ከተማርኩት ቁጥር 1

ያሜሪካ ቆይታዬ በጣም አጭር ነው። ሁለት አመት እንኳን አይሞላም። ላገሩ አሁንም ላገሩ ባዳ ለወንዙ እንግዳ ነኝ። ገና ብዙ ያልገባኝ ነገር አለ።

ግን በዚህች አጭር ጊዜም ቢሆን ብዙ ጠቃሚ ነገር ተምሬያለሁ ብል “አይ ገና ምኑ ተይዞ” እንደማትሉኝ ተስፋ አደርጋለሁ። ለምን ቢባል ልማር ላለ ሳር ቅጠሉ እውቀት መሆኑን ታውቁታላችሁ ብዬ ነው። ይልቅስ ለመሆኑ ምን ተማርክ ብትሉኝ ወጌን እጀምራለሁ።

አዎ! ብዙ ነገር። ከእንግዲህ ምናልባት ሰሚ ካገኘሁ ከተማርኩት እያልኩ በተከታታይ አንዳንድ ነገር ለማካፈል አቅጃለሁ። ታዲያ እኔ ትምህርት አገኘሁበት ያልኩት ነገር ከታወቀ የቆየ ወይም የፊደል ቆጣሪ ግንዛቤ ሆኖ ካገኛችሁት የሞተውን አባባ ይለዋል ወይም የልጅ ነገር ሳትሉ ሃሳብ ስጡበት። እኔ አላማዬ መማር ስለሆነ ከስህተቴ እማራለሁ።

ከተማርኩት ቁጥር 1

ወደፍሬ ነገሩ ከመግባቴ በፊት ተማርኩባቸው የምላቸው ጉዳዮችን የማነሳው ሀገሬ ኢትዮጵያን በሆዴ ይዤ መሆኑን ልብ በሉልኝ። ባጭሩ መሰረታዊ ጉዳያችን ታላቋ ኢትዮጵያ (ለኔ ዛሬም ኢትዮጵያ ታላቅ ናት) ከታላቋ አሜሪካ ህይወት ምን ልትማር ትችላለች የሚል ነው።

ስለ ጦርነት

አሜሪካኖች እርስበርእሳቸው ተዋግተዋል። ለአምስት አመት። ከ600 ሽህ ህዝብ በላይ አልቋል። ልባአድርጉ! የተዋጉት እርስበርስ ነው። ከዚህ የታሪክ ክስተት መነሻና መድረሻ ለሀገራችን ጉዳይ የሚጠቅም ቁም ነገር ማግኘት ይቻላል። በመጀመሪያ ኢትዮጵያውያን እርስበእርሳችን ስንዳማ መኖራችን የሚያስመሰግን ባይሆንም ካለም ለይቶ የሚያስረግመን ገጠመኝ አይደለም። በዘመኑ የተሻለ ስልጣኔ የነበራቸው አሜሪካኖች ዴሞክራሲያዊ የሚባል ስርአት ከገነቡ በኋላ እንኳን በዚያን ጊዜ ባስከፊነቱ ወደር አልባ የነበረ እልቂት ያስከተለ ጦርነት አካሂደዋል። ከዚህ አንፃር ሲታሰብ የኢትዮጵያውያን ልምድ ባይወደስም ጉድ ሊባል አይገባም።

ከዚህ ሁሉ የበለጠው ትምህርት ግን ጦርነትን የታሪክ ትምህርት እንጂ የዘወትር የጀግንነት ስራ አድርጎ ያለመቀጠል ነው። አሜሪካኖች ጦርነቱን ታላቅ ሀገርና ጠንካራ የፍትህ ስርአት ገንብተውበታል። ዳግመኛም አላካሄዱትም። ጦርነታቸውን ሌላ ጦርነት የማያስነሳ ስርአት መሰረቱበትና ታሪክ ብቻ ሆኖ እንዲቀር አደረጉት። እኛም ማድረግ ያቃተንና ማድረግ ያለብንም ይህንን ነው። መኮነን ያለብን ያሳለፍነውን ጦርነት ሳይሆን የሚመጣውን አዲስ ጦርነት ነው። አሜሪካኖች አንድ ጊዜ ደም ተፋሰው የጦርነትን በር ዘጉ። እኛ የታሪክ ጦርነቶችን እያብሰለሰልን ላዲስ ጦርነት ጠመንጃ እንወለውላለን። ልዩነታችን እዚህ ላይ ነው። በጦርነት ስልጣን የያዘው አካል ጦርነት በታሪክ ያደረሰብንን ጉዳት በማጤን ዳግም ደም አፋሳሽ ግጭት እንዳይነሳ ለሰላምና ለህዝብ ደህንነት በግንባር ቀደምትነትና በሆደሰፊነት ጠንክሮ ከመስራት ይልቅ ወንድ የሆነ ይምጣ አይነት ፉከራን ያሰማናል። እንዲያውም ራሱ ቀድሞ በራሱ ህዝብ ላይ ጦርነት አውጆ ህዝብ በከፈለው ግብር ጥይት እየገዛ ህዝብ ላይ ይተኩሳል። ሌላው በበኩሉ ለነፃነትና ሰላም መፍትሄው ጠመንጃ ነው በሚል አቀባብሎ ደም ሸቶኛል ይላል።

ዳያስፖራውም ቢሆን ቢያንስ ጦርነት አከል ንግግር አላጣም። እና ሁላችንም ተደምረን ስንሰማ ዜማችን አንድ ነው። ይሄውም፤ ትናንት ስንዋጋ ነበር፤ ዛሬም እንዋጋለን፤ ነገም እንዲሁ፥ የሚል ነው። ክፉ አባዜ!

አሜሪካኖች ከጦርነት ዘላቂ ሰላም፣ ነፃነትና ፍትህን ሲመሰርቱ እኛ ከጦርነት ተነስተን ወደ ጦርነት እንጓዛለን። አሜሪካኖች ከጦርነት ልማትን ተምረው ሰላማዊ ስርአት ሲመሰርቱ እኛ ግን ከጦርነት ለነገ የሚሆነንን አዲስ ጥፋት እንቀስማለን።

እኔ ግን የተማርኩትና ያገሬ ሰውም እንዲማር የምመኘው ከጦርነት ጥፋትን ሳይሆን ደህንነትን፣ ከግጭት ቂምን ሳይሆን ፍቅርን፣ ከስህተት ስህተትን ሳይሆን እርምትን እንማር ዘንድ ነው። እናም እኔ ካሜሪካኖች ታሪክ የተማርኩት የመጀመሪያው ቁምነገር ይህንን ነው። ሌላውን ሌላ ጊዜ ማንሳቴ አይቀርም። ሰላም ሁኑልኝ፡፡

ህሩይ ደምሴ

ከዋሽንግተን ዲሲ

“ጎልጉል፡ የድረገጽ ጋዜጣ የሕዝብ” እንደመሆኑ በ“የኔ ሃሳብ (Opinion)” ዓምድ ሥር የድርጅቶችና የማንኛውም ግለሰብ ነጻ ሃሳብ የሚስተናገድ ሲሆን ከአንባቢያን የሚላኩልን ጽሁፎች በጋዜጣው የአርትዖት (ኤዲቶሪያል) መመሪያ መሠረት ያለ መድልዖ በዚህ ዓምድ ሥር ይታተማሉ፡፡ ይህ በጎልጉል የድረገጽ ጋዜጣ በ“የኔ ሃሳብ (Opinion)” ዓምድ የታተመ ጽሁፍ የጎልጉል የድረገጽ ጋዜጣ^® አቋም ሳይሆን የጸሃፊው ነው፡፡