እኚህ ሰው ማናቸው? – ፫

ከአዘጋጆቹ፤ባለፈው ሳምንት “እኚህ ሰው ማናቸው? – ፪” በሚል ለቀረበው ምላሽ በድረገጻችን በመላክና በፌስቡክ ላይ በመለጠፍ የተሳተፋችሁትን በሙሉ እናመሰግናለን፡፡ በተለይ በግጥም ምላሻችሁን ለሰጣችሁ በሙሉ ከፍያለ ምስጋናችንን እናቀርባለን፡፡ የቅንብሩ አዘጋጅ ወለላዬ በቁጥር ሁለት ለቀረበው ጥያቄ ምላሻቸውን በሚከተለው መልኩ በግጥም አስፍረዋል፡፡

መልስ

“የእንዳልካቸው አባት የእንዳልካቸው ልጅ

መውለድ አስተካክሎ እንደዚህ ነው እንጂ”

በማለት አዝማሪ የገጠመላቸው

ቢትወደድ መኮንን ማለት እኚህ ናቸው

እኚሁ ትልቅ ሰው ጠቅላይ ሚኒስትሩ

ብዙ መጽሐፍትን የጻፉም ነበሩ።

ለዚህ ሳምንት “እኚህ ሰው ማናቸው? – ፫” ወለላዬ የሚከተለውን አቅርበዋል፡፡ ምላሻችሁን በግጥም በመመለስ ለዝግጅቱ ውበት እንድትሰጡ ለማደፋፈር እንወዳለን፡፡ የዛሬ ሳምንት መልሱን በግጥም እናቀርባለን፡፡

እኚህ ሰው ማናቸው – ፫?

ጥበብን አስማምቶ – ቀምሞ የሚያጎርስ

ለአንቱታ ማዕረግ – በምኑ ነው የሚያንስ

እንደሌላው ሁሉ – በመስጠት አክብሮት

አንቱታ ጨምረን – ይገባናል መጥራት

ለምሳሌ እኝህ ሰው – አሁን ምናያቸው

የጥበብ በረከት – አምላክ የሰጣቸው

አንቱ የሚባሉ – ባለሙያ ናቸው

እኔ አልናገርም – ንገሩኝ ማናቸው?