ህወሃት በአሶሳ ለጥፋት ሊጠቀምበት የነበረ ከ14 ሚሊዮን ብር በላይና ገጀራ በቁጥጥር ሥር ዋለ

በቤኒሻንጉል ጉሙዝ ክልል አሶሳ ከተማ ለህወሓት የጥፋት ተልዕኮ ማስፈጸሚያነት ሊውል የነበረ ከ14 ሚሊዮን ብር በላይ የያዙ 59 የባንክ ሂሳብ ደብተሮች፣ ጥሬ ገንዘብ እና ገጀራዎችን በቁጥጥር ስር ማዋሉን ፖሊስ አስታወቀ።

በክልሉ ከህወሓት ተልዕኮ ወስደው ጥፋት ለመፈጸም በማሴር ተጠርጥረው በቁጥጥር ስር የዋሉ ሰዎች ቁጥር ከ70 በላይ መድረሱ ተገልጿል።

የክልሉ ፖሊስ ኮሚሽነር አብዱልአዚም መሐመድ ዛሬ ለኢዜአ እንዳስታወቁት፤ የህወሐት ጥፋት ቡድን ክልሉን ብሎም ሃገርን ለማተራመስ የሚያደርገውን ሴራ እየከሸፈ ነው።

“ባለፉት ሶስት ቀናት የሃገር መከላከያ ሠራዊት፣ ፌደራል ፖሊስ፣ የክልሉ ልዩ ሃይል፣ ጸረ-ሽምቅ፣ ሚሊሻ እና በጎ ፈቃደኞች በተለይም አሶሳ ከተማን ትኩረት በማድረግ በቅንጅት እየሠሩ ይገኛሉ” ብለዋል።

ግለሰቦች ስማቸውን እየቀያየሩ የቁጠባ ደብተሩን በማዘጋጀት ገንዘቡን ለጥፋት ለማዋል ሲንቀሳቀሱ እንደተደረሰባቸው ኮሚሽነሩ አስታውቀዋል።

በሴራው ከተጠረጠረ አንድ ግለሰብ መኖሪያ ቤት 1 ሚሊዮን 300 ሺህ ብር በጥሬ መገኘቱን ለኢዜአ አብራርተዋል።

እንዲሁም በከተማው የአንድ ሆቴል ባለቤት በሆነ ግለሰብ መኖሪያ ቤት ውስጥ ከ60 በላይ ገጀራ እና ቢላዋ መገኘቱን ኮሚሽነር አብዱልአዚም አመልክተዋል።

ጎልጉል የድረገጽ ጋዜጣ