ጠቅላይ ሚኒስትር ዐቢይ ከሕዝባቸው ጋር ሊገናኙ ይገባል! የአዲሲቷ ኢትዮጵያ የጋራ ንቅናቄ አስቸኳይ መግለጫ

ወደ ሥልጣን ከመጡ ጀምሮ በተደጋጋሚ ከሕዝብ ጋር ቀጥተኛ ሲያደርጉ የነበሩት ጠቅላይ ሚኒስትር ዐቢይ አሕመድ ከሕዝባቸው ጋር ግንኙነት ሳያደርጉ ሁለት ሳምንታት አልፈዋል። ጉዳዩን በቅርብ የሚከታተለው ለአዲሲቷ ኢትዮጵያ የጋራ ንቅናቄ (አኢጋን) የጠ/ሚ/ሩ ደጋፊዎችና መላው ሕዝባችን ሁኔታውን እንዲያውቅና አስፈላጊውን ውሳኔ እንዲወስድ ይፋ ለማድረግ ተገድዷል። በእርግጥ ዶ/ር ዐቢይ በተቀነባበረ በሚመስል ስልት ሁለት ሦስት ጊዜ ያህል ለሕዝብ ዕይታ ቀርበዋል። ሆኖም ከወትሮው በተለየ መልኩ ለውጡን አጥብቀው የሚቃወሙና ለማክሸፍ የሚፈልጉ ኃይሎች ያቀነባበሩት በሚመስል የተከናወነው ከሚዲያ ፍጆታ የማያልፍና በጥያቄ ውስጥ ያለውን ሕዝብ ለማርገብ የተሰራ የሕዝብ ግንኙነት ሥራ ሆኖ ነው ያገኘነው። ስለዚህ ሕዝባችን መሪውን የማግኘትና የማነጋገር መብቱ ሊነፈግ አይገባም፤ ይህም ባጭር ጊዜ ውስጥ በጋዜጣዊ መግለጫም ሆነ በፊት ሲደረግ እንደነበረው ዓይነት የውይይት መድረክ መገለጽ ይገባዋል በማለት አኢጋን አቋሙን በግልጽ ያስታውቃል።

ከዚህ በፊት “የሥራ አስፈጻሚ ስብሰባ በየሰዓቱ ለኢትዮጵያ ሕዝብ መገለጽ አለበት፤ ከእንግዲህ በኋላ በኢትዮጵያ የድብቅ ፖለቲካ አበቃ፤ …. የእኔ ሥራ የኢትዮጵያን ሕዝብ ፍላጎት … ማስፈጸም ብቻ ነው” የሚል ቃል የገቡልን ጠቅላይ ሚኒስትር እንዲሁም የመደበቅ እና የመሸረብ ፖለቲካ ማብቃቱን ያበሰሩልን መሪያችን ሕዝብ እንዲህ ተጨንቆና ባገሩ ላይ የመኖር ኅልውናው አደጋ ላይ ወድቆ ባለበት ወቅት ከሕዝባቸው ጋር እንደበፊቱ እንዳይነጋገሩ የገደባቸው ኃይል ምንድነው? የጉራጌና የቀቤና ሕዝብ በተጋጨበት ወቅት በፍቅር ተግሳጽ ታረቁ ብለው መክረው ወዲያው ያስማሙ ብልሃተኛ ከሕዝባቸው ጋር እንዳይመክሩ የኅሊና እስረኛ ያደረጋቸው ማነው? ተስፋ በሚሰጠውና የወደፊቱን ብሩህ አድርጎ በሚያሳየው አንደበተ ርዕቱነታቸው ሕዝባቸውን እንዳያረጋጉ አጣብቂኝ ውስጥ የከተታቸው ጉዳይ ምንድነው? ይህንን የሕዝብ ጥያቄ የጋራ ንቅናቄያችን ሕዝብ እንዲያውቀው ይፋ ለማድረግ ተገድዷል።

