የጋዛ ፍልስጥኤማውያን የደም እንባ!

የእስራኤል የ10 ቀናት የአየር ድብደባ ከ220 በላይ ፍልስጥኤማውያን የጋዛ ነዋሪዎች በአሰቃቂ ሁኔታ በሚወሰደው ዘመቻ ነገን ላያዩ መቀጠፋቸውን እየሰማን ነው: (ከአንድ ሽህ በላይ የዘለቁ በጠና የቆሰሉትን እና ከቀያቸው የተፈናቀሉት ዜጎችን መከራ እያየንም ነው። እኒህኞቹን በራሳቸው ሀገር ስደተኛ የሆኑትንማ ፍዳ ማየቱ ከሞቱት በላይ ያማል።

ሰቆቃው በዚህ ቢያቆም መልካም ነበር ፣ ግን አልሆነም ።  በሳምንቱ መጀመሪያ የፍልስጥኤማውያን ሃማስ የጦር ክንፍ ሰው አልባ ሚጢጢ አውሮፕላን Drone …በእስራኤል ሰማይ መስፈንጠሩን አስታወቀ። ይህም የሃማስን የሚሳኤል ሮኬት ውንጨፋ ለወረራው ምክንያት ላደረጉት እስራኤሎች ከስጋት ባለፈ ጥሩ የመልሶ ማጥቂያ ምክንያት ሆነና ነገሮችን ሁሉ በፍጥነት መቀያየር ይዘዋል።

ብቻ …ዛሬ ሃሙስ ለአርብ በደረቁ ሌሊት የደረሰን ሰበር ዜና አስራኤል እግረኛ ጦር ወደ ጋዛ ማሰማራቷን ጠቁሟል። ሃማስም ከእግረኛው ጦር ጋር ፍልሚያው መጀመሩን ከዛቻ ጋር አስታውቋል። የተፈራው አደጋ  የፍጥጫ እልህ ውዝግቡ የፍጻሜ ውጤት አቅጣጫ እዚህ ላይ ደርሷል።  የቦንብ ናዳ  ያላባራባት ጋዛና የጋዛ ነዋሪ በሰማዩ ስር በሃዘን ድባብ ተውጦ ምድር ገሃነብ ሆኖበት ሰንብቷል። የሃማስ ተወንጫፊ ሚሳኤሎች ጎድተው ላይጎዱ በተለያዩ የጽዮኗ ምድር ከመዝነብ  ያቆማቸው የለም። እስካሁን ሞቶ የሰማነው እስራኤላዊ ቁጥር ግን አንድ ብቻ ነው።

እስራኤል  “ነውጠኛ አሸባሪው ሃማስን የማጽዳት ዘመቻ” በማለት በያዘችው ማጥቃት በምክንያትነት ከሚጠቀሱት  ኢላማዎች መካከል እስካሁን ተገደሉ የተባሉ ቁጥር ፣ ከተገደሉት ንጹሃን ጋር ሲወዳደር እዚህ ግባ አይባልም። በዋይታ ይህችን ፍትህ የጎደላት አለም እየተለዩ ያሉት ፍልስጥኤማውያን አቅመ የእድሜ ባለጸጋዎች፣ ህጻናትና አባወራ የቤተሰብ አባላት ናቸው። ይህ ልብን በሃዘን ቆልፎ ይሰብራል  🙁

