የሮመዳን ዋዜማ እና ሮመዳን በሳውዲ

እንኳንስ ለኔ ቢጤ አፍላ የጎልማሳነት እድሜውን በሳውዲ እየገፋ ላለ ላንድ ሰሞን ጉብኝት ሳውዲን የመጎብኘት እድልን ላገኘ የሮመዳን ወር የጾምና የጸሎት ወር ልዩና የማይረሳ ትዝታ ይቋጠርበታል፡፡ በሮመዳን ዋዜማ የገበያ ጥድፊያ የተለመደ ነው፡፡ ጾሙን ለመያዝ የሚያስችሉ የምግብ ፍጆታና ቁሳቁሶችን ዋዜማ መገለጫ ሆኖ ከአመት አመት የሚስተናገድ ቀልብን ሳቢ ትዕይንት ነውና በዛሬው የማለዳ ወጋወጌ ስለ ሮመዳን ዋዜማ ከማውቀው ጥቂቱን ላካፍላችሁ ወድጃለሁ ! የፈቀዳችሁ ተከተሉኝ. . .

. . . ጾም ሲፈታ ለሚቀርበው የጾም መፍቻ ተምርና ጣፋጭ መጠጦች ጨምሮ የምግብ ማዕዱን ለማድመቅ ታላቅ ቅናሽን በሚያደርጉት ትላልቅ የገበያ አዳራሾች የሚደረገው ግብይት ደምቆ የሚስተዋለው በሮመዳን ዋዜማ ባሉት ጥቂት ቀናት ውስጥ ነው፡፡ ለአረቦች ነዳጅ ለሰጠ ፈጣሪ ምስጋና ይግባውና የዘመኑ ቴክኖሎጂ የወለዳቸው የተለያዩ የባውዛ መብራቶችና የሌዘር አንጸባራቂ ብርሃኖች አውራ መንገዶችንና የህዝብ መዝናኛ ቦታወችን የማድመቁ ሃላፊነት የሳውዲ መንግስት ሃላፊነቱን ሲወጣ የሚታየው የሮመዳንን በአል ለመቀበል ሽር ጉድ የሚባልበት አጋጣሚም ይህ የዋዜማ ወቅት ነው ! በሮመዳን ጂዳ እጹብ ድንቅ የሚታይባት ሙሽራ ናት ቢባል ማጋነን አይሆንም !

በሮመዳን ሰውም ቸር ነው ! . . . በየመንገዱ ሲያልፍ ሲያገድም ሰላም ሳይባባል አይተላለፍም፡፡ በተለይ በጾሙ ወቅት ለአንድየ ሰላምታ ” አውቀዋለሁ ፣ አላውቀውም” የሚባል ነገር አይሰራም፡፡ ፈገግ ብሎ በሰላምታ ከመጨባበጥ ባለፈ አብሮ እንዳደገ ትከሻ ለትከሻ ሰላምታ መለዋወጥ የተለመደ የሮመዳን ወር ልዩ ህበረ ቀለማዊ ውበት ነው፡፡ ቀን ላይ ሁሉም ምግብ ቤቶችና ሻሂ ቤቶች ዝግ ናቸው፡፡ ከረፋዱ ጀምሮ ቢሮዋቸውን የሚከፍቱት በአብዛኛው ከውጭ ኩባንያዎች ጋር ትሥሥር ያላቸው ጽህፈት ቤቶች ፤ ለሮመዳን ፍጆታ ምግብ መጠጥ ምኑ ምናምኑን የሚያቀርቡት ፋብሪካዎችና ከዚሁ ጋር ተዛማጅ እንቅስቃሴ የሚያደርጉ ሱቆች ብቻ ናቸው፡፡ ቀኑ ወደ ማታ የተቀየረ ይመስላል፡፡  ጾሙ ከተፈታ በኋላ ምሽት ላይ ምግብ ሲበላ እንደ ሃገራችን ሰው በቅርቡ ያለውን ይጋብዛል “ፈደል” ይሉታል ! “እባክህ እንብላ !” እንደ ማለት ነው፡፡ እንብላ ብሎ አንዱ አንዱን ሲሸማግል ማየት የተለመደ ነው !

