የሁሉም አለቃና የበላይ የሆነውን ሕዝብ ማስደሰት ያኮራል። የሚመሩትን ሕዝብና አገር ከልብ አክብሮ መገኘት ደግሞ ከኩራትም በላይ ነው። ይህንን በኳስ ያበደ ህዝብ፣ አገሩን ከምንም በላይ የሚያፈቀር ህዝብ መወከል ደግሞ ከበጎ ታሪክነቱ በላይ ከሽልማትና ከውዳሴ በላይ ነውና የኢትዮጵያ ልጆች ኩራታችሁ ታላቅ ይሁን። መልካም ዕድል ለአምባሳደሮቻችን!!
ኢትዮጵያዊነት እንዲህ የሚጣፍጥ፣ ማንም ሊወስደውና ሊበርዘው የማይችል ሃያል በረከት መሆኑን ምክንያት ሆነው ላሳዩን የኢትዮጵያ ብሔራዊ ቡድን አባላት ክብር ይሁን ለማለት እንወዳለን። መልካም እድል ለአምባሳደሮቻችን ስንል በቂ ምክንያት ስላለን በፍጹም ኩራት ነው። በእግር ኳስ ፍቅር ለሚቃጠለው የኢትዮጵያ ህዝብ የደስታ ቀን ላመጣችሁ ውድ የኢትዮጵያ ልጆች የምንመኘው መልካም ምኞት ካለፉት የሰላሳ አንድ ዓመታት ውድቀት ጋር የተቀበረውን የድል አድራጊነት ስሜት ስለቀሰቀሳችሁ በበጎ ታሪክ ማህደር ኢትዮጵያ አትዘነጋችሁምና ዕድለኞች ናችሁ። ለዚያውም በዛሬ ዘመን!!
አገራችንን አንቆ የያዛት የኮሙኒዝም “ሙት መንፈስ” መንግስት ያለበትን ሃላፊነት መወጣቱ፣ ዜጎች የድርሻቸውን ማበርከታቸው እንደ ታላቅ ነገር ተወስዶ “የእግር ኳሱ ውጤት የህዳሴው ስኬት አንዱ አካል” ተደርጎ መወሰዱ ፍጹም ተቀባይነት የሌለው ቢሆንም በሽኝታችሁ ወቅት ጠቅላይ ሚኒስትር ሃይለማርያም ደሳለኝን ጨምሮ በርካታ እንግዶች በተገኙበት የተደረገላችሁ አሸኛኛት የጀግና ነውና ማለፊያ የሚያሰኝ ነው።
በመሸለማችሁና በክብር ስለተደረገላችሁ አሸኛኘት የተደሰትነውን ያህል ያዘንበትም ጉዳይ አለ። በስፖርቱ ውስጥ ተመሽገው ለእውቅናቸው የሚቧቀሱ “ጋንግስተሮች” ያየነው ባለፉት ሃያ አንድ ዓመት ጊዜ ውስጥ ነው። ምንጩ በማይታወቅ ሃብት ስፖርቱን የሚረዱ መስለው ፌዴሬሽኑን የከበቡ ጉልበተኞች በአዲስ አበባ ስታዲየም ሲፈጽሙት የነበረው “ወራዳ” ተግባር የሚረሳ አይሆንም። ጋዜጠኞችን ከማስደብደብ ጀምሮ አገር እስከማስቀጣት የደረሱ “ማጅራት መቺዎች” ትልቅ ሰው መስለውና “ትልቅ ሰው” ተደርገው ስናይ በብሄራዊ ቡድናችን የምንኮራውን ያህል እንዲህ ዓይነት ዱርዬዎች የነገሱበት የክብር አሸኛኘት መደረጉ “ማፊያነትን” የማበረታታት ያህል ይሆንብናልና ህዝብ “ያብረቀረቀ ሁሉ ወርቅ ነው” ወደሚለው ድምዳሜ እንዳያመራ ልንመክር እንወዳለን። ሚዲያዎችም ከስሜት ያለፈውን ካሁኑ በማመሳከር መረጃቸውን እንዲያስተላልፉ ለማስታወስ እንወዳለን።
