ግልጽ ደብዳቤ ለኢትዮጵያ ካቶሊካዊት ቤተ ክርስቲያን ሊቀ ጳጳሳት

እጅግ ለተከበሩ ለብፁዕ አቡነ ብርሃነ-ኢየሱስ ደምረው ሱራፌል
የኢትዮጵያ ካቶሊካዊት ቤተ ክርስቲያን ሊቀ ጳጳሳት፤
የኢትዮጵያ ጳጳሳት ጉባኤ ፕሬዚዳንትና
የምሥራቅ አፍሪካ የካቶሊክ ቤ/ክ ማሕበር ሊቀ መንበር፤
አዲስ አበባ፤
ኢትዮጵያ።

በመጀመሪያ፤ ለብፁዕነትዎ የሚገባ እጅግ ከፍ ያለ የአክብሮት ሰላምታ አቀርባለሁ። በተጨማሪም፤ እንኳን ለብርሃነ ልደቱ በደህና፤ በክብርና በሞገስ አደረሰዎ በማለት መልካም ምኞቴን በትሕትና እገልጻለሁ።

በመቀጠልም፤ ሰሞኑን የ1.228 ቢሊዮን የካቶሊክ እምነት ተከታዮች ባላት የካቶሊክ ቤተ ክርስቲያን፤ እጅግ የተከበሩ ብፁዕ ሊቀ ጳጳሳት (ካርዲናል) ሆነው በመሾምዎ፤ እንኳን ደስ አለዎ በማለት፤ ለዓለም ሰላምና ለክርስቲያን አንድነት የሚያደርጉት ጥረት በቸሩ አምላክ ተራዳኢነት እንዲሳካልዎ ልባዊ ጸሎታችንን በትሕትና እናቀርባለን።

የብፁዕነትዎ በዚህ ከፍ ባለ ደረጃ መሾም፤ ታሪካዊ ክስተት በመሆኑ፤ ኢትዮጵያውያንን በሙሉ የሚያኮራ መሆኑንም እንገነዘባለን። ለሐገራችንም ስለሚያስፈልጋት ፍትሕና ክብር እጅግ ጠቃሚ የሆነ ሚና እንደሚኖረው እናምናለን።

ብፁዕነትዎ እንደሚያውቀው፤ ፋሺሽት ኢጣልያ ኢትዮጵያን በወረረችበት ዘመን አንድ ሚሊዮን ኢትዮጵያውያን ተጨፍጭፈው ነበር። ከነዚሁ ውስጥ፤ በሶስት ቀኖች ብቻ፤ አዲስ አበባ ከተማ፤ 30 000 ሰዎች ተገድለው ነበር። በተጨማሪም፤ 2 000 ቤተ ክርስቲያኖችና 524 000 ቤቶች እንዲሁም 14 ሚሊዮን እንስሳት እንደ ወደሙና እጅግ ብዙ የሐገራችን ንብረቶች እንደ ተዘረፉ የታወቀ ነው። ከተዘረፉት ንብረቶች ውስጥ አሁንም በኢጣልያና በቫቲካን መንግሥቶች ይዞታዎች የሚገኙ አሉ። በቫቲካን ቤተ መጻሕፍት ውስጥ ከ500 በላይ በፋሺሽቱ በቸሩሊ ጭምር የተዘረፉ የኢትዮጵያ ሰነዶች እንደሚገኙ የታወቀ ነው።

በኢትዮጵያ ላይ ለተፈጸመው የጦር ወንጀል፤ በጊዜው በነበሩት ፖፕ ፓየስ 11ኛ ትመረ የነበረው ቫቲካን ከሙሶሊኒና ከፋሺሽቱ አገዛዝ ጋር ተባባሪ የነበረች መሆኑ በታሪክ የተረጋገጠ የማይካድ ሐቅ ነው። ለዚሁም ተጨባጭ ከሆነው ብዙ ማስረጃ ውስጥ፤ በቫቲካንና በሙሶሊኒ መሀል የተፈረመው፤ “ላተራን” የተሰኘው ውል፤ ፖፕ ፓየስ 11ኛ የኢጣልያንን ንጉሣዊ መሪ፤ የኢጣልያ ንጉሥና የኢትዮጵያ ንጉሠ ነገሥት በማለት ፖፕ ፓየስ 11ኛ መባረካቸው፤ አጼ ኃይለ ሥላሴ ለፋሺሽቶች የበላይነት እውቅና እንዲሰጡ አንድ ሚሊዮን ስተርሊንግ ፓውንድ ጉቦ ለመስጠት መሞከሩ፤ የቫቲካን ቤተ ክርስቲያን ጳጳሳትና ካሕናት የፋሺሽቱን የኢትዮጵያ ወረራ ለመርዳት ያላቸውን ጌጣ-ጌጥ ማበርከታቸው፤ ወዘተ. ሊጠቀስ ይቻላል። ሌላም ዝርዝር ማስረጃ ስላለ ያንን ማቅረብ ይቻላል።