ከሁሉም የሚዘገንነው በእስራኤል ዘመቻ የተቀጠፉት “ጦር ሰባቂ ፣ ቆስቋሽ ” የሚባሉት የሃማስ ሚሊሻዎች አለመሆናቸው ሲሆን ሚሊሽያ ታጣቂዎች እንደ ዶፍ በሚዘንበው አረር  ኢላማ የገቡ አይመስልም። “ለሃጥአን የመጣ ለጻድቃን ” እንዲሉ  በአዋጅ ነጋሪት ክተት ተብሎ የተዘመተባቸው ሃማሶች ሳይገደሉ ንጹሃን በግፍ እያለቁ ነው። ከሃማስ ሸማቂ በኩል ሞቱ የተባሉት ከቆሰሉት ጋር ቢደመሩ ከሃያ ፈቀቅ ለማለቱ መረጃ አላየሁም። ድብደባውም ሃማስን ሚሊሻዎች ሚሳኤል ከመወንጨፍ አላስቆማቸውም። ይህ ምልክት ያን ሰሞን ” የመከራ ደወል !” ያልኩትን የአደጋ ስጋት ሲያዘክር ዛሬ የስጋቱ ጊዜ አክትሞ መከራ ሰቆቃውን እያየነው ነው።  እየሆነ ያለው አሳዛኙ ውጤት ፍጻሜ ይህ ይመስላል !  ዳሩ ግን ሃማስን ለማንበርከክ የግዛት ክልሉንና የሚያስተዳድረውን ህዝብ በአየርና በምድር ጦር በትምክህት ደፍጥጦ መበቀል ከሆነ ሌላ ነገር ነው።

የሃማስ የጦር ክንፍ መክቶ  ላይመክት ፣ ጎድቶ ላይጎዳ ባስፈነጠራቸው ሮኬቶች ሌላ አደጋ በህዝቡ ላይ እያስከተለ ነው። በአጣብቂኝ ስርቻም ሆኘ በራሪ Drone  ሰራሁ ብሎ ማወጁ ለፍልስጥኤማውያን የፈየደው ወረራውን ማፋጠን ነው። ብቻ ሃማስ ከእስራኤል ጦር ጋር ተፋጦ በሚያደርገው መቆራቆስ የንጹሃን ደም ግብር የማከፈልበት መቸ ለሚመጣው፣  ማን ለሚኖርበት ትንሳኤ እንደሆነ አልገባኝ …

አረቦች ለፍልስጥኤም ግፉአን ወንድሞቻቸው መከታ እንዳይሆኑ በልዩነት ተበታትነዋል።  የአለም መንግስታት በአንጻሩ ይህ መሰሉ ግፍ በጋዛ ፍልስጥኤም ሲፈጸም ዛሬም መሸምገል ገዷቸው ደም ሲፈስ የግፍ ተመልካች ሆነዋል። በሩዋንዳው የጅምላ ጭፍጨፋ እልፍ አእላፍ አልቀው ፣ በትኩሱ ሬሳ ላይ ቆመው ያነቡት የአለም መራሔ መንግስታት  “ይህ ግፍ ፈጽሞ አይደገምም” Never Again ብለው ያፈሰሱት እንባ “የአዞ እንባ” መሆኑን ዛሬም ሆነ ትናንት በጋዛ ፍልጥኤማውያን እየሆነ ባለው “የአዛኝ እንባቸውን” እያየነው ነው: (

የእስራኤልን ዘመቻ ፣ የንጹሃንን እልቂት ፣ የሃማስን ስልት የጎደለው መከላከል በሉት ማጥቃት አልገባህ ብሎኛል። ይህንን ንጹሃን የሚቀጠፉበትን ዘመቻ ለማውገዝ ሰው መሆን ብቻ በቂ ነው። ይህ ሁሉ ውስብስብ ያልሆነ ግን ቅንነት ጠፍቶ የአለም  ማህበረሰብ መፍታት ባልቻሉት ውዝግብ በዚህ ዘመን ይህን ግፍ አለም ማስተናገድ ነበረባት?  ይህ ግልጽ የሃይል ሚዛን እና የተጽዕኖ መፍጠር ጫና  ለፍልስጥኤም ንጹሃን ማለቅና ለአለም ዝምታ መምረጥ ምክንያት አይደለምን ?  ይህስ በራሱ ግፍ አይደለምን ? ግልጽ የሚታየው እንቆቅልሽ መፈቻው ጊዜ መቸ ይሆን?  በሁለት ጽንፈኞች መካከል ታርቀው የሚረግፉት የፍልስጥኤማውያን እንባስ ማቆሚያው መቸ ነው?

እስኪ ቸር ያሰማን …

ነቢዩ ሲራክ