ወፌ ቆመች በሉና!!

መረጃ ለአንድ ማህበረሰብ ከምንም በላይ አስፈላጊና አንገብጋቢ አጀንዳው ነው። ይህ የሚሆነው በአግባቡ ሚዛኑን ጠብቆ ሲራመድ ብቻ ነው። ስርዓት ጠብቆና በተቻለ መጠን ሙያዊ ስነምግባሩን ተከትሎ መራመድ የሚችል ሚዲያ የወደፊቱን በማየት ህብረተሰብን ያነቃል፣ ያሳስባል፣ ያዘጋጃል፣ የተለያዩ ሃሳቦችን ገደብ ሳያደርግ ያስተናግዳል። በዚህ እሳቤ ላይ ተመስርቶ ለመስራት የተስማማው የጎልጉል ኤዲቶሪያል ቦርድ በአገራችን አዲስ ዓመት ዋዜማ ለንባብ ሲውል ቀዳሚ ጥሪው ያደረገው ለመቆም የሚውተረተር ህጻን የሚበረታታበትን “ወፌ ቆመች” የሚለውን ባህላዊ ቃል ነው። ወፌ ቆመች!!

ሚዲያ እንደ ንፋስ ከነፈሰና በስማ በለው ከነጎደ ስቶ ከማሳቱ በላይ ማህበረሰብን ሚዛን በሌለውና በተራ አሉባልታ በማዥጎርጎር ቀላል የማይባል የስሜት ግሽበት ያስከትላል ብለው ከሚያምኑት ክፍሎች ተርታ ራሳችንን እንመድባለን። በተራ ዘለፋና ስድብ አዘል መልዕክቶች የትኛውንም ዓይነት አስተሳሰብና የትኛውም ዓይነት አቋም ያላቸውን ክፍሎች ማስተማር፣ ማረምና መገሰጽ አስቸጋሪ ነው ብለን ስለምናምን ለመቆም የምንውተረተረው ከዚህ የጸና ዓላማችን ዝንፍ ሳንል እንደሆነ ለምታቋቁሙን አስቀድመን ለማሳወቅ እንወዳለን።

ሁላችንም እንደምንረዳው በአሁኑ ወቅት በስፋት የሚስተዋለው የመሞጋገስ አካሄድ ብቻውን ወደሚፈለገው ግብ ያደርሳል ብለን ከቶውንም አናምንም። ኢትዮጵያን “አውራ ፓርቲ ነኝ” በማለት ያለ ህዝብ ይሁንታ እየመራ ያለው ኢህአዴግ ብቻ ሳይሆን የተቃዋሚው ጎራም  ሲሳሳት – ተስተካከል፣ ባለበት ሲረግጥ – ተንቀሳቀስ፣ ሲረጋና ሲጋገር – ሩጥ፣ ከህዝብ ሲርቅ – ወደ ህዝብ ተጠጋ፣ ውስጣዊ ዴሞክራሲ ሲጎድለው – ተመለስ፣ በስሜት ሲነዳ – አስተውል፣ ራዕይ አልባ ሲሆን ራዕይ ሰንቅ፣ ቅርብ አዳሪ ሲሆን ሩቅ ተጓዥ ሁን… አልሰማ ሲልና ወደ በረዶ አለትነት ተቀይሮ የለውጥ ጠረን ካጣ በቃህ፣ ለተተኪ አስረክብ… የሚል ከወተት እስከ አጥንት የጠጠረ ሂስ ሊቀርብበት ይገባል ብለን እናምናለን።

አገራችንና ህዝቧ የተቆፈረላቸው የጎሳና የዘር ጉድጓድ አፉ ሰፊ፣ ጥልቀቱ የራቀ፣ መጠኑ ትልቅ በመሆኑ ይህንን ገደል የመድፈን ስራ ከቶውንም ዕረፍት የሚሰጥ ባለመሆኑ ዜጎች ከጎሳ ይልቅ ለመፈቃቀርና ለሰብዓዊነት ቅድሚያ እንዲሰጡ ማስተማር ከየትኛውም አገር ወዳድ ዜጋ የሚጠበቅ እንደሆነ ይሰማናል። በአንድ ሰው ነፍስና የሞት ወለል ላይ የተቸነከረችው አገራችን ከሙት መንፈስ አመራርና ራዕይ ውጪ ሌላ አማራጭ እንደሌላት በተደጋጋሚ በሃዘን ድባብ ውስጥ የሰነበቱት የኢህአዴግ አመራሮች ነግረውናል። አገሪቱ በሙት መንፈስ እንደምትመራም አረጋግጠውልናል። አገር መሸጥና የአገርን ታሪክ ማጉደል፤ ከሌላው ህዝብ ላይ እየዘረፉ የራስን ቆዳ ማስዋብ፣ አገርን በዘርና በጎሳ በልቶ ማባላት፣ የባህር በሯንና መሬቷን መሸጥ፣ የሚበሉና የበይ ተመልካች የሆነ ህዝብ መፍጠር፣ የፕሬስ ነጻነትን ማሸግ፣ የመናገርና የመሰብሰብን ተፈጥሯዊ መብት መዝጋት፣ ተቃዋሚ ፖለቲከኞችን ማሳደድ፣ ጋዜጠኞችንና ንጹሃን ዜጎችን ማሰር፣ አገር ወዳዶችን መግረፍና ማሰቃየት፣ አፈናና የአፈና ተቋማትን በማደራጀት ስልጣንን በአንድ ብሄረሰብ ዙሪያና በቤተሰብ በማካለል ዜጎችን ባይተዋር ማድረግ… እንደ ታላቅ ጀብድና ዝና ተቆጥሮ “አጽምህ ይምራን” ሲባል መስማት እጅግ አስነዋሪና ከባድ አገራዊ ውድቀት ነው።

ኢህአዴግ የሚያሰራጨው ፕሮፖጋንዳ ሰለባ ያደረገው ህዝብ፣ ሰለባ ካደረገው የፕሮፖጋንዳ ባህር ይላቀቅ ዘንድ አበክሮ መስራት ካልተቻለ ሁሉንም ነገር አዳጋች ያደርገዋልና “ወፌ ቆመች” በሉን ስንል እንዲሁ ተረት ለማስታወስ አይደለም። ኢህአዴግ አማራጭ መገናኛዎች እንዳያብቡ በውስጥም ሆነ በውጭ አገር ከፍተኛ ሃብት እያፈሰሰ የሚዋጋው የሚዲያን ኃይል ስለሚረዳው ነውና ይህ እልህ እኛም ዘንድ ሊፈጠር ግድ ይላል። በተረትና በፉከራ የሚፈጠር አንድም ነገር የለምና ከወዲሁ መድረሻውንና መነሻውን ያስቀመጠ የሚዲያ አብዮት ሊቀጣጠል ይገባል። ህዝባችንን በባርነት ከያዘው የኢህአዴግ ፕሮፖጋንዳ ለማላቀቅ አስተውሎ መስራት ከወፌ ቆመች ያለፈ ታላቅ ተግባር ነውና ጎልጉልን እነሆ። ጎልጉል የዘመቻችን የመጀመሪያዋ መሳሪያ ናት። አሁንም ወፌ ቆመች!!