በስታሊን ገብረሥላሴ በአሜሪካ የሕግ እርምጃ እንዲወሰድ ጥሪ ቀረበ

• ዛራ ሚዲያ እንዲታገድ እና የዲጂታል ገጾች ለዩኤስ ባለሥልጣናት ሪፖርት እንዲደረጉ ጥሪ ቀረበ

በዩናይትድ ስቴትስ የሚኖረው ማህበራዊ ሚዲያ ተንታኝ ስታሊን ገብረሥላሴ በሰጠው አወዛጋቢ አስተያየት ሳቢያ ከፍተኛ የህዝብ ተቃውሞ የተቀሰቀሰ ሲሆን፤ በአለም አቀፍ አቪዬሽን ደህንነት ላይ የተደቀነውን ስጋት ተከትሎ የዩኤስ የፌደራል የህግ አስከባሪ አካላት ጣልቃ እንዲገቡ አስቸኳይ ጥሪዎች እየቀረቡ ነው።

ስታሊን ገብረሥላሴ በፌስቡክ ገጹ ባሰፈረው መልዕክት የኮምቦልቻ እና የባህር ዳር አውሮፕላን ማረፊያዎች መመታታቸውን እንዲሁም በደብረዘይት በኩል ከባድ ኢላማ መገኘቱን ጠቅሷል። በመቀጠልም ቦሌ በረራ ሊቋረጥ የትብብር ኃይሎች ማስጠንቀቂያ ሊሰጡ ይችላሉ የሚል እጅግ አሳሳቢ መልዕክት አስፍሯል።

በየአመቱ በሚሊዮን የሚቆጠሩ ሲቪል መንገደኞችን የሚያስተናግደው የአዲስ አበባ ቦሌ አለም አቀፍ አውሮፕላን ማረፊያ የበረራ መቋረጥ ስጋት ሊደቀንበት እንደሚችል መገለጹ በማህበራዊ ሚዲያ ላይ ፈጣን ውግዘትን አስከትሏል። በርካታ ጉዳዩ ያሳሰባቸው ዜጎች ንግግሩ አደገኛ መሆኑን የገለጹ ሲሆን፤ አስተያየት ሰጪዎች ድርጊቱን እብደት ሲሉ ኮንነውታል። ሲቪል የአቪዬሽን መሰረተ ልማቶች በማንኛውም የፖለቲካ ግጭት ውስጥ ለፖለቲካዊ ዓላማዎች መጠቀሚያ ወይም የጥቃት ኢላማ መሆን እንደሌለባቸውም አጥብቀው አሳስበዋል።

ታዛቢዎችና የማኅበረሰብ ተሟጋቾች እንደሚያመለክቱት ስታሊን ገብረሥላሴ የትህነግ ቀናተኛ ደጋፊ ሲሆን፤ ቡድኑን ወደ ስልጣን ለመመለስ ጠንክሮ እየሠራ ይገኛል። ቀደም ሲል በኔ ትውልድ ኢትዮጵያ ስትፈርስ በማየቴ በጣም ደስተኛ ነኝ በማለት የተናገረውን ጨምሮ ያለፉት አፍራሽ ንግግሮቹ በብዙዎች ዘንድ በድጋሚ ተጠቃሽ ሆነዋል።

ይህ ህዝባዊ ቁጣ አሁን ላይ ወደ ህጋዊ ተጠያቂነት ጥያቄ ሊቀየር ይገባል የሚል ጥያቄ እየቀረበ መሆኑን ጎልጉል ለመረዳት ችሏል። ስታሊን ገብረሥላሴ የሚኖረው በአሜሪካ በመሆኑ፤ ንግግሮቹ የአለም አቀፍ የመጓጓዣ ደህንነትን እና የሀገር ደህንነትን በሚመለከቱ የዩኤስ አሜሪካ የፌደራል ህጎች ስር የሚወድቁ መሆኑን የህግ ተሟጋቾች ለጎልጉል ገልጸዋል።

በአሜሪካ የፌደራል ህግ መሰረት በአለም አቀፍ የትራንስፖርት ማዕከላት ላይ ስጋት መፍጠር፣ ጥቃት እንዲሰነዘር መቀስቀስ ወይም አገልግሎትን ማስተጓጎል ከባድ የወንጀል ጥፋቶች ናቸው።

