የትህነግ፣ የሻዕቢያ፣ የአገው ሸንጎ እና የፋኖ ጥምረት በሰቆጣና አብዓላ ግንባሮች ተደመሰሰ

* ወደ ኋላ መመለሻ ድልድያቸው ተሰብሯል

በትህነግ፣ በሻዕቢያ፣ በአገው ሸንጎ እና በፋኖ መካከል የተመሠረተው የጥፋት ኃይሎች ጥምረት በሰቆጣ እና በአብዓላ ግንባሮች በከፈተው መጠነ-ሰፊ ማጥቃት በሀገር መከላከያ ሠራዊት ላይ የገጠመውን ሽንፈት ተከትሎ፣ ሙሉ በሙሉ የመበታተንና የመደምሰስ አደጋ እንደተጋረጠበት ለጎልጉል የደረሱ የውስጥ ምንጮችና ወታደራዊ ተንታኞች ገለጹ።

ከግንባር ለጎልጉል የደረሱ መረጃዎች እንደሚያመለክቱት፣ በጥምረቱ ስም በሚንቀሳቀሱት የትህነግ አርሚ 22 እና አርሚ 92 የጦር ክፍሎች እጅግ ከባድ የሰው ኃይልና የቁሳቁስ ኪሳራ ደርሷል።

ትህነግ በድሮን ፍርሃቻ ጥንት በበረኻ እያለ ሲደርግ እንደለመደው በአህያ እና በግመል በብዙ መከራ ያጠራቀመው መሣሪያና ቁሳቁስ ነው በሰሞኑ ጥቃት እንዳለ የወደመበት።

በዋግኸምራ ዞን የምትገኘውን ሰቆጣ ከተማን ለመቆጣጠር በከፍተኛ ጉራና የቅድመ-ዝግጅት ስብስብ አሰፍስፎ የመጣው ይኸው የትህነግ፣ የሻዕቢያ፣ የአገው ሸንጎ እና የፋኖ ጥምረት በማይበገረው የሀገር መከላከያ ሠራዊት እና በጀግናው 13ኛው እዝ አይቀጡ ቅጣት ተቀጥቷል።

በቅርቡ ተመሠረተ በተባለው የሰባት ታጣቂ ቡድኖች ስብስብ የአገው ሸንጎ በይፋ ስሙ ባይጠራም በትህነግ ትዕዛዝ ታጣቂውን አሰማርቶ ይገኛል።  

ላለፉት ሦስት ቀናት በዛታ ወረዳ አድርጎ ወደ ሰቆጣ ለመግባት ውጊያ ሲያደርግ የነበረው የጥምረቱ አርሚ 22 ታጣቂ ቡድን፣ በመከላከያ ሠራዊቱ ብርቱ ክንድ ተመትቶ በመበታተን ላይ ይገኛል። ከተመታው የጥምረቱ ኃይል የተረፉት ታጣቂዎች ወደ ኮረም አቅጣጫ ለመፈርጠጥ የሞከሩ ቢሆንም፣ አሁንም በሰቆጣ ዙሪያ ፍጹም ተስፋ በቆረጠ ሁኔታ ከፍተኛ ውጊያ እያደረጉ መሆኑ ተጠቁሟል።

የጎልጉል የውስጥ ምንጮች እንዳረጋገጡት፣ የመጣው ወራሪ የጥምረት ኃይል እንደ ቅጠል ረግፎ ወደ ኋላ እየፈረጠጠ ሲሆን፣ የተረፈውም የጥራሪ ወንዝ እራት ሆኗል። የቀረውም የጥምረቱ ታጣቂ በየጢሻው እየገባ በመሸሸግ ላይ ይገኛል።

ለዚህ ጥምረት ትልቁ መርዶ የሆነው ግን ታጣቂዎቹ ወደ ኋላ የሚያፈገፍጉበት እና የሚመለሱበት ድልድይ አሁን ሙሉ በሙሉ የተሰበረ መሆኑ ነው። በመሆኑም በአሁኑ ወቅት በሰቆጣ ምድር ለተከበበው የጠላት ኃይል የቀረው ምርጫ ሁለት ብቻ ነው፤ እርሱም እጅ መስጠት ካልሆነም ሙሉ በሙሉ መደምሰስ!

በተመሳሳይ በአብዓላ አቅጣጫ በጥምረቱ አርሚ 92 ላይ የተከፈተው ውጊያ እስከ አመሻሽ ድረስ የቀጠለ ሲሆን፣ በመከላከያ የእግረኛ ጦር በተሰነዘረ ጥቃት የጠላት ኃይል ክፉኛ ተመትቷል። ውጊያውን ተከትሎ በሚግ (Mig) ተዋጊ ጄቶችና በድሮን የተደገፈው ድንገተኛ የአየር ጥቃት በጥምረቱ ይዞታ ላይ ከባድ ውድመት አስከትሏል።

በዚህ የአየር ድብደባ የጥምረቱ ሁለት የዙ-23 ፀረ-አውሮፕላን መሣሪያዎችና አንዲት ብረት ለበስ ታንክ ሙሉ በሙሉ ተቃጥለው ከጥቅም ውጭ መሆናቸውን ምንጮቻችን አረጋግጠዋል። ዛሬም በአብዓላ አካባቢ የተጀመረውን ማጥቃት በመቀጠል ሙሉ ቁጥጥር ለማድረግ ሠራዊቱ እየገሰገሰ መሆኑ ታውቋል።

ይህንን ወቅታዊ ወታደራዊ ሽንፈት አስመልክቶ አንድ ስማቸው እንዳይጠቀስ የፈለጉ ወታደራዊ ተንታኝ ለጎልጉል እንደተናገሩት፣ “እስካሁን ባለው ሁኔታ የሀገር መከላከያ ሠራዊት በማጥቃት ሳይሆን በመከላከል ስልት ላይ ሆኖ ነው ይህንን ያህል ግዙፍ ጉዳት በጥምረቱ ላይ ያደረሰው” ብለዋል።

ተንታኙ አክለውም፣ ትህነግና ተባባሪዎቹ በመከላከል መስመር ላይ በነበረው ሠራዊት ይህንን ያህል ከፍተኛ የሰውና የቁሳቁስ ውድመት ከደረሰባቸው፣ መከላከያ ሠራዊቱ በሙሉ ኃይሉ ወደ ማጥቃት ሲሸጋገር የቡድኑ ዕጣ ፈንታ ምን ሊሆን እንደሚችል ለመገመት እንደማያዳግትና ከሚጠበቀው በላይ እጅግ ከፍተኛ ጉዳት እንደሚደርስባቸው አብራርተዋል።

ጎልጉል የድረገጽ ጋዜጣ