱ ፤ ብዙ ማስረጃ አለ

የዘረኝነት ከል ፤ ለብሰው ቢዳፈኑም ፤ አይቀር እንደታበለ

የሚሆን ከሆነ ፤ የእውነት ቀን የሚመጣ ፤ እብለት የሚከዳ

ያኔ ይታወቃል ፤ የፊደል ዘር ሁሉ ፤ ከእኛ እንደተቀዳ

የእኛ እጅ የሌለበት ፤ የጥበብ መሠረት ፤ አንድም የለምና

ከሥነ-ፈለኩ ፤ የሕዋ ምርምር ፤ እስከ ፍልስፍና

ከአሥተዳደር ጥበብ ፤ ከቅኔ ድርሰቱ ፤ እስከ ሕክምና

ከዮቶር እስከ ኤዞፕ ፤ የተውኩት ዕውቀት ነው ፤ የዓለሙ ፋና

በየትኛውም መስክ ፤ እኛ ያልረገጥነው ፤ የለምና ዳና፡፡

የአውሮፓ ሀገራት ፤ ጥንታዊ ፈላስፎች ፤ ኢትዮጵያን ሲያገኑ

ሕዝቧንም ሲያደንቁ ፤ እንዲሁ ያለምክንያት ፤ ይመስላል በውኑ?

የሐበሻ ፊደላት ፤ ዕጹብ ድንቅ ሥዕላት ፤ ብዙ ውለታ አላቸው

የሥልጣኔን በር ፤ ወለል አርገው ከፍተው ፤ በማስገባታቸው

ለመላው ዓለም ሕዝብ ፤ ሥልጣኔን ይዘው ፤ በመቆየታቸው

ታሪክ ፍልስፍናን ፤ የባሕል ትውፊት ጥበብ ፤ ባለአደራ ሆነው

በትውልደ ትውልድ ፤ መረጃውን ይዘው ፤ በማሻገራቸው፡፡

የዕጹብ ድንቅ ሥዕላት ፤ ዕጹብ ሠዓልያን ፤ የሐበሻ አያቶች

ለጥበብ ባለቤት ፤ መሣሪያ ሆናቹህ ፤ የእግዚአብሔር እጆች

የሣላቹህት ሥዕል ፤ ለሰው ልጆች ሁሉ ፤ ሥልጣኔን ሰቷል

ምስጋና ይግባቹህ ፤ ዕጹብ ሠዓልያን ፤ ኩራት ሆናቹህናል፡፡

ምስጋና ይግባቹህ ፤ ዕጹብ ሠዓልያን ፤ ኩራት ሆናቹህናል፡፡

መጋቢት 2003 ዓ.ም.