ከትህነግ የተማረኩና ከውጭ ሀገራት የገቡ ዘመናዊ የጦር መሣሪያዎች በቃሊቲ ለእይታ ቀረቡ

የሀገር መከላከያ ሠራዊትና የትግራይ የሰላም ኃይል ከትህነግ የማረኳቸውንና ከተለያዩ የውጭ ሀገራት የገቡ ከፍተኛ ዋጋ ያላቸው የጦር መሣሪያዎች በቃሊቲ መጋዘን ለእይታ መቅረባቸው ጎልጉል የደረሰው መረጃ ያመለክታል።

ዛሬ አርብ በተካሄደው የጉብኝት መርሃ-ግብር ላይ ተቀማጭነታቸው ኢትዮጵያ የሆነ ለውጭ ሀገራት ወታደራዊ አታሼዎችና ጥሪ ለተደረገላቸው እንግዶች ለእይታ ከተቀረቡት መሣሪያዎች መካከል፦

• ድሮኖች (ከ1 ሺህ በላይ)
• ሚሳኤሎች
• ፀረ-ተሽከርካሪዎች
• ፀረ-ታንኮች
• የድሮን ተተኳሾች
• እና ሌሎች በርካታ የጦር መሣሪያዎች ናቸው።

በጉብኝቱ ወቅት እንደተብራራው፣ የተማረኩት ድሮኖች ቁጥር ብቻ ከ1,000 (ሺህ) በላይ የሚልቅ ሲሆን፣ ይህም የቡድኑን የታጠቁ መሣሪያዎች ስፋትና ከውጭ ሀገራት የሚደረጉ የጦር መሣሪያዎች አቅርቦቶችን የሚያሳይ መሆኑ ተመላክቷል።

የሀገር መከላከያ ሠራዊትና የትግራይ የሰላም ኃይል ያቀናጁት ይህ ስኬታማ እርምጃ የትህነግን ወታደራዊ አቅም ሙሉ በሙሉ እንዳዳከመው የተገለጸ ሲሆን፣ የአካባቢውን ሰላምና ደህንነት በዘላቂነት ለማረጋገጥ የሚደረገው የተቀናጀ እንቅስቃሴ ተጠናክሮ እንደሚቀጥል ተመላክቷል።

ጎልጉል የድረገጽ ጋዜጣ