”እናቴ አልዳነችም!…….‏’’

እናት ለልጇ ያላትን ፍቅር መለኪያ፣ ወሰን፣ ድንበርና ግዜ ይኖረው ይሆን?……. በእግዚአብሄር ፈጣሪነትና ፈቃድ፤ ዘጠኝ ወር በመሀጸኔ ተሸክሜ፣በጭንቅና በጣር አምጨ ወለድኩት። አርባ ቀን ሲሞለው እምነታችን በሚያዘው መሰረት ክርስትና አስነሳሁት። በክርሰትና ስሙ ኅይለማርያም ብዩ ስም አወጣሁለት። ጡቶቸን እያጠባሁ፣ የምችለውን ሁሉ እያደረኩና የማይጠገበውን የእናትነትን ፍቅር እየመገብኩ አሳደኩት። ወደ ዘመናዊ ትምህርት ቤትም ላኩት። ልጀም ለቁምነገር በቃ። ከስልጣን ወደ ስልጣን ተሸጋገረ። ከትልቅ ደራጃም ደረሰ።  የኢትዮጵያ ጠቅላይ ሚኒሰተርም ተባለ። ኅይለማርያም ደሳለኝ፤ የኔ ልጅ። መቼም የእናት ፍቅርና ስቃይ መሳ-ለመሳ ነው። ትልቅ ደረጃ ላይ መድረሱ የሚያስድስተኝን ያህል፤”ምን ይሆን? ወይስ ምን ይደርስበት ይሆን?….”የሚለው የሌት-ተቀን ሀሳብና ጭንቀቴን እናት ብቻ ነው ሊረዳው የሚችለው። የጭንቀታችን አይነት ይለያይ እንጅ፤ ልጅ ኅይለማርያምም ለ’ኔ ይጨነቃል። ”እናቴ አልዳንሽም!….እጸልይልሻለሁ!…..” እያለ።

የተማረውና ብዙ ያውቃል የምለውን ልጀ የሚለኝ ባይገባኝም፤ ዝም ብየ አልፍው ነበር። እየዋለ እያደረ ሲሄድ ግን ”ጀሮ ለባለቤቱ ባ’ድ ነው!”እንደሚባለው ሆነና ከጉረቤቶቸ ”ልጅ ሃይማኖቱን ከድቶ”፤ ከባህር ማዶ በመጣ አዲስ ሃይማኖት እንደለወጠ ተነገረኝ። ደነገጥኩ። ተጠራጠርኩም። ተቆጣሁም። ተናደድኩም። ተገናኝተን እስካናግረው ድረስ ቀኑ ‘ረዘመብኝ። ለነገሩ እስካገኘው  ሁሌም ቀኑ እንደረዘመብኝ ነበር። ይህ ግን የተለየ ነው። እናም ”ምን ቢቃጠሩ ደረሰ ቀኑ!” ነውና ልጅን አገኝሁት። ነገር ግን ገና ሳየው ቁጣየና ንደቴ ሁሉ ናፍቆቱ አጠፋብኝ። እንዴት አድርጌ ልቆጣውስ? እንዴት በዬ ልናደድስ?… ደስ ሲለው ደስ ብሎኝ፣ የከፋው ሲመስለኝ ከፍቶኝ፣ የራበው ሲመስለኝ እርቦኝ፣ የጠማው ሲመስለኝ ጠምቶኝ፣ ወ’ቶ እስኪመለስ ድረስ ”የሆነ ነገር ይደርስበት ይሆን?’ እያልኩ ፈጣሪን እየተማጸንኩና ለአርባ አራቱ ታቦት እየተሳልኩ፤ መገቢያ በሩን እያየሁ በጭንቀተና በስስት ባሳደኩት ልጀ ለምናደድና ለመቆጣት የእናትነት ልቤ እንዴት ይፍቀድልኝ?። አሁን እነዲህ ትልቅ ሰው፣ ባለስለጣንና ባለ ሀብት ሆኖ እንኳ’ በልቶ የሚጠግብ፣ ለበሶ የሚያጌጥና ወ’ቶ በሰላም የሚመለስ ይመስለኝም።

የቤተሰብ ጉዳይ አንስተን ብዙ ስንጫዋውት ከቆየን በኋላ ግን፤ ስለሰማሁት ነገር ስፈራ ስቸር አነሳሁበት።

”ልጅ!… ለመሆኑ የምሰማው ነገር እውነት ነው?”