ሌላው ሼኽ መሐመድ ሁሴን አላሙዲ በደርባ ሲሚንቶ ፋብሪካ ስም ለመለገስ ቃል ከገቡት ሌላ “እንዳልታማ ይኸው ቼኩ” በሚል አስቀድመው እንደሚሰጡ የተናገሩትን አስር ሚለዮን ብር መድረክ ላይ መስጠታቸው ተመስገን የሚያሰኝና መጠቀስ ያለበት ነጥብ ይሆንብናል። ከባንክ ያለባቸውን እዳ በመክፈል፣ የጀመሯቸውን ፕሮጀክቶች በመጨረስ፣ አሰራዋለሁ፣ አስገነባዋለሁ በማለት ከዓመታት በፊት ከጓዳ አስከ አደባባይ የገቡትን ቃል፣ በተለይም አዲስ አበባ ስታዲየም ውስጥ “ካንድም ስምንት ስታዲየም እናስገነባለን። አፍሪካ ዋንጫን አገራችን እናዘጋጃለን” በማለት የገቡትን ተስፋና በተለያዩ ገጠሮች ክሊኒክና፣ የሙያ ትምህርት ቤት ለማስገንባት የገቡትን ውዴታ በነካ እጃቸው ለመተግበር፣ አሊያም “ትቼዋለሁ” በማለት አጀንዳውን እንዲዘጉ ለማሳሰብ እንወዳለን። ከሁሉም በላይ ለወደፊቱ ቼክ በመያዝ የፍላጎታቸውን ከማከናወን ውጪ ቃል እንዳይገቡም እንመክራለን። ሰንዳፋ አትሌቲክስ መንደር ግንባታ የዘገየው እንዲሁ ሃያ ዘጠኝ ሚሊዮን ለመስጠት በህጋዊ ቴሌቶን ላይ ቃል ገብተው ዝም በማለታቸው ነውና!!
ለጊዜው ይብቃን። ብሄራዊ ቡድናችን የስነ ምግብ ባለሙያ፣ የስነ ልቦና ባለሙያ፣ የጤና ባለሙያ፣ ወጌሻ፣ ስራ አስኪያጅ፣ የቡድን መሪ፣ አሰልጣኝ በመመደብና እንክብካቤ ተደርጎለት እዚህ ደርሷል። “የተከበራችሁ የኢትዮጵያ ህዝቦች” በማለት በጀመሩት የመሸኛ ንግግራቸው ወቅት እንደተናገሩት፣ በአንድ ወቅት ገናና ከነበርንበት ስልጣኔ ወርደን የድህነት ተምሳሌት መሆናችንን በቁጭት በማንሳት፣ በአፍሪካ በጀመርነው የእግር ኳስ ውድድር ተገፍትረን ላለፉት ሰላሳ አንድ ዓመታት ተመልካች ስለመሆናችን አውስተዋል። “ቀደም ሲል ጥሩ አጥቂ፣ ጥሩ ተከላካይ፣ ጥሩ ግብ ጠባቂ ነበረን” ሲሉም ያለፈውን የነመንግስቱ ወርቁ ዘመን አወድሰዋል። በመቀጠልም ከነሱ ዘመን በኋላ ማለታቸው ነው “መፋዘዝ ነግሶ ቆይቷል” የመፋዘዙ መነሻ ብዙ ቢሆንም፣ ዛሬ ይህ ድብታ ተሰብሯል። ይህንን የውድቀት ስሜት መስበር በራሱ ታላቅ ድል ነው!! የወደፊቱን ውጤት በጸጋ እንቀበላለን። መልካም እድል!! አቶ ሃይለማርያምም ከመሪ በሚጠበቅ ደረጃ የሚመሩትን ህዝብ ደጋግመው በመጥራት ማወደስዎ ያልተለመደና የረሳነው በመሆኑ ለርስዎም ታላቅ ጅምር ለማለት እንወዳለን። በተቋቋመ አጭር ጊዜ ውስጥ ሃያ አራት ሚሊዮን ብር ስፖንሰር ያደረገውን የሔኒከን በደሌ ስፔሻል ቢራ ማሞካሸት ከተስፋዎች ሁሉ በላይ ነውና አግባብ ይሆናል እንላለን!!
በደቡብ አፍሪካ በስደት የምትገኙ ኢትዮጵያውያኖች ቡድናችሁን ለመደገፍ በስፋት መነሳሳታችሁ ተሰምቷል፡፡ ታዋቂው አርቲስት ቴዲ አፍሮም ወደዚያው እንደሚያመራ ተናግሯል፡፡ በየአቅጣጫው የወገኖቻችሁ ድጋፍና መልካም ምኞት ብርታ እንደሚሆናችሁ እናምናለን፡፡
በድጋሚ መልካም ዕድል ለዋሊያዎች!! (ፎቶ: ኮንሰርቫቲቭ ባይት)
Leave a Reply