ሽብርተኛ ከሳሹ ሽብርተኛው የወያኔ መንግስት

የመጨረሻ ግባቸው የእስልምናን መንግስት ማቆም ነው ብሎ የወያኔ አስተዳደር ያቀረበውን የተቀነባበረ ፊልም ( ጃሃዳዊ ሐረካ) በመደነቅ አየሁት። ወያኔ ማለቴ እስካሁን እራሱን ነጣ አውጪ እያለ የሚጠራው የትግራይ ቡድን ኢሃድግ የሚል ማወናበጃ ስም በመረከቡ ነው፡

የተሰጠው መረጃ ውሸት ለመሆኑ ተጨባጭ ማስረጃ ማቅረብ ባልችልም የመረጃ አቅራቢው ውሸታምነት በመረጃ በማስደገፍ ለማቅረብ እሞክራለሁ።

መረጃቸውን በቴሌቭዥን የሚያቀርቡት አማን አሰፋ፣ አቡበከር አህመድ፣ ከሚል ሸምሱ፣ያሲን ኑሩ፣ ሙፍቲ አህመድ … የሚዘረዝሩት ታሪክ ወያኔ ራሱ ጥፎ ያቀረበላቸው ሊሆን እንደሚችል መገመት አያዳግትም። ከዚህ በፊት እነ ብርትኳን ሚደቅሳ፣ ፐርፌሰር መስፍን፤ ዶ/ር ያዕቆብ… ታላላቅ ልናከብራቸው የሚገቡ ጋዜጠኞች እንደነ እስክንድር ነጋ የመሳሰሉ ሁሉ በሽብርተኛነት በመታሰራቸው፤ ወያኔ የሚቃወመውን ሁሉ ያለህግ ለማጥፋት ሲያስብ ይህንን ውንጀላ መጠቀም ከጀመረ ውሎ በማደሩ ይህኛውም ውንጀላ ከዚህ ያልተለየ እንደሚሆን ጥርጥር የለኝም፡ ከሳሽ ፈራጅና ቀጪም ወያኔ ራሱ ነው አቀነባባሪውም የብሄራዊ መረጃ አገልግሎት ነው። በአገሪቱ ውስጥም የሕግ የበላይነት ባለመኖሩ ሁኔታውን መርምሮ ለሕዝብ ማቅረብም አይቻልም። የጸረ ሽብርተኛ ሕግ በማለት ወያኔ ከወነጀላቸው ጋር (ያለምንምንም መረጃ) ግኑኝነት ማድረግ ከ 10 እስከ 15 ዓመት ያስቀጣል ይላል።

ያወጣውን ሕገ መንግስት በመናድ ተወዳዳሪ የሌለው ወያኔ፤ በራሱ ሕገመንግስትና ባለራዕዩ መሪ ደጋግመው ፊልሙም ላይ እንዳስረዱት መንግስት በሃይማኖት ጣልቃ አይገባም እየተባለ ቢደሰኩርም በክርስቲያኑም ሆነ በእስልምናው ሃይማኖት ገብተው ሲፈተፍቱ እናያለን።

በክርስትናው ሃይማኖት ጳጳሱን ከአገር አባረው የራሳቸው ቢሾሙም ተሿሚው ከዚህ ዓለም በሞት ቢለዩም ሌላ ጳጳስ ለወያኔ የሚያጎበድድ እስኪገኝ ሽር ጉድ እየተባለ ነው፡ “ አባይ ጸሐዬም የቀድሞውን ጳጳስ ማምጣት መንግስቱን እንደማምጣት ነው” ይህ አባባል ከመንግስት ተወካይ የተሰጠ ነው!! ሌላው የወያኔ ቁንጮ ሽማግሌው ስብሃት ነጋ “ የአማራና የክርስትያን አገዛዝ ቀብረነዋል ብሏል” እነዚህን መረጃዎች ይዘን መንግስት በሃይማኖት ጣልቃ አይገባም ማለት የዋህነት ነው።

የአዲሱን የኢትዮጵያ ኦርቶዶክስ ተዋህዶ ቤተክርስትያን የጳጳስ ምርጫ ካጤነው ስለመንግስት ያለንን ግንዛቤ ያጠናክርልናል።

መንግስት ሰለሚሰራቸው የፊልም መረጃዎች ለመጥቀስ

በሐውዜን (ረቡዕ june 1988) እንጀምር ፤ ይህ ጭፍጨፋ ሲካሄድ ወያኔ ለፖለቲካ ትርፍ ሲል ወገኔ የሚላቸውን የትግራይን ሕዝቦች፤ ከከተማ እንዳይወጡ መውጫውን ዘግቶ፤ ለደርግ ቀኑን አስታውቆ ለፊልም ቀረጻ ያዘጋጃቸውን ፊልም ቀራጮች ቁልፍ ቦታ ካስያዘ በሗላ የደረሰውን የቦምብ ድብደባ በዕለቱ ከሱዳን እንዲተላለፍ አድርጓል።

