ወግድልኝ ወዲያ!

አሥራደው (ከፈረንሳይ)

ሲጭኑህ አጋሰስ፤
ሲጋልቡህ ፈረስ፤
ጠምደው ሲያርሱህ በሬ _ _ _
ስትታለብ ጥገት፤
በቁም ሲያርዱህ ሙክት፤
ሲጣልልህ ውሻ – የጅ ዕባሽ ናፋቂ፤
እዳሪ ለሆዱ – ክብሩን አስነጣቂ፤
ጫንቃህ የደለበ – ለመሸከም ቀንበር፤
እንቢኝን የማታውቅ – ከእሽታ በቀር፤
እንዳህያ ጭነት – ሸክም ያስለመዱህ፤
ሲገፉት ነፃነት – የማይበርደው ገላህ፤
አጎንባሽ ለመጣው – የሞትክ ነህ በቁም፤
ወግድልኝ ወዲያ ጭራሽ አላውቅህም!
እንዳንተ ያለውን አገሬ አትናፍቅም::

የአያት የቅድም አያት – ጀግንነቱ ቀርቶ፤
ሽለላ፤ ፉከራው – ዕምቢልታ ቀረርቶ፤
በጦር ደረት መብሳት – በጋሻ መክቶ፤
አሻፈረኝ ማለት – ለበደል ለጥቃት፤
በጀግንነት መሞት – ላገር ለነፃነት፤
መሆኑ ቀረና፤
የጀግና ልጅ ጀግና፤
ሰብዕናህ ተገፎ – ዝቅ ብለህ ወደታች፤
ባይተዋር ያገሩ – የበይ ተመልካች፤
ውሎ ጦም አዳሪ – የሃብቱ ተመጽዋች፤
እራስክን ዝቅ አርገህ – ክብርህን ያዋረድክ፤
የት ቦታ ተዘርህ አገሬ ላይ በቀልክ?!
ወግድልኝ ወዲያ ጭራሽ አላውቅህም!
ለወለደህ ዕዳ ላገርህ ነህ ሸክም፡፡

ንቀት ብርድልብስህ፤
ውርደት ሆኖ አንሶላህ፤
ነፃነት ሲገፉህ – ዝም ብለህ የተኛህ፤
ጭቆና ተስማምቶ – የማይቆረቁርህ፤
በደል የተመቸህ – ጥላቻ እማይገባህ፤
ዕንቢኝን የማታውቅ – እሺን ያስለመዱህ፤
ኧረ ለመሆኑ ከወዴት ተገኘህ ?!
የቱ አባት አግኝቷት – ከምን ጉድ ጸነሰች፤
የቷ እናት አምጣ – ከቶ አንተን ወለደች?!
እንዳንተ ያለውን ወልዳ ከምታፍር፤
ምንኛ ደስ ባላት – ጨንግፈህ ብትቀር?!
አላውቅህም ጭራሽ ወግድልኝ ወዲያ!
እንዳንተ ያለውን አትሻም ኢትዮጵያ !!

መስከረም 4 ቀን 2005 ዓ.ም ( September 14/2012)