እጅግ በርካታ የሰቆቃና የመከራ ዓመታትን ያሳለፈው የአገራችን ሕዝብ በቅርቡ በጠቅላይ ሚኒስትር ዐቢይ አሕመድና እርሳቸው በሚመሩት ቡድን አማካኝነት ያገኘው ለውጥ ጥቂት ከሚባሉ ቡድኖችና ግለሰቦች በስተቀር በአገር ውስጥና በውጭ የሚገኘውን ኢትዮጵያዊ ያልጠበቀውን ተስፋ ያጎናጸፈው ነው። በአገራችን ታሪክ ታይቶ በማይታወቅ አሠራር እያስተዳደሩን ያሉት ጠቅላይ ሚኒስትር ዐቢይ በየጊዜው ባለማቋረጥ ለሕዝባችን የሰጡት ተስፋና ባጭር ጊዜ ውስጥ የፈጸሟቸው ተግባራት በኢትዮጵያ ብቻ ሳይሆን በአፍሪካ ቀንድ በሚገኙትም አገራት ታስቦ የማታወቅ ለውጥ ያመጣ ነው።

ሆኖም ግን ዶ/ር ዐቢይ የአሜሪካ ጉብኝታቸውን አጠናቅቀው ወደ አዲስ አበባ ከተመለሱ በኋላ ሁኔታዎች ተለዋውጠዋል፤ እርሳቸውም እንደቀድሞው ከሕዝባቸው ጋር የሚደርጉትን ግንኙነት በእጅጉ ቀንሰዋል። በእርግጥ ዕረፍት ዐልባ በነበረው የአሜሪካው ጉብኝታቸውና ከዚያ በፊት በነበሯቸው ጊዜያት ያለበቂ ዕረፍት መሥራታቸው፤ በጤናቸው ላይ መቃወስ ሊያስከትል እንደሚችል ማንም መገመት ይችላል። ሆኖም ዝምታቸውን ተከትሎ የወጡ ሕዝብን የሚረብሹና የለውጡ ተቃዋሚዎችን የሚያበረታቱ ዘገባዎች ሊወገዙ የሚገባቸው ናቸው። ጊዜያዊና ኢኮኖሚያዊ ጥቅምን ከማሰብ በፊት እንደ ሚዲያ የአገርን ኅልውና፣ የጠላትን አካሄድ፣ የሕዝብን ጥቅም ማስቀደም ተገቢ ነውና የጋራ ንቅናቄያችን በዚህ ላይ ትኩረት እንዲደረግበት ያሳስባል፤ ሕዝባችንም ምርቱን ከግርዱ እየለየ መረጃ የመቀበል ባሕሉን በማዳበር ለእንደዚህ ዓይነት ዘገባዎች ዕውቅና መንፈግ ይገባዋል። ጸረለውጥ የሆኑ ዘገባዎችንም እንዲሁ ዓላማቸውን አውቆ በመልሶ ማጥቃት ሊቃወማቸው ይገባል።

