“አስደንጋጭ”! 1 ሚሊዮን ከሚጠጋ ተፈታኝ ተማሪ ወደ ዩኒቨርሲቲ የሚገባው 30 ሺህ (3.3%) ብቻ ነው 

በ2014 የ12ኛ ክፍል ሀገር አቀፍ ፈተናን ከ50 በመቶ በላይ ያመጡት ተፈታኞች 3.3 በመቶ ብቻ መሆናቸውን የትምህርት ሚኒስቴር ገለፀ፡፡

የ2014 ትምህርት ዘመን የ12ኛ ክፍል ብሔራዊ ፈተና ውጤት ሪፖርት እና ዋና ዋና ግኝቶች ዙሪያ መግለጫ የሰጡት የትምህርት ሚኒስትሩ ፕሮፌሰር ብርሀኑ ነጋ የዘንድሮው የ12 ከፍል ፈተና ውጤት አስደንጋጭ እንደሆነ እንረዳለን ብለዋል።

በ2014 ዓ.ም የትምህርት ዘመን ለፈተና የተመዘገቡ የ12ኛ ክፍል ተማሪዎች በጠቅላላ 985ሺ 354 ተማሪዎች እንደነበሩ በመግለጫው ተጠቅሷል፡፡

ከዚህ ውስጥም ለፈተና የቀረቡት ተማሪዎች 908ሺ ሺህ 256 (92.2%) ሲሆኑ 77ሺህ 98 ተማሪዎች ፈተና አልወሰዱም ተብሏል።

በትምህርት ዘርፍ የተፈጥሮ ሳይንስ ተማሪዎች ከማህበራዊ ሳይንስ በተሻለ ውጤት ያስመዘገቡ ሲሆን የተፈጥሮ ሳይንስ 31.63 ከመቶ እንዲሁም የማህበራዊ ሳይንስ 27.79 ከመቶ በአማካኝ አስመዝግበዋል ተብሏል።

የ12ኛ ክፍል ፈተና ውጤት አስደንጋጭ ቢሆንም፤ ነገ የተሻለ ትውልድ ለመፍጠር በዚህ ውስጥ ማለፍ ግድ ይላል – ፕሮፌሰር ብርሃኑ ነጋ

በ2014 የትምህርት ዘመን የ12ኛ ክፍል ብሔራዊ ፈተና ውጤት ሪፖርት እና ዋና ዋና ግኝቶች ዙሪያ የትምህርት ሚኒስትሩ ፕሮፌሰር ብርሃኑ ነጋ መግለጫ ሰጥተዋል።

ከዚህ በፊት የነበረው የትምህርት እና ምዘና ስርዓት በርካታ ብልሹ አሰራሮች እንደነበሩበት ያነሱት ሚንስትሩ፤ የአሁኑ የፈተና ስርዓት ይህን ብልሹ አሰራር ለማረም የተወሰደ የመጀመሪያ እርምጃ ነው ብለዋል።

የፈተናው አሰጣጥ በብዙ ፈተናዎች ውስጥ ያለፈ እንደሆነ አንስተው፤ በስኬት ለመጠናቀቁ አስተዋፅኦ ላበረከቱ አካላት ምስጋና አቅርበዋል።

ፈተናው ሙሉ ለሙሉ ከስሮቆት የፀዳ እንደነበረም ተነስቷል።

በጠቅላላ የተመዘገቡት ተፈታኞች ቁጥር 985,354 ሲሆኑ፤ ከነዚህ ውስጥ 92 ከመቶ የሚሆኑት ፈተናውን ወስደዋል።

20,170 ተማሪዎች በፈተናው ከተገኙ በኋላ በተለያዩ የደንብ ጥሰቶች ምክንያት ተባረዋል።

የዚህ ዓመት ውጤት አንድምታ ሲታይ፥ ለዓመታት ከትውልድ ትውልድ ሲንከባለል የተሻገረውን እና ተሸፋፍኖ የቆየውን የትምህርት ስርዓት ብልሽት የሚያሳይ ነው ብለዋል ፕሮፌሰር ብርሃኑ ነጋ በመግለጫቸው።

ለዚህም መንግሥት የትምህርት ስርዓቱን ባለማሻሻል፣ ወላጆች ልጆቻቸውን ባለመከታተልና በሥነምግባር ባለመቅረፅ፣ ትምህርት ቤቶች እና ባለሀብቶች በጋራ የወድቀቱ ተጠያቂ ናቸው ብለዋል።