 “ምን ነገር ሰምተሽ ነው?’’

”ጠፍቶህ ነው?…ሀገሩ ሁሉ ስለ አንተ አይደለም እንዴ ሲያወራ የከረመው። መቼም አሮጊት እናት ምን ታመጣለች ብለህ ነው? ለነገሩማ እኔ ባይገባኝ እንጅ አንተማ ልትነግረኝ ሞክረህ ነበር።”

ሳላስበው እምባዬ በጉንጮቸ ላይ መፍሰስ ጅመረ። ልጀ በድንጋጤ ” ምነው በደህናሽ ነው?” አለና አቅፎ ሊያባብለኝና ምክንያቴን ለማወቅ ተጠጋኝ።

”ለመሆኑ ልጀ..” አልኩ ለቅሶየን ለመግታት እየሞከርኩ። ” ለመሆኑ…ሃይማኖታችን  ከድተህ፣ ሌላ ሃማይኖት መከተል ጀምረሀል የሚባለው እውነት ነው?”

እንደማስቅ አለና፤ መሀረም ከኪሱ አው’ቶ እምባዬን እየጠረገ፤  እኔ ወይም ሌላው ሰው እንደሚለው ሃይማኖታችን ሳይሆን የከዳ፣ ትክክለኛውን የክርስቶስን መንገድ እንደተቀበለና እኔም ብቀበል ዘላለማዊ ህይወትእንደማገኝ መከረኝ። የ’ኛ ወይም የ’ኔ ሃይማኖት ትክክል እንዳልሆነና ገና ያልዳን መሆናችን ጨምሮ የመጸሀፍ ቅዱስ ቃል “እየጠቀሰ” ሊያስረዳኝ ሞከረ። ”እናቴ አልዳንሽም!….እጸልይልሻለሁ!…..” አለኝ። እኔም ሁሉ ነገር ግልጽ ሆነልኝ። ለግዜውም ቢሆን እምባዬ  መፍሰሱን አቆመ። ልቤ ግን ያለቅስ ነበር።

 በራሴ ሀሳብ ውስጥ ገባሁ። ልጀ እኔን ”አልዳንሽም!” ሲለኝ፤ ስለ እግዚአብሄር እናገራለሁ እያለ ” …..በማንም ሰው ላይ አትፍረዱ!…….” የሚለውን ህያው ቃል ዘነጋው ይሆን? ምን አልባት መጸሀፍ ቅዱሳቸው ከ’ኛ የተለየ ይሆን? ወይስ ፈረንጆች የ’ነሱን እምነት እንድንከተል ሆን ብለው አሳስተው ተርጉመው ልጅንም አሳሳቱብኝ ይሆን?

ልጀ ኀይለማርያም ደሳለኝ፤ የኢትዮጵያ ጠቅላይ ሚኒስተር እንደሚለኝ ከሆነ፤ እሱ የሚከተልውን ሃይማኖት ያልተከተለ ሁሉ ”ያልዳነና የጠፋ ነው።” ታዲያ ይህን ሳስብ ልቤን ሀዘን ተሰማው። በማን እንዳዘንኩ ግን በትክክል አላወኩትም። አእምሮዬ በሀሳብና በጭንቀት ናወዘ። እንድሰማውትና እውነት ከሆነ፤ ልጀ አሁን የሚከተለው ሃይማኖት ከተጀመረ ሶስትና አራት ሞቶ ዓመት ቢሆነው ነው። ታዲያ ከዚህ በፊት የነበረው የሰው ልጅና አሁንም ከ’ሱ እምነት ውጭ የሚከተለው የአምላክ ፍጡር ሁሉ የጠፋና ያልዳነ ነው። ይህ ደግሞ እንዴት ሊሆን ይችላል?

