ከእሁድ እስከ እሁድ

መልዕክተ ደወል – “ተለዩ”

“ … በኢትዮጵያ ሕዝብም ሆነ በተቃውሞው ጎራ የሚገኙ የተገነዘቡት አንድ ጉዳይ ዝም ብሎ በሆይ ሆይታ ሰላማዊ ትግል ማድረግ ብሎም ለውጥ ማምጣት እንደማይቻል ነው፡፡ በቆራጥነት፣ በፅናትና አርቆበማየት ነው ለድል መብቃት የሚቻለው፡፡ ሰላማዊ ትግል  ሲባል ሞት፣ እስራትና እንግልት የለም ማለትአይደለም፡፡ ልዩነቱ ሰላማዊ ታጋዩ አይገድልም፡፡ ሠላምን አያደፈርስም፡፡ ነገር ግን በፀናና በተደራጀሁኔታ መብቱን ይጠይቃል፡፡ ሉዓላዊ ስልጣኑን ዕውን ሳያደርግ ወደ ኋላ አይመለስም፡፡ በሠላማዊ ትግልውጤታማ እንዲሆን የሕዝብ አንድነትና የዓላማ አንድነት ወሳኝ ቅድመ ሁኔታዎች ናቸው፡፡ ትግሉ የራሱስነምግባር አለው፣ መደጋገፍን ይጠይቃል፡፡አንዱ ሲወድቅ እሱን አንስቶ ከፍ ባለ የሞራልና የዓላማልዕልና ትግሉን እየተቀባበሉ ወደፊት መሄድ ይጠይቃል፡፡ አስቀድሞ የነፃነትን ምንነትናየሚከፈለውንዋጋ ማወቅ ተገቢ ነው፡፡ አሁን የጀመርነው ትግል ግብታዊ ያልሆነ የተጠናና በስሜት የማይነዳ ሰላማዊትግል የአንድ ቅፅበት ግርግር እንዳልሆነ ህወሃት/ኢህአዴግ ሊረዳ ይገባል። …

“ከእንግዲህ የሚሰማህን ሰቆቃ በቃ ልትል ይገባል፡፡ የአገር ባለቤትነትህንና የዜግነት መብትህን፣ ክብርህን ለማስጠበቅ ከሁሉም ጋር ሆ ብለህ መነሳት አለብህ። ለኢትዮጵያ ሕዝብ የሕግ የበላይነት ተከብሮ ከጎሣ ይልቅ ሰብዓዊነት የቀደመበት ህዝባዊ መንግሥት የሚቋቋምበትንና አዲሲቷ ኢትዮጵያ የምትመሠረትበት አጋጣሚ አሁን ነው፡፡

“እርስዎ ወደውም ይሁን ተገደው የህወሃት/ኢህአዴግ መሣሪያ የሆኑ ኢትዮጵያዊ ሆይ! የማንነትዎ መገለጫው፣ ክብርና ሞገስን የሚያጎናፅፍዎ ዛሬ እያገለገሉ ያሉትን ህወህት/ኢህአዴግን በመክዳት ለህዝባዊው ትግል አለኝታነትዎን መግለፅ ነው” (ከአዲሲቷ ኢትዮጵያ ድረገጽ የደወል ጥሪ የተወሰደ)

አንደበት

“… ሆን ተብሎ በተቀነባበረ እቅድ ህወሃት አዲስ አበባን እንዲቆጣጠር የተወሰነው ውሳኔ አሳዛኝና ከቶውንም ሊታመን የማይችል ነው። የሰከረ ርዕዮት ዓለም የሚከተሉ፣ በብሄርና በጎሳ ፖለቲካ ላይ የተተከሉ ጠባብ ቡድኖች፣ በስታሊናዊ መርህ የተጠመቁ፣ እንኳንስ 50 ሚሊዮን ህዝብ ያላት አገር ቤተሰብን የመምራትና የማስተዳደር ተሞክሮ የሌላቸው፣ አገርን መምራትን የሚያክል ታላቅ ሃላፊነት ማሸከም ለኔ ከአእምሮ በላይ ነው …” የዛሬ 22ዓመት ኮሎኔል ጎሹ ወልዴ በአሜሪካ ምክርቤት ከተናገሩት፡፡

