የትግራይ ሚዲያ ሃውስ ከOMN እንዲነጠል ደጋፊዎች አሳሰቡ፤ መዋጮ ሊያቆሙ ነው

“ቴክኖሎጂ የአማራ አክቲቪስቶችን ማንነት አጋለጠ”

በዋናነት ራሱን የትግራይ ህዝብ ነጻ አውጪ ግንባር (ትህነግ) በሚል የተገንጣይ ወንበዴ ስም በሚጠራው ቡድን፣ አፍቃሪ ትህነግ በሆኑ በውጭ አገር የሚኖሩ ደጋፊዎቹና የትህነግን የሥውር ንግድ በሚያከናውኑ ኃይሎች የሚደጎመው የትግራይ ሚዲያ ሃውስ (TMH) አሁን በሕግ ጥላ ሥር በሆነው ጃዋር መሀመድ ከሚመራው ኦኤምኤን ሚዲያ እንዲለይ ተጠየቀ። ይህ ካልሆነ ድጋፍ ማድረግ ይቆማል።

ይህ የተሰማው የኦሮሚያ ሚዲያ ኔትዎርክ የተሰኘውና ጃዋር መሀመድ በሂደት የግሉ ንብረት ያደረገው ሚዲያ የሚያሰራጫቸውን ሕዝብን ከሕዝብ የሚያጋጩ ዘገባዎች የትግራይ ሚዲያ ሃውስ ቃለ በቃል እየተረጎመ በማቅረብ መቀስቀሱ አደጋ እንደሚያስከትል ከታወቀ በኋላ ነው።

የድምጻዊ ሃጫሉን ግድያ ተከትሎ በቅንጅት በተፈጸመ ጥቃት በኦሮሚያ ከፍተኛ ጉዳት መደረሱና ይህ “የግደለው” ዘመቻ አሁን ድረስ ከአገር ውጪ እየተላለፈ መሆኑ ይታወቃል።

በዚሁ ዘርና እምነትን መሰረት አድርጓል የተባለው የጥቃት ዘመቻ ለበርካታ ንጹሃን በግፍና በአሰቃቂ ሁኔታ መገደል፣ ለንብረት መውደም፣ ለዝርፊያ እንዲሁም ለበርካቶች መፈናቀል ምክንያት ሆኗል። በዚህም የOMN እና ተመሳሳይ አደረጃጀት ያላቸው ሚዲያዎች ባሰራጩትና እያሰራጩት ባለው የጥፋት ቅስቀሳ መሠረት መንግሥት በይፋ ግብረኃይል አቋቁሞ የዘር ማጥፋት አዋጅ የሚያውጁና የሚያሰራጩ ለሕግ እንዲቀረቡ እየሠራ መሆኑን ይፋ ማድረጉ አይዘነጋም።

የአሜሪካ የጎልጉል ዘጋቢ መረጃዎችን ዋቢ አድርጎ እንዳለው ከOMN ጋር ፍቅር በመመሥረት ተናብበው የዘር ማጥፋት አዋጅ እያወጀ ያለው የትግራይ ሚዲያ ሃውስ መንግሥት ወደ ሕግ እንዲቀርቡለት ጥያቄ ካቀረበባቸው ሚዲያዎች አንዱ መሆኑ ደጋፊዎቹን አስደንግጧል።

መንግሥት ከተቻለ ተላልፈው እንዲሰጡት ካልሆነ ባሉበት አገር በሕግ እንዲጠየቁለት የጀመረው እንቅስቃሴ እየከረረና ትብብር የተጠየቁት አገራት ትብብር ለማድረግ መስማማታቸው ያሰጋቸው የትግራይ ሚዲያ ሃውስ አጋሮችና ድርጎ ሰፋሪዎች ሚዲያው ከOMN ራሱን እንዲለይ መጠየቃቸውን ዘጋቢያችን አረጋግጧል።

ሚዲያውን በቋሚነት ገንዘብ በማዋጣት ድጋፍ የሚያደርጉ አፍቃሪ ትህነጎች ጥያቄያቸውን አክብሮ ሚዲያው ራሱን ከOMN ካልለየ ለደህንነታቸው ሲሉ መዋጮ ለማቆም እንደሚገደዱ ግልጽ አድርገዋል። እስካሁን በስማቸው በግልጽ ሲረዱ የነበሩት እነዚህ ክፍሎች የሚዲያው በዘር ማጥፋት አዋጅ ክስ ከተመሠረተበት ከተጠያቂነት ስለማያመልጡ ተቋሙ ስማቸውን በስውር እንዲይዝላቸውም ያሳሰቡ አሉ። የሕግ አዋቂዎች እንደሚሉት ግን ትብብር የተጠየቁት አገራት ከተስማሙ በማናቸውም መልኩ ክፍያ የፈጸሙ ሁሉ ስማቸውን ሊደብቁ ወይም መረጃው ሊሸሸግላቸው እንደማይችል ያስረዳሉ። በተለይ ከሴፕቴምበር 11ዱ በአሜሪካ ከደረሰው የአሸባሪዎች ጥቃት በኋላ በሽብር ለሚከሰሱ ድርጅቶችም ሆኑ ግለሰቦች የሚደረግ ማንኛውም መዋጮ በማን፣ መቼ፣ የት፣ ስንት ብር፣ ወዘተ የሚሉትን መረጃዎች ማግኘት እንደቀለለ ባለሙያዎች ይናገራሉ።