ስለዚህ፤ አይሑዶች በናዚ ጀርመኖች ሲጨፈጨፉ፤ ቫቲካን ተቃውሞ ባለማሰማቷ ብቻ በመደጋገም ይቅርታ የጠየቀች መሆኑ ስለሚታወቅ በኢትዮጵያ ላይ የተፈጸመው ግን ቫቲካንና ሙሶሊኒ እጅና ጓንት ሆነው የሠሩ በመሆኑ የኢትዮጵያን ሕዝብ ይቅርታ መጠየቅ ክርስቲያናዊ ተግባር መሆኑ የታወቀ ነው።

በኢትዮጵያ ላይ ለተፈጸመው የጦር ወንጀል ተገቢው ካሣ ሳይከፈል መቅረቱ ለማንኛውም በፍትሕ ለሚያምን ሰው ሁሉ እጅግ አሳሳቢ ጉዳይ መሆኑ የታወቀ ነው። ስለዚህ ድርጅታችን፤ ዓለም አቀፍ ሕብረት ለፍትሕ – የኢትዮጵያ ጉዳይ (Global Alliance for Justice – The Ethiopian Cause) ለሚከተሉት ዓላማዎች እየተንቀሳቀሰ ነው፤

(ሀ) የኢጣልያ መንግሥት ተገቢውን ካሣ ለኢትዮጵያ እንድትከፍል፤

(ለ) ቫቲካን የኢትዮጵያን ሕዝብ ይቅርታ እንድትጠይቅ፤

(ሐ) ኢጣልያና ቫቲካን ከኢትዮጵያ የተዘረፉትን ንብረቶች እንዲመልሱ፤

(መ) የተባበሩት መንግሥታት ድርጅት በኢትዮጵያ ላይ የተፈጸመውን የጦር ወንጀል እንዲመዘግብ፤ እና

(ሠ) በቅርቡ በኢጣልያ፤ አፊሌ በምትሰኝ ከተማ፤ ለፋሺሽቱ ለሮዶልፎ ግራዚያኒ፤ የቫቲካን ተወካይ በተገኙበት የተመረቀው መታሰቢያና መናፈሻ እንዲወገድ።

ስለዚህ፤ ቫቲካን፤ በክርስቲያናዊ አስተሳሰቧና ተግባሯ፤ ፍትሐዊ በሆነ መንገድ፤ የኢትዮጵያን ሕዝብ ይቅርታ በመጠየቅ የተዘረፈውንም ንብረት በመመለስ ለዘመናት የቆየው ቅሬታ እንዲወገድ ተገቢውን እርምጃ እንዲወስድ በመማጸን ለብፁዕ ወቅዱስ አቡነ ፍራንሲስ 1ኛ፤ የካቶሊክ ቤተ ክርስቲያን ፖፕ የጻፍነውን የአቤቱታ ደብዳቤ ከዚህ ጋር አያይዘን አቅርበንልዎታለን። እጅግ የተከበረ ብፁዕነትዎም ለሐገር የሚገባው ክብር እንዲገኝ እንዲረዱ፤ በተሰዉት ኢትዮጵያውያን ስም፤ በታላቅ አክብሮት እናመለክታለን።