ጠ/ሚ/ር ዐቢይ ወደአገር ከተመለሱ ሁለተኛ ሳምንት አልፏቸዋል። በእነዚህ ሳምንታት ውስጥ በርካታ የሚረብሹና የሚያስጨንቁ ሁነቶች ተከስተዋል። ለአብነት ያህል፤ እርሳቸው በወጡ በማግስቱ በግፍ ከተገደሉት ስመኘው በቀለ (ኢንጂነር) በኋላ በርካታ አለመረጋጋቶች በተለያዩ የአገራችን ክፍሎች ታይተዋል። አሁን እየተረጋጋ ነው በሚባልበት የሶማሊ ክልል በርካታዎች ከመገደላቸውና ከቀያቸው ከመፈናቀላቸው ባሻገር እጅግ ባልተለመደ ሁኔታ እስከ 10 የሚደርሱ አብያተ ክርስቲያናት ወድመዋል፤ ካህናት ተገድለዋል፤ ሻሸመኔ ላይ በሐሰት በተሰራጨ ወሬ አንድ ወገናችን ላይ በቃላት ለመግለጽ የማይቻል አሰቃቂ ተግባር ተፈጽሞበታል፤ በምስራቅ ኢትዮጵያ አካባቢ ከሶማሊ ክልል ከተከሰተው አለመረጋጋት ጋር በተያያዘና በሌሎች ሰበቦች በርካታ ወገኖች ከቤታቸው እየተፈናቀሉ ነው፤ ቤት ንብረታቸው እየወደመ ነው፤ ሕይወታቻውን ለማዳን የለበሱትንና ልጆቻቸውን ብቻ ይዘው እየሸሹ ነው፤ ከጅጅጋ አካባቢ ተፈናቅለው ሕይወታቸውን አትርፈው አዳማ (ናዝሬት) የደረሱ ወገኖች እዚያም እየተገደሉና መግቢያ እንዲያጡ እየተደረጉ ነው፤ የኢትዮጵያ ሶማሊ ተወላጅ ያልሆኑ በድሬዳዋና አካባቢው የሚገኙና ከጅጅጋ ተሰደው የመጡ በሶማሊ ልዩ ፖሊስና በሄጎዎች ጥቃት ተሰንዝሮባቸው ህጻናት ሳይቀሩ ተገድለዋል፤ ቤ/ክ የተጠለሉ እርጉዞችንና እመጫቶችን ጨምሮ በርካታዎች ከዚያ እንዳይወጡ ተደርገው ምግብና ውሃ በማጣት ስቃይ ተዳርገው ከቆዩ በኋላ ስቃዩ በዝቶባቸው ለልጆቻቸው ውሃ ለማጠጣት የወጡ እናቶች ተገድለዋል፤ የተጠለሉበትም ቤ/ክንም ተቃጥሏል፤ በጅጅጋ የነበረው የኢትዮጵያ የሰብዓዊ መብቶች ኮሚሽን ቅርንጫፍ ጽ/ቤትም ጥቃት ደርሶበት መረጃዎችና ሰነዶቹ ከነኮምፒውተሮቹ ተዘርፈዋል፤ ጽ/ቤቱም ወድሟል፤ በጅቡቲ በሰላም ይኖሩ የነበሩ ኢትዮጵያውያን የጥቃት ሰለባ ሆነው 30ሺህ የሚሆኑ ወገኖቻችን ከጅቡቲ ለቅቀው ወጥተው በውሃ ጥምና በምግብ ማጣት እየተሰቃዩ ይገኛሉ፤ በደቡብ ምዕራብ ኢትዮጵያ በቴፒ ከተማ በተፈጠረ ሁከትና እስካሁን ባላቆመ ጥቃት ወገኖች እየተገደሉ ነው፤ የጌዲኦን ተፈናቃዮች ጨምሮ በአሁኑ ጊዜ በአገራችን ውስጥ በተፈጠረ አለመረጋጋት በሰላም ከሚኖሩበት ቀዬ የተፈናቀሉ ዜጎች ቁጥር ከሁለት ሚሊዮን በላይ ደርሷል።