የሃጫሉን ግድያ ተከትሎ OMN በቀጥታ ስርጭቱ ሕዝብ እንዲነሳ፣ እርምጃ እንዲወስድ መመሪያ ሲያስተላልፍ የትግራይ ሚዲያ ሃውስም በተመሳሳይ ድርጊት የOMNን ስርጭት ተቀብሎ በማሰራጨት አመጹ ላይ ነዳጅ በማርከፍከፍ ወዲያውኑ መወንጀሉ፣ ይህንኑ ተከትሎ ከድምጸ ወያኔ፣ ከትግራይ ቲቪና ከወዳጁ OMN ጋር እንዲዘጋ መደረጉ አይዘነጋም።

በሌላ ዜና ሰሞኑን በኢትዮጵያ ኢንተርኔት መዘጋት አንድ ከፍተኛ ምሥጢር ይፋ አድርጓል። “ቴክኖሎጂ የአማራ አክቲቪስቶች ነን የሚሉት አገር ቤት የሚገኙና ስማቸውን ቀይረው የሚንቀሳቀሱ የዲጂታል ወያኔ ተከፋዮች መሆናቸውን አረጋገጠ” ሲሉ አስተያት ሰጪዎች ገለጹ።

አገሪቱን ለማተራመስ በቅንጅት የተወጠነውን ሤራ ለማክሸፍ መንግሥት ኢንተርኔት መዝጋቱን ተከትሎ በአማራ ስም የሚነዙ ቅስቀሳዎች በመክሰማቸው ነው አስተያየቱ የተሰጠው። በዚሁ መሠረት በአማራ ስም በተከፈቱ የማኅበራዊ ገጽ (በተለይ የፌስቡክ) አካውንቶች የሚረጨው ቅሰቀሳ የዲጂታል ወያኔ ተግባር እንደሆነና ምንጩም አገር ቤት በመሆን መንግሥት ማረጋገጥና ምንጩን ለማድረቅ ሊሰራ እንደሚገባ አስተያየት ሰጪዎቹ አመልክተዋል። ራሳቸውን አክቲቪስት እያሉ የሚጠሩትም ለአማራ መብት የቆሙ ሃቀኞች ሳይሆኑ ትህነግ ያሰማራቻቸውና ለዓላማዋ የምትጠቀምባቸው ዲጂታል ወያኔዎች መሆናቸውን የኢንተርኔቱ መዘጋት አጋልጧል ተብሏል።

ከዚሁ ጋር ተያይዞ እነዚሁ ማኅበራዊውን ሚዲያ የሚከታተሉ ወገኖች “አቶ ጌታቸው ረዳ ከፖለቲከኛነት ወደ አክቲቪስትነት አደገ” ሲሉ ተሳልቀዋል። ጌታቸው ረዳ ሰሞኑንን አፍሪካ ውስጥ ሱዳን ወይም ግብጽ ሆኖ ጥላቻን በሚሰብኩ ቅልብ ሚዲያዎች እየቀረበ በተደጋጋሚ ሲወተውት ማየታቸው አስገርሟቸው ነው ይህን ያሉት።

“አክቲቪስት ጌታቸው ረዳ በቅርቡ በፌስቡክ ቀርቦ “እንዴት ነው አላችሁ፤ እስቲ ገባ ገባ በሉ፤ ድምጼ ይሰማል?” ሲል ይሰማል በማለት ሽሙጥ ተናግረዋል። ከትግራይ ከወጣ በኋላ ለመመለስ ያልቻለው ወይም ያልፈለገው የትህነግ አፈቀላጤ ጌታቸው ረዳ፤ መቀሌ የመሸገው የበረሃ ወንበዴዎች ቡድን ህንፍሽፍሽ (ክፍፍል) ውስጥ በመግባቱ የእርሱ መጨረሻው ከማኅበራዊ ሚዲያ አክቲቪስትነት አያልፍም ተብሎ ይገመታል።

በተለይ ትግራይ ሚዲያ ሃውስ ከOMN ጋር ባለው ቁርኝት የገንዘብ ቀውስ ውስጥ ከገባ ወይም በሕግ ተጠያቂ ከሆነ እንደነ ጌታቸው ረዳ ዓይነት ትህነጎች ካገር ቢወጡ እንኳን የጥገኝነት ወረቀት ለማግኘት ፖለቲካ የሚሠሩበት ሚዲያ የማይኖራቸው ይሆናል።

ማሳሰቢያ፤ በተለይ በስም ወይም በድርጅት ስም እስካልተጠቀሰ ድረስ በጎልጉል የድረገጽ ጋዜጣ™ ላይ የሚወጡት ጽሁፎች በሙሉ የጎልጉል የድረገጽ ጋዜጣ™ ንብረት ናቸው። ይህንን ጽሁፍ ለመጠቀም የሚፈልጉ ሁሉ የዚህን ጽሁፍ አስፈንጣሪ (link) ወይም የድረገጻችንን አድራሻ (http://www.goolgule.com/) አብረው መለጠፍ ከጋዜጠኛነት የሚጠበቅና ህጋዊ አሠራር መሆኑን ልናሳስብ እንወዳለን።