ከማክበር ሰላምታ ጋር፤

ኪዳኔ ዓለማየሁ
ዋና ሥራ አስኪያጅ።

ለተከበራችሁ በአውሮፓ አንድነት አባላት ሐገሮች ውስጥ ለምትኖሩ ኢትዮጵያውያንና የኢትዮጵያ ወዳጆች፤

ጉዳዩ፤ ለኢትዮጵያ ስለሚያስፈልገው ፍትሕ፤

በመጀመሪያ፤ በድርጅታችን ስም የማክበር ሰላምታ አቀርባለሁ።

እንደሚታወቀው፤ ፋሺሽት ኢጣልያ፤ በቫቲካን ያልተቆጠበ ድጋፍ፤ በብዙ አውሮፕላኖች በተነሰነሰ የመርዝ ጋዝ፤ በቦምብ፤ በጥይት፤ በስቅላት፤ በአካፋ፤ በዶማ፤ ከአውሮፕላን በመወርወር፤ ወዘተ፤ በመጠቀም አንድ ሚሊዮን ኢትዮጵያውያንን ገድለዋል። ከነዚህ ውስጥ በሶስት ቀኖች ውስጥ፤ በየካቲት 12-14 ቀኖች 1929 ዓ/ም፤ በአዲስ አበባ ብቻ 30 000 ሰዎች ተጨፍጭፈዋል። ከዚህም በላይ 2000 ቤተ ክርስቲያኖች፤ 525000 ቤቶችና 14 ሚሊዮን ያህል እንስሶች ወድመዋል። በጠጨማሪም፤ እጅግ ብዙ ንብረት በፋሺሽቶቹ ተዘርፎ ኢጣልያ ተወስዷል። ከዚሁ ውስጥ 500 የኢትዮጵያ ሰነዶች በቫቲካን ቤተ መጻሕፍት ይገኛሉ። አንድ “ፀሀይ” የተሰኘች አውሮፕላን በኢጣልያ አየር ኃይል ቤተ መዘክር እየታየች ነው።

ኢጣልያ በኢትዮጵያ ላይ ለፈጸመችው ከባድ የጦር ወንጀል በቂ ካሣ አልከፈለችም። እስካሁን የፈጸመችው ክፍያ፤ ቆቃ ግድብ የተሠራበት $25 ሚሊዮን ብቻ ነው። ለሌሎች ሐገሮች ከከፈለችውና ከፈጸመችው አሰቃቂ የጦር ወንጀል ጋር ሲነጻጸር እጅግ አነስተኛና ተቀባይነት የሌለው መሆኑ ግልጽ ነው። በቅርቡ ኢጣልያ ለሊቢያ $5 ቢሊዮን ካሣ ለመክፈል ተስማምታለች። ቀደም ሲልም፤ ለዩጎዝላቪያ $125 ሚሊዮን፤ ለግሪክ ሐገር $105 ሚሊዮን፤ ለሶቭየት ሕብረት $100 ሚሊዮን ለመክፈል ተስማምታ ነበር። ንብረትን በተመለከተ፤ የአክሱምን ሐውልት ከመመለስ ሌላ በኢጣልያኖችም ሆነ በቫቲካን የተከናወነ ጉዳይ የለም። እንዲያውም፤ በእንቅርት ላይ ጆሮ ደግፍ እንደሚባለው፤ በቅርቡ “የኢትዮጵያ ጨፍጫፊ” ለሚባለው ለሮዶልፎ ግራዚያኒ መታሰቢያና መናፈሻ ተሠርቶለት፤ የቫቲካን ተወካይ በተገኙበት ሥነ ሥርዓት ተመርቆለታል።

ስለዚህ፤ ዓለም አቀፍ ሕብረት ለፍትሕ – የኢትዮጵያ ጉዳይ አምስት መሠረታዊ ዓላማዎችን ይዞ፤ በኢትዮጵያውያንና የኢትዮጵያ ወዳጆች ድጋፍ እየተንቀሳቀሰ ነው። እነዚህም፤ (ሀ) የኢጣልያ መንግሥት ለኢትዮጵያ በቂ ካሣ እንዲከፍል፤ (ለ) ቫቲካን የኢትዮጵያን ሕዝብ ይቅርታ እንድትጠይቅ፤ (ሐ) የተዘረፈው ንብረት ለኢትዮጵያ እንዲመለስ፤ (መ) የተባበሩት መንግሥታት ድርጅት በኢጣልያኖች የተፈጸመውን የጦር ወንጀል መዝግቦ እውቅና እንዲሰጥ፤ እና (ሠ) ለግራዚያኒ የተሠራው መታሰቢያ እንዲወገድ፤ ናቸው።