ጅዳ በምትደምቅበት ወቅት በሮመዳን ሁሉም ነገር የሚሆነው ማታ ነው፡፡ ታዲያ ማታ ይህ ሁሉ ሲሆን ቀን ላይ ጥድፊያ አይታይም፡፡ አውላላውን ጥርጊያ መንገድ ሞልተው የሚርመሰመሱት ሚጢጢዎችም ሆኑ ትላልቅ የቅንጦት መኪኖችም አልፎ አልፎ ውር ውር ከማለት ባለፈ ብዙ አይታዩም፡፡ ከተማዋ የተወረረች ትመስላለች፡፡ ቀን ላይ ሃይማኖቱ ምንም ይሁን ምን እንደ ሲጋራውና እንደ ምግቡ ሁሉ ውሃ መጠጣት እንኳ አይፈቀድለትም፡፡ “መምኑእ” ነው ክልክል ! በሳውዲ ! በሮመዳን ጾም ዋዜማ የሚፈልገውን ሁሉ እቤቱ ከዋውኖ መውጣት ግድ ይላል ! የስሞኑ ናላን ሰብሮ የሚገባው የጅዳን ሃሩር ጸሃይና የቀይ ባህር ወበቅ አይጣል ነው! . . .ዛሬ በዋዜማው ያለሁት ከመካ 80 ኪሌ ሜትር የቅርብ ርቀት በምትገኘው በወደብ ከተማዋ በጅዳ ነው! አምና ይህን ሰአት ድግሞ ከልጆቸ ጋር የሮመዳንን ዋዜማ የመጨረሻ ቀን የተቀበልኳት ኮረብታማ እና ረባዳ በሆነችው ከተማ ጣይፍ ላይ ሆኘ መካን ቁልቁል እያየኋት ነው ! . . . በቀጣይ አመታት የት እንደምሆንም ብቻ ሳይሆነ እኖር አልኑር፣ የሚያውቀው አንድየ ብቻ ነው!

በዘንድሮው ሮመዳን ቅዱሳኑ መካና መዲና እንደለመዱት ከመላ አለም ለጸሎት የሚመጡ በሚሊዮን የሚቆጠሩ ምእመናን ሙሉ በሙሉ አይስተናገድባቸውም ። ምክንያት አለው ፣ታላቁ የካእባ እና የመዲና ቅዱሳን ቦታዎችን ለማስፋፋት ፣ ከአመት እስከ አመት ተንቦርቅቆ ውሎ የሚያድረውን የበርሃ ሃሩር ወደ ኤሌትሪክ ሃይል ለመቀየር ፣ ትላልቅ ማረፊያ ሆቴሎች ለመገንባት እና ቅዱሳኑን ቦታዎች በፈጣን ዘመናዊ ባቡር ለማገናኘት በቢሊዮኖች የሚቆጠር መዋዕለ ንዋይ ተመድቧል። ከግንባታው ጋር መጨናነቅ እንዳይፈጠር የጸሎተኞች ቁጥር እንዲቀንስ መደረጉን የሳውዲ መንግስት አስታውቋል። በዚህ መሰረት ከሃገር ውስጥ የጸሎተኞች ኮታ በ50 እጅ የቀነሰ ሲሆን የውጭ ምዕመናን ኮታ በ20 እጅ እንዲቀንስ ተደርጓል ! ግንባታው ሲጠናቀቅም የመካና መዲና የቅዱስ ቦታዎች የማስተናገድ አቅም በእጥፍ ድርብ እንደሚጨምር በዋዜማው ያሰባሰብኳቸው መረጃዎች ለሮመዳኑ ዋዜማ የማለዳ ወጌ ግብአት ሆነውኛል!

እንኳን ለሮመዳን የጾምና የጸሎት ወር በሰላም አደረሳችሁ !