መድረክ በአባይ ግድብ ላይ ባይተዋር መደረግ የለብንም አለ

ማብራሪያ እንፈልጋለን፣ የግብጽን ማስፈረራት እንቃወማለን

መድረክ በአባይ ግድብ ላይ ገዢው ፓርቲ የሚያራምደውን ሁሉንም አውቃለሁ የሚል የተመጻደቀ አቋም መቀየር እንዳለበት አስታወቀ። ሰማያዊ ፓርቲ ሊቀመንበር በበኩላቸው በግድቡ ዙሪያ አሁንም ማብራሪያ እንፈልጋለን። የግብጽን የወረራ ማስፈራሪያ አጥብቀን እናወግዛለን ብለዋል።

መድረክ አቋሙን ገልጾ ያሰራጨውን መግለጫ አስመልክቶ ለቪኦኤ ማብራሪያ የሰጡት ዶ/ር በየነ ጼጥሮስ “የአባይ ጉዳይ አገራዊ ነው። ችግር ቢከሰት የኢህአዴግ ብቻ አይደለም። እኛም ያገባናል” ብለዋል። የግብጽ መንግስት አገራዊ በሆነው የአባይ ግድብ ጉዳይ እገሌ ከእገሌ ሳይል ሁሉንም የተቃዋሚ ሃይሎች ያሳተፈ ውይይት ማድረጉን ያመለከቱት ዶ/ር በየነ፣ “ኢህአዴግ ህዝብን መያዝ አለበት። ህዝብ እውነተኛ ወኪሎቹን መርጦ ፓርላማ ባለመላኩ ተቃዋሚዎችን የሚጋብዝ አገራዊ ውይይት ሊደረግ ይገባል” የሚል መልክዕክት አስተላልፈዋል።

ጉዳዩ ተጀመረ እንጂ እልባት እንዳልተበጀለት በማመላከት የኢህአዴግን “እኔ ብቻ አዋቂ ነኝ” የሚለውን አቋሙን “መመጻደቅ” በማለት የወረፉት ዶ/ር በየነ፣ ኢህአዴግ ሊየዘጋጅ በሚገባው ውይይት “ጥገኛ” የሚባሉትን የተቃዋሚ ፓርቲዎችንም ሊያካትት እንደሚገባ አመልክተዋል።

የሰማያዊ ፓርቲ ሊቀመንበር ኢኒጅነር ይልቃል ጌትነት በበኩላቸው የአባይን መገድብ  ለጥያቄ እንደማያቀርቡት አስታውቀው፣ በርካታ ግልጽ ሊሆኑ የሚገባቸው ጉዳዮች አሉ ባይ ናቸው። ከቦታው መረጣ ጀምሮ፣ የገንዘቡ ፍሰት፣ የጨረታው አካሄድ፣ የፕሮጀክቱ ጥናትና አገራዊ ደህንነት ላይ ፓርቲያቸው ማብራሪያ እንደሚሻ ተናግረዋል።

የውስጥ ቅሬታዎችን ማስወገድ አግባብ እንደሆነ ያመለከቱት የሰማያዊ ፓርቲ መሪ መንግስት ፕሮጀክቱን ለተራ ፓኦለቲካ ፍጆታ ከመተቀም እንዲቆጠብ ጠይቀዋል። ግብጽ የምታካሂደው ማስፈራራት ክብርና አገራዊ ማንነትን በሚያናንቅ መልኩ መሆኑ እንደሚያሳዝናቸው አመለከቱት ኢንጅነር ይልቃል”ከተፈለገ ታሪካዊ የአባቶቻችንን አሸናፊነት እንደምንደግመው እናሳያለን” ብለዋል። ለሁሉም ግን የውስጥ ችግርን በግልጽነት፣ አገራዊ አጀንዳና ብሄራዊ ምግባባት ሊቀድም እንደሚገባ አመላክተዋል።