ሃይማኖት የግል ነው። ይህ የሰው ልጅ የተፈጥሮ መብቱ ይመስለኛል። የልጀ ሃይማኖታዊ ግንዛቤ በ’ኔ በእናቱ ”አልዳንሽም!…” ብቻ ብሎ የሚያቆም አይመስለኝም።  ፈረንጆች  እምነትቸውን በዚች ሀገር ለማስፋፍት ስለሚጥሩ፤ ልጀ የያዘውን ስልጣን ከለላ በማድረግ  በሌሎች ዜጎች ላይ ተጽኖ ላማሳድር እንዳይጠቅሙበት ፈራሁ።  ”ያ’ገሩን በሬ ባ’ገሩ ሰርዶ!” አይደል የሚባለው።  ‘’ከኢትዮጵያ ህዝብ ጋር ይጋጭብኝ ‘’ይሆን ብዬ  የእናትነት ነፍሴ ተጨነቀች።  ጭንቀቴን ዋጥ አድርጌ ልጅን ቀና ብየ አየሁትና ሁሉንም ባይሆን የተውሰነውን ስሜቴን ልገልጽለት ወሰንኩ።

”እንደ አ’ተ የዚያን ከዚህ አጣቅሸ ማስረዳት ባልችልም ‘የጠፋው በግ’ ማለት አንተ ነህ። ከልጅነትህ ጅምሮ እንድትማር ሌት-ተቀን የደከምኩት እምነትክን አጥብቀህ እንድትይዝ፣ ወገንህን ከድህነት እንድታወጣና ሙያህን ለሀገርህ ህዝብ እንድታስተምር ነበር እንጅ፤ የራስህን እምነት ንቀህና ከድተህ እኔን እናትህን ደግሞ ለማስካድ አልነበረም። መዳን የሚያስፈልግህስ አንተና ያንተ ብጤዎች ናችሁ።”

እምባዬ እንደገና መፍሰስ ጀመረ። የተናገርኩት ልጅን ያስከፈው ይሆን ብዬ ጨነቀኝ። በጥፋተኝነት ስሜት ዓይን-ዓይኑን እያይሁ  መለሳለስ ጀመርኩ።

 ”ዋናው ነገር ለ’ኔ ለእናትህ ኑርልኝ። ደህና ሁንልኝ እንጅ ደስ ያለህን አድርግ።” አልኩት።

እምባዬን እየጠረገ ”ደህንነት ከክርስቶስ ነው!” አለኝ።

የሆነ ነገር ብልጭ አለብኝ ።”እኔ ደህንነት ከድንጋይ ነው አልኩ  እንዴ ? በክርስቶስ ስለማምለክ ደግሞ….”ከ’ኛ ወዲያ….። ” አስቤ የተናገርኩት አይመስለኝም። እናም በእናትና በልጅ መሀ’ል ዝምታ ሰፈነ። የኔ ልብ ግን ማንጎራጎር ጀመረ።……

”ከሁሉ – ሁሉ፣ ጤፍ ታንሳለች

ከጭቃ ወድቃ  ትነሳለች::”…..

እናት ምን ግዜም፣ እናታ‘ለም ነች!

ሀገር ምን ግዜም ፣ ሀገር ነች!

”ስልጡን” ኢትዮጵያዎያኖች…..

ዘመናዊ ”ልሂቃኖች”….

አምላካቸውን  ዘነጉና

ለባእድ አምልኮ ተገዙና፤

ህዝብ–ወገናቸውን ‘ረሱና

ማንነታቸውን ናቁና፤……..

”እኛ ብቻ እናውቃለን”

አጠፋን አንጅ፣ አላለማን

ለያየን አንጅ፣ አላፋቀረን።…….

ተው! ተመከሩ…ተመከሩ!

ከትላንቱ ተማሩ…..ተመራመሩ!

ኢትዮጵያ ግን፤ እጆቿን ወደ እዚአብሄር ትዘረጋለች

እየነጋ እንጅ እየመሸ አይሄድም፣ በጽናት ለቆሙ ለአምላክ ልጆች።

የልቤን እንጉርጉሮ ስጨርስ፤ ልጀን አስተውልኩት። ያልጠበቀው ነበርና ድንጋጤና ሀዘን ፊቱ ላይ አነበብኩ።

“በል አሁን ‘ይቅር በለኝና’ የእናትና የልጅ ወግ እናውጋ።” ስለው ወዲያውኑ እሻታውን አሳየኝ። በውስጡ ግን ”እናቴ አልዳንሽም!… አጸልይልሻለሁ!…” የሚል መሰልኝ። በእርግጥ የኔም መንፈስ  “የጠፋው በግ!… የጠፋው   ልጅሽ!……”  እያለኝ ነበር።

ለማንኛውም አስተያየት፡ e-mail: philiposmw@gmail.com