በምስራቁ የአገራችን ክፍል እየደረሰ ያለውን በተመለከተ መንግሥት ሁኔታዎች እየረገቡ ነው ቢልም ዋንኛ የጥፋት ኃይል የሆነውን የሶማሊ ልዩ ፖሊስን ትጥቅ ስለማስፈታት የሚነገር አለመኖሩ “ለምን?” የሚል ጥያቄ እንድናነሳ የሚያደርገን ሆኗል። ከዚህ ጋር በተያያዘ ይህ ሁሉ ሲሆን የእናቶችን እንባ በተግባር ሲጠርጉና ለወገናቸው ደም ሲለግሱ በገሃድ የታዩት ጠ/ሚ/ር ዐቢይ ዝምታ መምረጣቸው የእርሳቸው ባህርይ እንዳልሆነ ግልጽ ነው። “ልሞትልህ የተዘጋጀሁ ነኝ” ያሉት ሕዝባቸው “ወዴት እየሄድን ነው? አገራችንስ ወዴት እየሄደች ነው?” የሚሉ በርካታ ጥያቄዎች ተወጥሮ ባለበት ሁኔታ (ለሁሉም ነገር እርሳቸው እየተጠየቁ መልስ መስጠት አለባቸው ባንልም) በአስገዳጅ አጣብቂኝ ውስጥ ካልገቡ በስተቀር ሕዝባቸውን ዝም ሊሉት እንደማይችሉ ለአዲሲቷ ኢትዮጵያ የጋራ ንቅናቄ ያምናል። ለጋራ ንቅናቄያችን ከሚደርሱን መረጃዎች በመነሳት ይህንን እምነት ሕዝባችንም ይጋራል ብለን እናምናለን።

ስለዚህ እነዚህንና ከላይ ያነሳናቸውን ጥያቄዎች ምላሽ ለመስጠት ቀላሉ መንገድ ጠቅላይ ሚኒስትር ዐቢይ አሕመድ የአገራችንን ወቅታዊ ሁኔታ አስመልክተው የአገር ውስጥና የውጪ ጋዜጠኞችን ሰብስበው ያልተገደበ ነጻ መገለጫ መስጠት ይገባቸዋል እንላለን። ከሕዝቡ ጋር አንዳንድ ጊዜ በቀን ከሁለት ጊዜ በላይ ሲገናኝ የቆየ መሪ ኮሪደር ላይ በማነጋገርና ቪዲዮ በመልቀቅ  ወይም ሕዝብ መግቢያ መውጫ አጥቶ በተጨነቀበት ጊዜ ከቡና ላኪዎች ጋር ተገናኘ ብሎ ዜና በመሥራት “ደኅንነቱን” ማሳየት የዶ/ር ዐቢይን ባህርይ የሚገልጽ አይደለም፤ ማንም ሊቀበለው የማይችል ጊዜ መግዣ ነው።

ስለዚህ ይህንን የሕዝብ ጭንቀት ከላይ በጠቀስነውና ባልተገደበ መልኩ በቀጣይ ጥቂት ቀናት ውስጥ ለሕዝብ ይፋ እንዲደረግ፤ ሕዝብና መሪው እንደቀድሞው እንዲገናኝ ለአዲሲቷ ኢትዮጵያ የጋራ ንቅናቄ ያሳስባል።

ፈጣሪ የአገራችንን ሰላም ያጽናልን፤ ሕዝቧንም ይባርክ።

ለአዲሲቷ ኢትዮጵያ የጋራ ንቅናቄ (አኢጋን)


ለአዲሲቷ ኢትዮጵያ የጋራ ንቅናቄ በአሜሪካ አገር በሕግ የተመዘገበ ድርጅት ሲሆን በትርፍ አልባ የሲቪክ ድርጅትነት በ501(c)(3) ምደባ ሥር የተካተተ ነው። ለተጨማሪ መረጃ የአኢጋን ዋና ዳይሬክተር አቶ ኦባንግ ሜቶ በስልክ ቁጥር፤ 202-725-1616 ወይም በኢሜል፤ obang@solidaritymovement.org ማግኘት ይቻላል።


“ጎልጉል፡ የድረገጽ ጋዜጣ የሕዝብ” እንደመሆኑ በ“የኔ ሃሳብ (Opinion)” ዓምድ ሥር የድርጅቶችና የማንኛውም ግለሰብ ነጻ ሃሳብ የሚስተናገድ ሲሆን ከአንባቢያን የሚላኩልን ጽሁፎች በጋዜጣው የአርትዖት (ኤዲቶሪያል) መመሪያ መሠረት ያለ መድልዖ በዚህ ዓምድ ሥር ይታተማሉ። ይህ በጎልጉል የድረገጽ ጋዜጣ በ“የኔ ሃሳብ (Opinion)” ዓምድ የታተመ ጽሁፍ የጎልጉል የድረገጽ ጋዜጣአቋም ሳይሆን የጸሃፊው ነው።