ሲፒጄ “ጋዜጠኞች እንዴት የልማት ስጋት ይሆናሉ?” አለ

የጋዜጠኞች መብት ተሟጋች የሆነው ሲፒጄ እየተጋመሰ ባለው ዓመት ብቻ ከሃያ አንድ አገሮች ሃምሳ አምስት ጋዜጠኞች አገር ጥለው መኮብለላቸውን አስታወቀ። ሲፒጄ የስደተኞች ቀንን አስመልክቶ ባሰራጨው መግለጫ እንዳለው ኢትዮጵያ፣ ሶማሊያ፣ ኤርትራ፣ ሶራያና ኢራንን ጋዜጠኞች የሚሰደዱባቸው ግንባር ቀደም አገራት አድርጎ አስቀምጧቸዋል።

ለቪኦኤ ማብራሪያ የሰጡት የሲፒጄ ሰው “ሩዋንዳ የፕሬስ ነጻነት ቅንጦት ነው” በማለት የኢትዮጵያንና የዩጋንዳን መንገድ መከተሏል አውግዘዋል።

“ጋዜጠኞች እንዴት የልማትና የዴሞክራሲ ስጋት ይሆናሉ” በማለት የሚተይቁት የሲፒጄ ሰው፣ ተጠያቂነት ባልሰፈነበት አገር ልማት ሊታሰብ እንደማይችል አመልክተዋል። በማያያዝም ጋዜጠኞች ልማትንና ዴሞክራሲን ከማሳደግ አኳያ የሚጫወቱት ሚና በሁሉም አቅጣጫ ተቀባይነት ሊኖረው እንደሚገባ አመልክተዋል።

ከህገወጥ የቤት ምዝገባ ጋር በተያያዘ 79 ሰዎች ተከሰሱ

ከ20 /80 እና ከ 10/90 የቤት ፕሮግራም ምዝገባ ጋር በተያያዘ ህገ ወጥ ተግባር ፈጽመዋል በሚል ተጠርጥረው 79 ግለሰቦች ክስ ተመሰረተባቸው፡፡ የአዲስ አበባ ቤቶች ልማት እና አስተዳደር ኤጀንሲ ዋና ስራ አስከያጅ አቶ መስፍን መንግስቱ ለፋና ብሮድካስቲንግ ኮርፖሬት እንዳሉት፤ ግለሰቦቹ የተከሰሱት ሃሰተኛ መታወቂያ ይዘው በመገኘታቸውና፤ባለትዳር ሆነው ሳለ ባል በመስሪያ ቤቱ ሲመዘገብ ሚስት ደግሞ በወረዳ ምዝገባ ሲያካሂዱ ስለተደረሰባቸው ነው።

ከነዚህ ተጠርጣሪዎች መካከልም 4ቱ ከ 3 ወር እስከ 1 አመት በሚደርስ እስራት ተቀጥተዋል። የቀሪዎቹ ተጠርጣሪዎች የክስ ሂደት የቀጠለ ሲሆን ዋና ስራ አሲከያጁ የከተማው ነዋሪ የተፈጠረለትን መልካም እድል በእንዲህ አይነት ህገ ወጥ ተግባር እንዳይደናቀፍበት ከኤጀንሲው ጎን በመቆም ማጋለጥ ይኖርበታል ብለዋል፡፡ (አዲስ አበባ ፣ ሰኔ 16 ፣ 2005፤ ኤፍ ቢ ሲ)

የግብጽ አምባሳደር ከኢትዮጵያ ህዝብ ጎን ነን አሉ

የህዳሴ ኤሌክትሪክ ኃይል ማመንጫ ግድብ በተቀመጠለት አቅጣጫ መሰረት እየተገነባ እንደሆነ በስፍራው ጉብኝት ያደረጉ በኢትዮጵያ የሚገኙ የናይል ተፋሰስ የትብብር ጅማሮ አባል ሀገራት አምባሰደሮች ገለፁ፡፡

አምባሰደሮቹ ስለ ግድቡ ግንባታ በአንዳንድ መገናኛ ብዙኃን የሚነገሩ ጉዳዮችም የተሳሳቱ መሆናቸውን ገልፀዋል፡፡የአባይ ወንዝ ተፈጥሮአዊ የፍሰት አቅጣጫ በጊዝያዊነት በማስቀየር ከዚያም ወደ ተፈጥሮአዊ ፍሰቱ እንዲቀላቀል በማደረግ የቀጠለው የታላቁ የኢትዮጵያ ህዳሴ ኤሌክትሪክ ሃይል ማመንጫ ግድብ የዋናው የኮንክሪት ግንባታ ቀጥሏል፡፡