በተለይም ጎልጉል ያነጋገራቸው የህግ ባለሙያ በዓለም አቀፍ የሲቪል አቪዬሽን አውሮፕላን ማረፊያ ላይ ጥቃት መሰንዘርን ወይም አገልግሎትን ማስተጓጎልን በፌደራል ወንጀልነት የሚቀጣውን 18 U.S. Code § 37 ይጠቅሳሉ። በተጨማሪም 49 U.S. Code § 46507 የአውሮፕላን ደህንነትን አደጋ ላይ የሚጥሉ ዛቻዎችን ወይም የሀሰት መረጃዎችን ሆን ብሎ ማሰራጨት ከፍተኛ የገንዘብ ቅጣት እና እስከ አምስት ዓመት በሚደርስ እስራት እንደሚያስቀጣ ይደነግጋል ብለዋል።

መስከረም 16 ቀን 2019 ዓም (ሴፕቴምበር 23 ቀን 2026) በኢትዮጵያ የአሜሪካ አምባሳደር ኤርቪን ጄ. ማሲንጋ በአዲስ አበባ ከሚገኘው የዩኤስ ኤምባሲ ባወጡት ይፋዊ መግለጫ ትህነግ የከፈተውን አዲስ ወታደራዊ ጥቃት አጥብቀው አውግዘዋል። አምባሳደር ማሲንጋ በቅርቡ በትግራይ እና በአፋር ክልሎች የተቀሰቀሰውን ግጭት “ልታሸንፉት የማትችሉት ውጊያ” ሲሉ ገልጸውታል።

የአሜሪካ መንግሥት ትህነግ “ሊያሸንፈው የማይችለውን” ከንቱ ጦርነት መጀመሩን በጥብቅ ኮነነ

በኤምባሲው ይፋዊ መግለጫ ላይ አሜሪካ በዚህ ዓመት መጀመሪያ ላይ ማዕቀብ የጣለችበት የትህነግ አመራር ሰፊ ጥቃት ለመሰንዘር የወሰደውን መጥፎ ውሳኔ ህገወጥነት በመግለጽ ኮንነዋል። አምባሳደሩ በፕሬዝዳንት ኦባሳንጆ መሪነት በአፍሪካ ህብረት የተደገፈውን ውይይት ውድቅ ማድረግ ለህዝቡ የሚጠቅመው ነገር የለም ካሉ በኋላ፤ አሜሪካ ኢትዮጵያን ወደ ተሳሳተ መንገድ ለመግፋት በሚሞክሩ ተጨማሪ መሪዎች ላይ ማዕቀብ ለመጣል የሚያስችሉ መሳሪያዎች ያሏት መሆኑን አስታውቀዋል።

በዋሽንግተን ዲሲ የሚገኘው የኢትዮጵያ ኤምባሲ እንዲሁም ጉዳዩ የሚያሳስባቸው ዜጎች ይህንን ሁኔታ ለአሜሪካ ባለስልጣናት በይፋ ማሳወቅ እንዳለባቸው ጎልጉል ጥሪ እያቀረበ ነው። ከህግ ተጠያቂነት ጎን ለጎን የስታሊን ገብረሥላሴ የግል የማህበራዊ ሚዲያ አካውንቶች በአስቸኳይ ታግደው ለገጾቹ አስተዳዳሪዎች ሪፖርት መደረግ እንዳለባቸው ጎልጉል አጥብቆ ያሳስባል። በተጨማሪም የስታሊን የቅስቀሳ ማዕከል የሆነው ዛራ (Zara) የተባለው የሚዲያ ገጽ በህዝብ መሰረተ ልማቶች ላይ ስጋት ለሚፈጥሩ አደገኛ ንግግሮች ድምጽ በመሆኑ፤ ሙሉ በሙሉ እንዲታገድ እና ሪፖርት እንዲደረግ ይህ ጎልጉል ጨምሮ ያሳስባል።

መልዕክቱ በቀጥታ ለኢሚግሬሽን እና ጉምሩክ አስከባሪ (ICE) እና ለፌደራል ምርመራ ቢሮ (FBI) ሪፖርት እንዲደረግና ከአለም አቀፍ የህዝብ ደህንነት አንጻር አስፈላጊው ምርመራ እንዲካሄድበት የተቀናጀ ጥረት እንደሚያስፈልግ አጽንኦት ሊሰጠው እንደሚገባው ተመልክቷል።

ጎልጉል የድረገጽ ጋዜጣ