Comments

  1. Dr . Abiy’s absence from direct public appearance for more than three weeks and some limited media pictures of him to show he still on power (media show off) put a lot of Ethiopians in doubt. I strongly assume and feel some changes are going on in the palace since he came back from USA. It looks like he is leading the country under pressure and control of some external force. All Ethiopians must ask and continuously push for him to go out and respond to direct media interview. Otherwise, its a matter of time before things go in unexpected direction and his team’s favorable change will face set backs.

  2. What professor Mesfin had said about the Ethiopian people getting out in mass for demonstration when announced to come out and sitting back inactively after that, waiting from others to bring the needed change seems happening now. Activists, media personnel and all other concerned citizens have to demand and push to know what is going on now in the Arat Killo palace and take initiative to mobilize all Ethiopians for the likely upcoming power and public confrontation. Everybody should request actively for Dr Abiy to come out and take questions, interviews and publicly announce his status. Otherwise, people must organize and come out for struggle-demonstration, disobedience and other form of opposition before its too late to reverse course. The Arat Killo situation does not seem good now and every movement and observation indicates that.

  3. Imagine the time and organization it takes to
    always appear before the public. Remember
    Dr. Abiy is not superhuman. He needs
    pace himself in his activities. Moreover,
    needs to fulfill his duties as prime minister.
    Tigray Front has declared all-out media war
    attempting to create distance with the
    public. It will not succeed.
    One that needs to happen is
    journalists to check before publishing a story.

  4. ጤና ይስጥልጥኝ ዶር ኦባንግ ኢትዮጵያ ሜቶ እንዴት ሰነበትክ? እባክህን ጠንከረህ ታገል።፡ እኔማ ከተጀመረ ጀምሮ ብዙ ጻፍኩኝ በብሎጌ Kenebete በቀንበጥ ህልምም ወንበሩ ባዶ ሆኖዎ ስለዬሁኝ ምንም ጥርጣሬ አልነበረብኝ ኢትዮጵያ ከገቡ ጀምሮ ማለት እችላለሁኝ፤ በዬዕለቱ እጽፋለሁኝ ከነማገነዛቢያ ጭብጦቹ። ወጥተው ይናገሩ ቢባል እንኳን ያው መሰሉ ፌክ ነገር ነው የሚደራረበው። ከተቻለ የካናዳ ኢትዮጵውያን ከነቤተሰባቸው ግብዣ ቢያደርጉላቸው ያን ጊዜ ጉዱ ይታያል። አሁን በወያኔ ሃርነት የበላይነት ቁጥጥር ሥር ናቸው። መሪው ደግሞ አቶ በረከት ስምዖን ናቸው። ደስ ያለኝ ነገር አንተ ይሄን ማመንህ እና ይሆናል ብላችሁ በድርጅታችሁ መወሰናችሁ ነው። ይህ ግን በቂ አይደለም አዌርነሱ ለምታውቃቸው የምዕራባውያን አገሮች ሁሉ ተከታታይ በሆነ ሁኔታ ማሰወቅ ያስፈልጋል። “action is everything” እኔ እንዲያውም ከመደበኛ ቤታቸውም ያወጧቸው ነው የሚመስለኝ። ሲፈልጉቸው ብቻ ነው ከረባት እና ገበርዲን የሚያለብሷቸው። በተረፈ ተባረኩ!
    ነፃነት ለአብይ እና ለቤተሰቡ!
    ቸር ወሬ ያሰማን። አሜን!

Speak Your Mind

*