በኢትዮጵያ የሚገኙ የናይል ተፋሰስ ሀገራት የትብብር ጅማሮ አባል ሀገራት አምባሳደሮች እና ዲፕሎማቶች ግድቡ የደረሰበትን የግንባታ ደረጃ እና ወቅታዊ ሁኔታው በቦታው ተገኝተው ጎብኝተዋል፡፡ በኢትዮጵያ የታንዛንያ አምባሳደር ጆራም ሙካማ ቢስዋሮ እና የኬንያ አምባሳደር ዶክተር ሞኒካ ጁማ የሚከተለውን ብለዋል፡፡”ማየት ማመን ነው አየንና አመንን አንደኛ በእውነትም ፕሮጀክቱ እውን እየሆነ ነው፡፡ በእቅዱ መሰረት እየተሰራ ነው፡፡ ሁለተኛ በአንዳንድ ሚድያዎች የሚሰጠው መረጃ የተሳሳተ መሆኑን አረጋግጠናል፡፡ የወንዙን አቅጣጫ የማስቀየርና የግንባታ ሂደቱ በወንዙ ፍሰት ላይ ምንም ያመጣወ ለውጥ የለም፡፡””ይህ ለአከባብያችን፣ለኢትዮጵያ ብሎም ለመላው አፍሪካ ድል ነው፡፡ በአውነት ይህንን ፕሮጀክት ያሰቡ እና እውን እያደረጉ ያሉት ሰዎችን ማድነቅ እፈልጋለሁ፡፡”

“ይሄ ግድብ የአፍሪካ የህዳሴ መንፈስን የያዘ ፕሮጀክት ነው፡፡ ስራውም በተቀላጠፈ መልኩ እየሄደ ነው፡፡ እናም እንዳየነው ውሃው አሁንም ወደ ታችኞቹ ተፋሰሰ ሀገራት እየፈሰሰ ነው፡፡ ለሜትሮች ብቻ ነው አቅጣጫው የቀየረው ይሄ በምንም መልኩ ሊያሳስብ የሚገባ ነገር አይደለም፡፡”

በኢትዮጵያ የሱዳን አምባሳደር በበኩላቸው”ሱዳን ለዚህ ፐሮጀክት ሙሉ ድጋፍ አላት፡፡ ምክንያቱም ግድቡ ለአከባብያዊ በተለይ ደግሞ ለግብፅና ሱዳን ከፍተኛ ጥቅም እንዳለው ስለምናምን ነው፡፡ በፕሮጀክቱ ላይ ከፍተኛ ስራ መሰራቱም ተገነዝቤለሁ”ብለዋል፡፡

በኢትዮጵያ የግብፅ አምባሳደር ሞሃመድ እድሪስ በበኩላቸው”ለኢትዮያውያን እህትና ወንድሞቼ መግለፅ የምፈልገው እኛ ግብፃውያን ከኢትዮጵያ ልማት ጎን መሆናችን ነው ፡፡ በጋራ ተጠቃሚነት ላይ ተመስርቶ የመጣን መንኛውንም ፕሮጀክት እንደግፋለን”ብለዋል፡፡

በምስራቅ አፍሪካ እያደገ ያለውን የሀይል እጥረት በመፍታት ረገድ የህዳሴወ ግደብ ከፍተኛ አቅም ይሆናል ያሉት ደግሞ በኢትዮጵያ የዩጋንዳ አምባሳደር ሙል ካቴንዴ ፤”በአብዛኛው የአከባብያችን ሀገራት የሃይል ፍላጎት በ3 በመቶ በየወሩ እያደገ ነው፡፡ ለምሳሌ 200 ሜጋ ዋት የሚያመነጭ ግድብ ብትገነባ በየጊዜወ ግድብ ስትገነባ መኖር ነው፡፡ ይሄ ባለ 6 ሺ ሜጋ ዋት ግድብ ግን ለቀጣናው የሀይል ፍላጎት ትልቅ እፎይታን ነው ይዞ የሚመጣው፡፡” ማለታቸውን የኢትዮጵያ ቴሌቪዥን ዘግቧል ፡፡ (አዲስ አበባ ፣ ሰኔ 16 ፣ 2005፤ ኤፍ ቢ ሲ)