የህወሃት አውሬነት፣ ከውልደት እስከ ህልፈት? ወይስ አገር “እስክትፈርስ”?

* ይብላኝ ለእናንተ ለአውሬው ቀንድና ግምባሮች!

ፈቃደኛ ስለመሆኑ ባደባባይ ባልተጠየቀው የትግራይ ህዝብ ስም ራሱን ተገንጣይ ብሎ ሰይሞ አገር የሚገዛው ህወሃት፣ ከቀን ወደ ቀን ግፍ እየመከረ ነው። በአገር ስም እስከ አፍንጫው በታጠቀው ጠመንጃና በዘረፈው ሃብት በመተማመን በያቅጣጫው ንጹሃንን እየጨፈጨፈ ነው። እስር ቤት አጉሮ  እያሰቃየ ነው። ያልፈጸመውና የማይፈጽመው ሰቆቃ የለም። ህጻን፣ አዋቂ፣ አዛውንት፣ እናት፣ አባት ሳይመርጥ የጥይት አረሩን እያወረደ በያይነቱ ደም እየተጋተ ነው። ቂም እየከመረ ነው። ከቀን ወደ ቀን ደምና ግፍ የሚበቃው አይመስልም። ወዳጆቹም ሆኑ በስማቸው የሚነገድባቸውም ተው ሲሉት አይሰሙም። ምን ይሁን? ይህ አውሬነት እስከመቼ ይቀጥላል?

“በጉልበት ትግሬ ተደረግን እንጂ ፍጥረታችን ትግሬ አይደለም” ያሉ ይገደላሉ፣ ይታፈናሉ፣ ይገረፋሉ፣ እርሻቸው ይነጠቃል፣ ከመኖሪያቸው ይፈናቀላሉ። “መሬታችን ለምን ይወሰደብናል” ያሉ የኦሮሞ ልጆች በጅምላ ይፈጃሉ። በጅምላ ታፍነው አሰቃቂ ሥቃይ ይደርስባቸዋል። ታፍነው የደረሱበት የማይታወቀውን ቤትና ወላድ ይቁጠራቸው፣ የጋምቤላን ለም ምድር ለመቸብቸብ ሲባል ምንም የማያውቁ ወገኖች ተፈጁ፣ ታሰሩ፣ ተፈናቀሉ፣ ኦጋዴን ውስጥ የተፈጸመው ለሰሚው ግራ የሚያጋባ ነው። አንድ ምስኪን እናትን አራት ቀን አስከሬን አሳቅፎ ማሰቃየት ምን ማለት ነው? ከዚህ በላይ አውሬነት ምን አለ?

በያቅጣጫው የሚሰማው ለቀሶ ነው። እመጫትን በዶፍ ዝናብ ከቤት አውጥቶ መጣል ምን ማለት ነው? ህጻናትን እየገደሉ ከራባት አንጠልጥሎ አፍ መክፈትና “ጅኒ” ብሎ መዘበት በምን መስፈርት ልክ ይሆናል? እስኪ አፍቃሪ ህወሃቶች ረጋ በሉና አስቡ። በኦሮሚያ የሚሆነውና የሆነው፣ አማራ ክልል እየተደረገ ያለው፣ ኦጋዴን የሚፈጸመወና የሚፈጸመው፣ በደቡብ ክልል የተለያዩ ወረዳዎች የሚታየውና የሚሰማው ግፍና በየአቅጣጫው የሚሰማው የእናቶች እንባ እንዴት እርካታ ይሰጣችኋል? እንዴት ደረታችሁን ያስነፋችኋል? ይህ ሁሉ በናንተ ቤተሰቦች ላይ ቢደርስ ትወዳላችሁ? ስለምን አውሬነትን ታበረታታላችሁ? ስለምንስ ግፍ በሚፈጸምባቸው ወገኖቻችሁ ላይ ትሳለቃላችሁ? ህወሃት ነጻ ያወጣችሁ ዘንድ ፍላጎታችሁ ከሆነ ሁሉ በጃችሁ ነውና ደሃውን ህዝብ ልቀቁት!! ሂዱ። አለያ ደግሞ ድሆች ሲገደሉ፣ ሲታሰሩ፣ ሲታፈኑና ለሥቃይ ግፍ ሲዳረጉ በግልጽ፤ በገሃድ፤ በአደባባይ ተቃወሙ። ፍትህን እመኑባት!!

ከቀን ወደ ቀን እየሆነ ያለው ሁሉ የሚዘገንን ነው። የሚቀፍ ነው። ብልሆች ሲናገሩ “ውሻን ወደ ቁልቁለት አታባር፣ ሲዞር ዳገት ይሆንብሃል” ይላሉ። አዎ! ዛሬ ህወሃት ዳገት ላይ ነው። ዳገት ላይ ሆኖ የሚድኽውን፣ የሚራመደውን፣ የሚሮጠውን፣ ደካማውን፣ ህጻናትን፣ ሁሉን በጅምላ እየነዳ ነው። እየደፋ ነው። ከድንቁርና ጋር የተቀላቀለ ጥጋብና ትዕቢት አሳውሮታል። ተግባሩ ስለሚያስደነብረው ተቃውሞን አይወድም። ካልተቃውሙት ወደብ ይሸልማል። አገር ቆረሶ ይሰጣል/ይሸጣል። ሰዎች ለመብታቸው ሲነሱ መልሱ የምናየው ነው። አውሬነት ነው። በዚህ አውሬነቱ ህወሃት በደም ተጫማልቋል። የደም እዳ በዝቶበታል። አውሬነቱ ማብቂያ የሌለው ህወሃት ሰሞኑን በአቶ ሃብታሙ ላይ የፈጸመውና እየፈጸመ ያለው ተግባሩ ይህንኑ አውሬነቱን ያረጋገጠ ይሆናል።