ሁለተኛው ድራማ አኬልዳማ የተሰኘው ነው (2011)፡ ( አኬልዳማ በደም የተበከለ ምድር ማለት ነው) የቃሉን መሰረት ወንጌል ላይ የሐዋርያት ስራና ማቴዎስ ወንጌል ላይ ይመልከቱ፡ ወያኔ ግን ይህንን ፊልም የሰራው አንዳንድ የፖለቲካ ተቀናቃኞቹን እስር ለመክተትና ህገወጥ ድርጊቱን ሕጋዊ ልብስ ለማልበስ ነው።-….የኦነግ የሽብር ቅጣት በበደኖ 1984፣ በሐረር የወያኔ አካል በነበረው የኦሮሞ ተገንጣይ ቡድን አማራው ላይ ጭፍጨፋ ሲያካሄድ፣ እርጉዝ ሴቶች ከነሕይወታቸው ሆዳቸው እየተቀደደ ሽሉ ሲወጣና ከዚያም በሗላ በአሰቃቂ ሁኔታ ሲገደሉ መመሪያ ሲሰጥና ፊልም ሲያነሳ ከርሞ፤ ያንኑ ፊልም ከዓመታት በሓላ አሸባሪዎች እንዲህ አደረጉ ብሎ አሳይቶናል። ከዚህ ትያትር በሗላ እነ አርቲስት ደበበ እሸቱ፣ አቶ ስለሺ ሃጎስ….በሽብርተኝነት ተፈርጀዋል። አቶ ዲማ ነገኦም የግዜው የኦነግ መሪ ስለበደኖ ጉዳይ ገለልተኛ ምርመራ እንዳይካሄድ ወያኔ መከልከሉን አሳውቀዋል። ( ሽግግር ምክር ቤት ጉዳዩ ተነስቶ ኦነግ እንዲጣራ ቢጠይቅም ጉዳዩ እንዳይጣራ ወያኔ ከለከለ ይላሉ) አርሲ እስላሞች ክርስታያኖችን ጨፈጨፉ ብሎ በቀረበው ዜና የእስላም ሽርጥ ያሸረጡ የወያኔ ወታደሮች ክርስትኖችን እያሳደዱ ሲገድሉ ታይተዋል ከሞቱትም ላይ የወያኔ የፖሊስ መታወቂያ ከኪሳቸው ተገኝቷል፡

ወያኔ ከ424 በላይ የተማሩ አኙዋኮችን መሬታችን እየተዘረፈ ለውጭ ሰዎች መቸብቸብ የለበትም ስለ አሉ ለአረብና ለሕንድ መሬቱን ለመቸብቸብ አይመቹኝም ሌላውንም ያስነሱብናል በሚል ያደረገባቸውን ጭፍጨፋ መረጃው በጄኖሳይድ ዎች እጅ ይገኛል፤ ይህን ያህል ሽብር የፈጠረ ሽብርተኛ ከወያኔ በስተቀር ኢትዮጵያ ውስጥ ሌላ ቡድን የለም።

በማንኛውም መመዘኛ በመንግስት ደረጃ ስልጣን ይዞ ሰላማዊ ሕዝብን እንደ እንስሳ ካልተገዛችሁልኝ የሚል ሽብርተኛ መንግሰት፤ የራሱን ወገን አንዱን ጎሳ ከሌላው ጎሳ በፖሊሲ የሚያጋጭ፣ ያ ሳይሳካ ሲቀር አሁን ደግሞ በሃይማኖት ሊያተራምስ የተቀመጠ መንግሰት ነው፤ ለስልጣኑ እስከተመቸው ድረስ ማንኛውንም ወንጀል ከመስራት ወደሗላ የሚል መንግስትም አይደለም።

መልዕክቴ መንግስት በሚያሰራጨው ከአሉባልታ ያልተሻለ መርዘኛ ዜና እርስ በርስ ልንጠራጠር አይገባም። መታገል ያለብን ይህንን ሽብርተኛ መንግስት ለማስወገድ ስለሆነ፤ በዘር፣በጎሳ በሃይማኖት…ልንከፋፈል አይገባም፤ ኢትዮጵያችን ሁላችንንም ልታስተናግድ የምትችልና ስታስተናግድም የኖረጭ አገር ናት።

ታዛቢው

ከሆላንድ