ከላይ የተጠቀሱ አካላት ቀጣይ መፍትሄዎች ላይ የአንበሳውን ድርሻ በመውሰድ ሊሰሩ እንደሚገባ አሳስበዋል።

ዩኒቨርስቲ ከሚቀላቀሉት እና መደበኛ ኮርስ ከሚጀምሩ 29,909 ተማሪዎች ውጭ ያሉ ሌሎች ከ100 ሺህ የሚልቁ ተማሪዎች በውጤታቸው ተለይተው እንደ ዩኒቨርሲቲዎች የመቀበል አቅም እየታየ ለአንድ ዓመት የማሻሻያ ትምህርት ወስደው በድጋሚ እንዲፈተኑ ይደረጋል ብለዋል።

ውጤቱ አስደንጋጭ እንደሆነ እንረዳለን ያሉት ሚኒስትሩ፣ ነገ የተሻለ ትውልድ ለመፍጠር በዚህ ውስጥ ልናልፍ ግድ ይለናል፤ ይህ የማንቂያ ደወል ሊሆን ይገባል ብለዋል።

በዘንድሮው የ12 ከፍል ፈተና ውጤት ከተፈጥሮ ሳይንስ 666 ከፍተኛ ውጤት ሆኖ ተመዘገበ

በዘንድሮው የ12 ከፍል ፈተና ውጤት በሀገር አቀፍ ደረጃ ከተፈጥሮ ሳይንስ የተመዘገበው 666 ከፍተኛ ውጤት ሆኖ መመዝገቡን የትምህርት ሚኒስቴር ገለፀ።

የትምህርት ሚኒስቴር እና የትምህርት ምዘናና ፈተናዎች አገልግሎት በጋራ በ12ኛ ክፍል ውጤት ዙሪያ መግለጫ ሰጥተዋል።

በመግለጫውም፥ በሀገር አቀፍ ደረጃ የተመዘገበው ከፍተኛ ውጤት ከሰባት መቶ 666 በተፈጥሮ ሳይንስ ሲሆን፤ ከማህበራዊ ሳይንስ ደግሞ ከስድስት መቶ 524 መመዝገቡ ተጠቅሷል።

በተፈጥሮ ሳይንስ 600 እና ከዛ በላይ ያስመዘገቡ 263 ተማሪዎች መኖራቸውም በመግለጫው ላይ ተመልክቷል።

በማህበራዊ ሳይንስ በአጠቃላይ 500 እና ከዛ በላይ ከፍተኛ ውጤት ያስመዘገቡ 10 ተማሪዎች መሆናቸውም ተጠቅሷል። (ሰለሞን ከበደ እና ዋለልኝ ታምር፤ ኢዜአ)

ፕሮፌሰር ብርሃኑ እንዳሉት ውጤቱ አስደንጋጭ ነው። ግን በትክክል መደረግ ያለበት ደፋር ውሳኔ ነው። በዘመነ ት ህነግ በገነት ዘውዴ መበላሸት የጀመረው የትምህርት ሚኒስቴር አሠራር ትውልድ በማክሸፍ አሁን ላለንበት ዝቅጠት ዳርጎናል። ይህ ደግሞ በዕቅድ የተደረገ ኢትዮጵያን የማፍረስ ትልቁ ፕሮጀክት ነው። ይህ እኩይ ዓላማ ቀጥሎ ትምህርት ሚኒስቴርን ሲያበላሹ እና ትውልዱን መቀመቅ ሲከቱ ከነበሩት መካከል ሌላው ተጠቃሽ ሸፈራው ሽጉጤ ነው።

ፕሮፌሰር ብርሃኑ ከእነዚህ ትውልድ አፍራሾች የተረከቡትን ትምህርት ሚኒስቴር በድፍረት ወሳኝ እርምጃዎችን በመውሰድ ለዚህ ስላበቁትና አገርን የመታደግ ትልቁን እርምጃ ስለወሰዱ ትልቅ ምስጋና ሊሰጣቸው ይገባል። እንዲህ ዓይነት ደፋርና ማርሽ ቀያሪ እርምጃ በሌሎቹም የፖለቲካ አካሄዶቻችን ላይ መታየት ይገባዋል። ኢትዮጵያ መፈወስ የምትጀምረው ዛሬ ነው።

ጎልጉል የድረገጽ ጋዜጣ