አቶ ሃብታሙ ህወሃት አጥብቆ የሚጠላው ወጣት ፖለቲከኛ ነው። በፈጠራ ክስ አሰረው። እስር ቤት አማቅቆ፣ አሰቃይቶ በመጨረሻ “ነጻ” አለው። ተመልሶ ይግባኝ ተጠየቀበት። ከዛም ይግባኙ እንዳለ ሆኖ ተፈታ። አሁን ስለሚያሰቃየው ህመም ለህብር ሬዲዮ ሲያስረዳ ታሪኩ የሚያስለቅስ ነበር። አንድ መጸዳጃ በሌለበት ክፍል ውስጥ እንዴት ያሳልፍ እንደነበር እዚህ መዘርዘሩ ባያስፈልግም ህሊና ላላቸው ሁሉ /ከአውሬዎች በቀር/ የሚያም ነው። እንግዲህ ራሱ ህወሃት በፍርድ ቤት በኩል እንዳመነው አቶ ሃብታሙ የታሰረው ያለ በቂ ማስረጃ ነበር። አፍቃሪ ህወሃቶች እስቲ አስቡት! አቶ ሃብታሙ አያሳዝንም?! ይህ ሁሉ ሳያንሰው ታይላንድ ወይም ሌላ አገር ሄዶ የመታከም መብቱ ሲገፈፍ … ሰውየው ቀብር ሄዶ ሲያለቀስ “ባክህ በቃህ” ሲሉት “ተዉኝ ለራሴ ነው የማለቅሰው” አለ እንዲሉ፣ ነግ በእኔ ነውና እንዲህ ያለ አውሬነትን መቃወም ግድ ነው።

ጎልጉል አቶ መለስ ሲሞቱ ከበሮ አልመታችም። እንደ ሰው ሞታቸው አሳዝኖናል። ነገር ግን በሰሩት የአውሬ ተግባር ህግ ፊት እንዲቀርቡ እንመኝ ስለነበር ፍርድን በሞት ማምለጣቸው አናድዶናል። እንደ ዝግጅት ክፍላችን እምነት መለስን ማስነሳት የሚቻል ቢሆን ትውልድ ሁሉ እንዲማርበት ፍትሕ ሲበይንባቸው እንዲያይ ከሞቱበት ይነሱ ዘንድ የሚፈለገውን ሁሉ እናደርግ ነበር።

እናም አቶ ሃብታሙ ዶላር አልጠየ፣ አሳከሙኝ አላለ፣ ሃኪም ቢያዝ ባያዝ፤ ቢፈቅድ ባይፈቅድ ውጪ ሃገር ሄዶ መታከም ከፈለገ እንዴት ይከለከላል? አሁን ይህንን አውሬነት አዳንቆና አወድሶ በየማህበራዊው ሚዲያዎች ማቅረብ ምን ይባላል? ያሳፍራል! ያሳዝናል! ወይስ የተፈራ ሌላ ነገር አለ? የእስሩ ግፍ ያደረሰበት የበሽታ ጉዳት እና መጠኑ ውጪ ሲወጣ በባለሙያዎች ያለጥርጥር እንዳይጋለጥ ተፈርቶ ይሆን?

ህወሃት ውስጥ የተካተቱ የሚስቶቻቸው ጥርስ ለማስሞላት፣ ልጆቻቸው ለሽርሽርና ለቶንሲል የውጪ ህክምና ተጠቃሚዎች በሆኑባት አገር … ባለስልጣናት ለወሲብ በሳምንት ሁለቴ የሚመላለሱባት ታይላንድ ብርቅ ሆና ህይወትን ለማዳን ደጇ ሲዘጋ … እንተወው!! ለሁሉም ህወሃት ተፈጥሮ ብዙም ሳይቆይ አውሬዎቹ መሪ ሆነው የወገኖቹን ደም እየጠጣ ተጓዘ። ተጉዞም እዚህ ደረሰ። አሁን በያዘው አኳኋን ደም የሚጠግብ አይመስልም። አውሬነቱንም እስከ ህልፈት ብሎ ምሏል። ወይም እሱ እንደሚመኘውና ሁሌም እንደሚያስፈራራው ኤርትራ ላይ መንግስት ለጥፎ ኢትዮጵያን እስኪያፈርስ በዚሁ አውሬነቱ ይቀጥላል። የሚያሳዝነው የአውሬ ቀንድና ሾከና ሆነው የሚያገለግሎት ባንዳዎች ናቸው። ለፍርፋሪ ተገዝተው አብሮ አደጋቸውን የሚያሳደዱት ከሃዲዎች። እኚህ ባንዳዎች ሲጣሉ የአውሬው ፈርስና እዳሪ መሆናቸውን እያዩ አለማመናቸው ይገረማል!! አዋቂዎች ሲያዝኑ “ይብላኝ ለእናንተ” እንዲሉ!!

ሕዝብን ሁልጊዜ ቁልቁለት እያባረሩ መግዛት አይቻልም፤ ሕዝብ ፊቱን ያዞረ ቀን፤ ቁልቁለቱ ዳገት ሲሆን፤ ተሳዳጁ አሳዳጅ ሲሆን፤ … ማን ይታደግ ይሆን?!

ይህ ርዕሰ አንቀጽ የ“ጎልጉል: የድረገጽ ጋዜጣ^®” አቋም ነው፡፡