ድርጅታችን ካከናወናቸው ተግባሮች ውስጥ፤ ለኢጣልያ ፕሬዚዳንት፤ ጠቅላይ ሚኒስትርና ለውጭ ጉዳይ ሚኒስትር፤ ለአውሮፓ ምክር ቤት፤ ለተባበሩት መንግሥታት ድርጅት፤ ለአፍሪካ አንድነት ድርጅት፤ ለአሜሪካ ፕሬዚዳንት፤ ለእንግሊዝ ጠቅላይ ሚኒስትር፤ ወዘተ የአቤቱታ ደብዳቤ ጽፏል። በተጨማሪም፤ በድረ-ገጹ  ቫቲካን የኢትዮጵያን ሕዝብ ይቅርታ እንድትጠይቅ የቀረበ አቤቱታ እየተፈረመ ነው። ከ4200 በላይ የሆኑ የ30 ሐገሮች ነዋሪዎች፤ ኢጣልያኖች ጭምር፤ ፈርመውታል። ተጨማሪ ፊርማም እንዲገኝ ጥረት እየተደረገ ነው። ለዚሁ ተግባር የሚረዳም አንድ ቅጽ ተያይዞ ቀርቧል። እንዲሁም በየዓመቱ፤ የየካቲት 12 ክብረ በዓል በዓለም አቀፍ ዙሪያ እየተዘከረ ነው። በዚህም ዓመት፤ አውሮፓ በሚኖሩ ኢትዮጵያውያን በጸሎት፤ በስብሰባ እና/ወይም በሰላማዊ ሰልፍ እንደሚታሰብ ፅኑ ተስፋ አለን።

እስካሁን ከተገኙት መልካም ውጤቶች ውስጥ፤ የግራዚያኒ ኃውልት ለጊዜውም ቢሆን መዘጋቱና የከተማውም ከንቲባ እንዲከሰስ መወሰኑ ሲሆን፤ ይህ ውሳኔ ግን በይግባኝ ክርክር ላይ ስለ ሆነ ጉዳዩ ተቋጨ ማለት አይቻልም። ሌላው አስደሳች ክስተት አንዳንድ የኢጣልያ ዜጎች ለኢትዮጵያ ፍትሕ ጉዳይ አስተዋጽኦ ማድረጋቸው ነው። ለምሳሌ፤ እነቫሌሪዮ ቺሪያቺ ስለ ፋሺሽቱ ግፍ በራሳቸው ወጪ አንድ ፊልም በማዘጋጀት ላይ መሆናቸው እና እነካርሜሎ ክሬሴንቲ ደግሞ ደብረ ሊባኖስ በሚገኘው በፋሺሽቶች የተገደሉት ሰዎች መቃብር ተገቢ የሆነ እንክብካቤ እንዲያገኝ በማከናወን ላይ ስላሉት ተግባር ነው። ሮም ከተማ የሚገኘው ግብረ-ኃይል ላለፈው የካቲት 12 የሰማእታት ቀን መታሰቢያ ዝግጅት ያሰራጨውን መግለጫ ከዚህ ጋር አያይዘን አቅርበናል።

የዚህ ደብዳቤ ዋና ዓላማም፤ ለሐገራችን የሚያስፈልገው ፍትሕ እንዲገኝ ጠንክረን እንድንታገል ለማሳሰብ ሲሆን፤ በተለይ አውሮፓ የሚኖረው ወገን ከዚህ ጋር የተያያዘውን ለአውሮፓ ምክር ቤት ያቀረብነውን የአቤቱታ ደብዳቤና ያገኝነውን መልስ በመመልከትና ጉዳዩ እንዲቋጭ ክትትል የሚያስፈልገው መሆኑን በመገንዘብ፤ በተቻለ መጠን፤ የምክር ቤቱን አባሎች በማነጋገር ተጨባጭ ውጤት እንዲገኝ ያላሰለሰ ጥረት እንዲደረግ እናሳስባለን።

ለኢትዮጵያ ስለሚያስፈልገው ፍትሕ ጠቅለል ባለ ሁኔታ የተዘጋጀ አንድ የአቤቱታ ደብዳቤም ከዚህ ጋር ተያይዞ ቀርቧል።

ስለዚህ በአውሮፓ የሚኖሩ ኢትዮጵያውያንና የኢትዮጵያ ወዳጆች የየካቲት 12ን ክብረ በዓል በሚገባ በመዘከርና የአውሮፓ ምክር ቤት ለኢትዮጵያ ስለሚያስፈልገው ፍትሕ ተገቢውን እርምጃ እንዲወስድ በትጋት እንዲጥሩ በትሕትና እናሳስባለን።

ቸሩ የኢትዮጵያ አምላክ ለውድ ሐገራችን ለኢትዮጵያ ክብርና ፍትሕ ተግተን እንደንሠራ ያበርታን!

ከማክበር ሰላምታ ጋር፤

ኪዳኔ ዓለማየሁ
ዋና ሥራ አስኪያጅ።